អ្នកនាំពាក្យ៖ មិនត្រូវភ្លេចខ្លួន និងកុំជឿតាមការផ្សាយព័ត៌មានមិនត្រឹមត្រូវពីវ៉ាក់សាំងកូវីដ១៩
ភ្នំពេញ៖ប្រមុខរាជរដ្ឋាភិបាលមានឆន្ទៈនយោបាយ និងការប្តេជ្ញាចិត្តក្នុងការប្រយុទ្ធជាមួយនឹងជំងឺកូវីដ១៩ ដែលធ្វើឱ្យកម្ពុជាអាចគ្រប់គ្រងស្ថានភាពបានល្អ តែមិនត្រូវភ្លេចខ្លួន និងកុំជឿតាមការផ្សាយព័ត៌មានមិនត្រឹមត្រូវពីវ៉ាក់សាំងកូវីដ១៩ឬការបកប្រែមិនត្រឹមត្រូវតាមលក្ខណ:បច្ចេកទេស។ នេះជាការថ្លែងឡើងរបស់លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេស ក្នុងពេលចុះពិនិត្យដំណើ
រការចាក់វ៉ាក់សាំងកូវីដ១៩ ដូសជំរុញតាមបណ្តាខេត្តចំនួនបីនាចុងខែមីនា កន្លងមកនេះ។
វត្តមាននៅទីនោះលោកជំទាវក៏បានលើកទឹកចិត្ត និងជំរុញដល់មន្ត្រីសុខាភិបាល អាជ្ញាធរ និងមន្ត្រីពាក់ព័ន្ធ ត្រូវបន្តកិច្ចខិតខំប្រឹងប្រែងរបស់ខ្លួនក្នុងការអប់រំ ផ្សព្វផ្សាយ ក្នុងការការពារសុខភាព និងបន្តចាក់វ៉ាក់សាំងកូវីដ១៩ ដូសជំរុញជូនប្រជាជន ដើម្បីរក្សាបាននិរន្តរភាពនៃដំណើរការសេដ្ឋកិច្ច-សង្គម ជម្រុញកំណើនសេដ្ឋកិច្ចគ្រួសារ និងសេដ្ឋកិច្ចជាតិ។ លោកជំទាវមានប្រសាសន៍ថា ថ្វីដ្បិតរាជរដ្ឋាភិបាលកម្ពុជាមានឆន្ទៈនយោបាយ និងការប្ដេជ្ញាចិត្តច្បាស់លាស់នៅក្នុងការប្រយុទ្ធប្រឆាំងនឹងជំងឺកូវីដ១៩
ធ្វើឱ្យកម្ពុជានាពេលបច្ចុប្បន្ន អាចគ្រប់គ្រងស្ថានភាពបានល្អ និងបន្តរស់នៅជាមួយវត្តមានវីរុសកូវីដ តែយើងទាំងអស់គ្នាមិនត្រូវភ្លេចខ្លួនឡើយ»។
លោកជំទាវ ឱ វណ្ណឌីន បានបន្តថា ៖ «មួយវិញទៀត សូមកុំជឿតាមការផ្សាយព័ត៌មានមិនត្រឹមត្រូវពីវ៉ាក់សាំងកូវីដ១៩ ឬការបកប្រែមិនត្រឹមត្រូវតាមលក្ខណ:បច្ចេកទេស និងសេចក្តីណែនាំនានានៃការចាក់វ៉ាក់សាំងកូវីដ១៩ របស់អង្គការសុខភាពពិភពលោកនាពេលថ្មីៗនេះ»។ យោងតាមក្រសួងសុខាភិបាល បានឱ្យដឹងថា ការចុះពិនិត្យដំណើរការចាក់វ៉ាក់សាំងកូវីដ១៩ ដូសជំរុញនៅខេត្តចំនួនបីនោះមាន ខេត្តបន្ទាយមានជ័យ, ខេត្តប៉ៃលិន
និងខេត្តបាត់ដំបង ចាប់ពីថ្ងៃទី២៨ ដល់ថ្ងៃទី៣១ ខែមីនា កន្លងទៅនេះ។
លោកជំទាវបានសង្កត់ធ្ងន់ថា ប្រសិនបើថ្នាក់ដឹកនាំ និងមន្ត្រីពាក់ព័ន្ធទាំងអស់ខិតខំអនុវត្តទៅតាមទិសដៅដែលបានដាក់ចេញ ប្រាកដណាស់ការប្រយុទ្ធប្រឆាំងនឹងជំងឺកូវីដ១៩ ពោលគឺការចាក់វ៉ាក់សាំងបង្ការជំងឺកូវីដ១៩ នៅកម្ពុជា នឹងទទួលបានលទ្ធផលកាន់តែល្អប្រសើរឡើងៗ ក្នុងទិសដៅធានាបាននូវសន្តិសុខ និងសុវត្ថិភាពសុខភាពធារណ:។ការផ្សព្វផ្សាយព័ត៌មានមិនពិត ព័ត៌មានមិនត្រឹមត្រូវ ឬព័ត៌មានប្រឌិតណាមួយ នឹងអាចនាំមកនូវមហន្តរាយសុខភាពសាធារណ: ដែលយើងទាំងអស់គ្នាត្រូវតែនាំគ្នាចៀសវាង និងរួមគ្នាបំបាត់នូវទង្វើអសកម្មបែបនេះ ដើម្បីសេចក្តីសុខ សន្តិសុខ និងសុវត្ថិភាពសុខភាពសាធារណ: និងការរស់នៅជាប្រក្រតីធម្មតារបស់យើងទាំងអស់គ្នា។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី១ខែមេសា ឆ្នាំ២០២៣ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាន នាក់ មាន ៩៥,៥១ភាគរយ។
ក្រសួងបានបន្តទៀតថា អត្រាចាក់ដូសទី៣ មានជាង១0លាននាក់ អត្រាចាក់ដូសទី៤ មានចំនួនជាង ៥លាននាក់ អត្រាចាក់ដូសទី៥ មានចំនួនជិត២លាននាក់ និងអត្រា នៃការចាក់ដូសទី៦ មានចំនួនជាង ៣៤ ម៉ឺននាក់៕
ដោយ៖នាង សុគន្ធា
