ហ្សាកាតា៖ ប្រទេស ឥណ្ឌូនេស៊ី បានបញ្ជូនជំនួយមនុស្សធម៌ ទៅកាន់ប្រទេសតួកគី និងស៊ីរី ក្រោយរញ្ជួយដី។ រដ្ឋាភិបាលឥណ្ឌូណេស៊ី កាលពីថ្ងៃអង្គារ ទី២១ ខែកុម្ភៈ បានបញ្ជូនជំនួយមនុស្សធម៌មួយផ្នែកទៀត ដើម្បីជួយគាំទ្រដល់ប្រទេសតួកគី និងស៊ីរី បន្ទាប់ពីគ្រោះរញ្ជួយដីដ៏សាហាវ។ យន្តហោះចំនួន ៤ គ្រឿងបានហោះហើរ ទៅកាន់ប្រទេសតួកគី និងប្រទេសស៊ីរី ដោយបានជញ្ជូនអាហារ ឱសថ និងសម្ភារចាំបាច់ផ្សេងៗទៀត សរុបចំនួន ១៤០ តោន។

ប្រធានាធិបតីប្រទេសឥណ្ឌូនេស៊ី លោក ចូលកូ វីដូដូ (Joko Widodo) បាននិយាយថា “នៅព្រឹកនេះ យើងកំពុងបញ្ជូនយន្តហោះចំនួន ៤ គ្រឿងទៅកាន់ប្រទេសទួកគី និងស៊ីរី ដែលនឹងចែកចាយស្បៀងអាហារចំនួន ១៤០ តោន និងការដឹកជញ្ជូនផ្សេងទៀតដែលត្រូវការនៅក្នុងតំបន់រងផលប៉ះពាល់” ។

លោកបានបន្តថា៖ «យើងក៏បានបញ្ជូនមន្រ្តីស្វែងរក និងជួយសង្គ្រោះ ក៏ដូចជាបុគ្គលិកពេទ្យ និងមន្ទីរពេទ្យវាល ព្រមទាំងយន្តហោះ ហឺខ្យូលី (Hercules) ផងដែរ ដែលបានជួយក្នុងកិច្ចខិតខំប្រឹងប្រែងសង្គ្រោះសម្រាប់ជនរងគ្រោះដោយការរញ្ជួយដី នៅក្នុងប្រទេសទួកគី និងស៊ីរី»។

ប្រធានទីភ្នាក់ងារកាត់បន្ថយគ្រោះមហន្តរាយឥណ្ឌូណេស៊ី លោក ស៊ូហាយ៉ាន់តូ (Suharyanto) បានអធិប្បាយថា “គិតត្រឹមថ្ងៃនេះ ក្រុមគ្រូពេទ្យរបស់យើងបានព្យាបាលមនុស្សចំនួន ៤៥៤ នាក់ហើយ នៅក្នុងប្រទេសទួកគី ដែលរងផលប៉ះពាល់ដោយការរញ្ជួយដីនេះ”៕ ប្រភពពី AFP ប្រែសម្រួលដោយ៖ សារ៉ាត