ក្រសួងកសិកម្ម កំពុងជំរុញការសិក្សាពីសក្តានុពល និងបញ្ហាប្រឈមនៃការផលិតជីកសិកម្មក្នុងស្រុក ដើម្បីកាត់បន្ថយការនាំចូល
ភ្នំពេញ៖ឯកឧត្តម យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា បច្ចុប្បន្ននេះ ក្រសួងកំពុងសិក្សាលម្អិត ពីការផលិតជីកសិកម្ម និងបញ្ហាប្រឈមនានា នៅតាមសិប្បកម្មផលិតជី នៅបណ្តាខេត្តមួយចំនួន ដោយកាលពីថ្ងៃទី១ ខែមេសា លោកបានដឹកនាំមន្រ្តីទៅកាន់សិប្បកម្មផលិតជីកសិកម្មមួយកន្លែងនៅខេត្តកំពង់ស្ពឺ ដើម្បីពិនិត្យសក្តានុពល នៃការផលិតជីកសិកម្មនេះ។
ឯកឧត្តមបានប្រាប់ឱ្យដឹងនៅថ្ងៃទី២ ខែមេសាថា នៅកម្ពុជាមានសិប្បកម្មផលិតជីធម្មជាតិ ខ្នាតតូច និងខ្នាតមធ្យមច្រើន ទើបក្រុមមន្រ្តីជំនាញបានចុះទៅពិនិត្យអំពីសក្តានុពល ទាក់ទងបរិមាណ វិធីសាស្រ្តផលិត តម្លៃ និងគុណភាពផលិតផល និងបទពិសោធរបស់អ្នកប្រើប្រាស់ជីទាំងនេះ ដើម្បីធ្វើការប្រៀបធៀបនឹងផលិតផលជីនាំចូល ថាតើក្រសួងគួរមានកិច្ចសហការបែបណាជាមួយសិប្បករ ក្នុងការជំរុញការផលិតជីនេះ។ ឯកឧត្តមបានបញ្ជាក់ថា៖ «ខ្ញុំកំពុងធ្វើការសិក្សាស្វែងយល់នូវសក្តានុពលផលិតកម្មក្នុងស្រុក ទាក់ទងនឹងបរិមាណ គុណភាព និងតម្លៃ និងប្រសិទ្ធភាពនៃការប្រើប្រាស់ជាដើម។ បន្ទាប់មកយើងគិតមើលថាតើយើងគួរមានការសហការគ្នាយ៉ាងម៉េចដ
ើម្បីឱ្យយើងអាចមានជីក្នុងស្រុកប្រើ ដែលមានគុណភាពល្អ និងតម្លៃសមរម្យ។ ដូច្នេះយើងត្រូវការប្រើពេលច្រើនទៀត»។
ទោះជាយ៉ាងណា ក្រសួងនៅមិនទាន់ដឹងពីចំនួនសិប្បកម្មផលិតកសិកម្មក្នុងស្រុកថាមានប៉ុន្មាននៅឡើយទេ ដោយសារតែក្រសួងកំពុងសិក្សា និងធ្វើស្ថិតិលើការងារ ដោយឯកឧត្តម យ៉ង សាំង កុមារ បានលើកឡើងថា សិប្បកម្មភាគច្រើនផលិតផលិតជីធម្មជាតិ ដែលផលិតពីរុក្ខជាតិ លាយជាមួយលាមកគោ និងការផលិតខ្លះទៀត មានបន្ថែមសាធាតុគីមីតិចតួច ដើម្បីជំរុញការលូតលាស់របស់ដាំណាំ។ ឯកឧត្តមបានគូសបញ្ជាក់បន្ថែមថា ការផលិតជីកសិកម្មធម្មជាតិក្នុងស្រុក នៅមានបញ្ហាប្រឈមមួយចំនួន ទាក់ទង គុណភាពនៃការប្រើប្រាស់នៅមានកម្រិត
ដោយសារជីធម្មជាតិសារធាតុចិញ្ចឹមទាប នាំការលូតលាស់របស់ដំណាំយឺត ខណៈកសិករចង់ឱ្យទទួលផលបានលឿន។ មួយវិញទៀត វត្ថុធាតុដើមមានតម្លៃថ្លៃ ដូចជាលាមកគោ និងលាមកសត្វផ្សេងជាដើម ធ្វើឱ្យថ្លៃដើមផលិតកើនឡើង និងបញ្ហាកង្វះទុន។
បែបនេះក្តីឯកឧត្តមបញ្ជាក់ថា ក្រសួងកសិកម្មនៅតែបន្តខិតខំជំរុញឱ្យមានការផលិត និងប្រើប្រាស់ជីធម្មជាតិ ក្នុងស្រុកឱ្យបានកាន់តែច្រើន ដើម្បីកាត់បន្ថយជីនាំចូល និងការប្រើប្រាស់ជីគីមី ដើម្បីរក្សាគុណភាពដី។ ទាក់ទងនឹងការផលិតជីនេះ លោក គីង រតនា អគ្គនាយកក្រុមហ៊ុន វង្ស សារ៉ុម អេហ្គ្រត្រឌីង បាននិយាយថា តាំងពីមានវិបត្តិកូវីដ១៩មក
តម្លៃជី-ថ្នាំកសិកម្មបានកើនឡើងខ្ពស់ជាបន្ដបន្ទាប់ ហើយកើនឡើងកាន់តែខ្ពស់ទៅទៀត ក្រោយផ្ទុះសង្គ្រាមនៅអ៊ុយក្រែន ដែលបង្កផលប៉ះពាល់ដល់ថ្លៃដើមផលិតនៃវិស័យកសិកម្មនៅកម្ពុជា។
លោកបានបន្តថា ក្រុមហ៊ុនរបស់កំពុងស្នើសុំដល់ដៃគូរបស់លោកក្រៅប្រទេសរួមមាន តួគី អ៊ីស្រាអែល ឥណ្ឌា ជាដើម ក្នុងការផ្តល់បច្ចេកទេសក្នុងការផលិតជីកសិកម្ម។ លោកបានបញ្ជាក់ថា ៖ «យើងបានស្នើសុំភាគីក្រៅប្រទេសបានហើយ ទាក់ទងនឹងបច្ចេកទេស នៅឡើយតែការរៀបចំច្រវាក់ផលិតកម្មដោយសារម៉ាស៊ីនសម្រាប់ផលិតជីនេះមានតម្លៃថ្លៃពេក ដូចនេះយើងកំពុងពិចារណា។ យើងក៏បានស្នើជួបរដ្ឋមន្រ្តីកសិកម្មដែរ
ដើម្បីស្នើសុំការគាំទ្របន្ថែមលើគម្រោងរបស់យើងនេះ ដើម្បីជួយកាត់បន្ថយការនាំចូលជីពីក្រៅប្រទេសបាន»។
លោក គីង រតនា បានបន្តថា នៅក្នុងឆ្នាំ ២០២៣នេះ សន្ទុះនៃតម្រូវការជី-ថ្នាំកសិកម្ម នឹងមានចំនួនច្រើនជាងឆ្នាំមុន ដោយសារតែតម្លៃកសិផលរបស់ប្រជាកសិករឆ្នាំនេះមានភាពប្រសើរជាងមុន។
របាយការណ៍ពីក្រសួងពាណិជ្ជកម្ម បានបង្ហាញថា ការនាំចូលជីកសិកម្ម និងថ្នាំសម្លាប់សត្វល្អិតឬស្មៅ នៅក្នុងរយៈពេល១២ខែឆ្នាំ២០២២កន្លងទៅនេះ មានទំហំទឹកប្រាក់សរុបជាង ៤៨០លានដុល្លារ កើនឡើងប្រមាណ ៦ភាគរយ បើធៀបនឹងរយៈពេលដូចគ្នាកាលពីឆ្នាំ២០២១។
ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងដែរថា ក្នុងអំឡុងកូវីដ១៩ ការនាំចូលជី និងថ្នាំកសិកម្ម មានតម្លៃថ្លៃ ដោយការកើនឡើងតម្លៃនេះ ដោយសារប្រទេសផលិតមិនមានលទ្ធភាពផ្គត់ផ្គង់គ្រប់គ្រាន់,កង្វះវត្ថុធាតុដើមផលិត, ការកាត់បន្ថយកម្លាំងពលកម្មផលិត, ការចំណាយពេលច្រើនក្នុងការដឹកជញ្ជូន និង កម្ពុជាមិនទាន់មានលទ្ធភាពផលិតជាដើម៕
ដោយ៖វណ្ណ សុជាតា
