ភ្នំពេញ៖គិតត្រឹមថ្ងៃទីពីរនៃយុទ្ធនាការឃោសនាបោះឆ្នោតនៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុង ស្រុក ចំនួន ៥ ​ក្នុង​ខេត្តកណ្ដាល​ ខេត្តកំពង់ស្ពឺ និង​ខេត្តក្រចេះ ដែលទើបត្រូវបានបំបែក និងបង្កើតថ្មី បានប្រព្រឹត្តទៅ ដោយរលូន មានស​ន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។ យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គជប) នៅថ្ងៃទី១ ខែមេសា បាន​ឱ្យដឹងថា

តាមរបាយការណ៍របស់គណៈកម្មការរៀបចំការបោះឆ្នោត នៃខេត្តពាក់ព័ន្ធឃើញថា គណបក្សប្រជាជនកម្ពុជា បានធ្វើ​សកម្មភាពចាក់មេក្រូផ្សព្វផ្សាយនៅទីស្នាក់ការគណបក្ស និងចល័តតាមភូមិ និងជួបប្រជុំជាមួយបេក្ខជនឈរឈ្មោះបោះ​ឆ្នោត អង្គបោះឆ្នោត និងសមាជិកគណបក្សនៅក្រុង អរិយក្សត្រ (អ្នកចូលរួមប្រមាណ ៣៧នាក់) និងក្រុងសំពៅពូន (អ្នកចូលរួមប្រមាណ ១៤៤នាក់) និងស្រុកអូរគ្រៀងសែនជ័យ (អ្នកចូលរួមប្រមាណ ១២៣នាក់)។   រីឯគណបក្សភ្លើងទៀន បានធ្វើសកម្មភាពចាក់មេក្រូផ្សព្វផ្សាយនៅទីស្នាក់ការគណប​ក្ស និងចល័តតាមសង្កាត់ និងចែកខិត្តបណ្ណនៅក្រុងអរិយក្សត្រ

(អ្នកចូលរួមប្រមាណ ១៥នាក់) និងក្រុងសំពៅពូន (អ្នកចូលរួមប្រមាណ ១៥នាក់)។ ដោយឡែក គណបក្សហ៊្វុនស៊ិនប៉ិច ពុំមានធ្វើសកម្មភាពឃោសនាបោះឆ្នោតឡើយ។

បើតាមប្រភពដដែល ស្ថានភាពទូទៅនៃដំណើរការឃោសនាបោះឆ្នោតក្នុងថ្ងៃទីពីរនេះ បានប្រព្រឹត្តទៅ ដោយរលូន មានស​ន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។ ទាក់ទងនឹងការឃោសនា លោក ញឿន រ៉ាដែន អ្នកនាំពាក្យគណបក្សហ៊ុនស៊ិនប៉ិច បាន​ប្រាប់​ឱ្យដឹងនៅថ្ងៃទី​២ ខែមេសា​ថា គណបក្សហ៊ុនស៊ិនប៉ិចជាគណបក្សនយោបាយមួយក្នុងចំណោមគណ

បក្សនយោបាយ​ពីរផ្សេងទៀត បានចូលរួមឃោ​សនាបោះឆ្នោត ដោយបានជួបជុំអ្នកគាំទ្រ កាលពីថ្ងៃចាប់ផ្តើមនៃការឃោសនា ដោយធ្វើការជាលក្ខណៈទ្រង់ទ្រាយតូច នៅ​ក្នុងឃុំព្រែកលួងឃុំអរិយក្សត្រ នៃខេត្តកណ្តាល។

លោកបាន​បន្តថា ក្នុងការឃោសនាបោះឆ្នោតនេះ គណបក្សហ៊ុនស៊ីនប៉ិច បានអនុវត្តបានយ៉ាងខ្ជាប់ខ្ជួនទៅតាមនីតិវិធី និ​ងបទបញ្ជារបស់គ.ជ.ប ព្រមទាំងគោរពទៅតាមច្បាប់ និងមិនមានបញ្ហាអ្វីដែលគួរឱ្យកត់សម្គាល់នោះទេ ជាពិសេសមានកា​រសសម្របសម្រួល និងបង្កបរិយាកាសបានយ៉ាងល្អពីសំណាក់អាជ្ញាធរឃុំផងដែរ។ លោក ម៉ុក ដារ៉ា អគ្គលេខាធិការរង គ.ជ.ប បាន​ឱ្យដឹងដែរថា គណបក្សនយោបាយដែលមានសិទ្ធិចូលរួម ឃោសនាបោះឆ្នោតនេះ

គឺជាគណបក្សណាដែលបានស្នើសុំចុះបញ្ជីបេក្ខជន ឬគណបក្សនយោបាយសម្រាប់ការបោះឆ្នោតនេះ។ 

លោកបន្តថា ​ការឃោសនាបោះឆ្នោតនេះ ដើម្បីឱ្យគណបក្សនយោបាយ ក៏ដូចជាបេក្ខជន ដែលបានចុះបញ្ជី ត្រឹមត្រូវស្របតាមច្បាប់​ធ្វើការឃោសនា ទៅលើគោនយោបាយរបស់ខ្លួន​ដើម្បីឱ្យអ្នកគាំទ្របោះឆ្នោតជូនរបស់គណបក្សរបស់លោក ដែ​លរួមមានការជួបជុំ ហែរក្បួន ការជួបជុំឃោសនានៅតាមផ្ទះប្រជាពលរដ្ឋ និងផ្សព្វផ្សាយនៅតាមសារព័ត៌មានជាដើម។ សូមបញ្ជាក់ថា ការឃោសនាបោះឆ្នោតសម្រាប់ការបោះឆ្នោតលើកទី១នេះ

មានរយៈពេល ៨ ថ្ងៃ ចាប់ពីថ្ងៃទី៣១ ខែមីនា ដល់ថ្ងៃទី៧ ខែមេសា ឆ្នាំ២០២៣ និងការបោះឆ្នោតនឹងប្រព្រឹត្តិទៅនៅថ្ងៃអាទិត្យទី ៩ ខែមេសា ឆ្នាំ ២០២៣។ ការបោះឆ្នោតនេះ មានគណបក្សនយោបាយចូលរួមប្រកួតប្រជែង គឺគណបក្សហ៊ុនស៊ិនប៉ិច គណបក្សភ្លើងទៀន និងគណបក្សប្រជាជនកម្ពុជា៕

ដោយ៖គឹម យុត្ថារ៉ូ