ភ្នំពេញ៖ថ្នាក់ដឹកនាំនៅតាមបណ្តាខេត្តមួយចំនួនអំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះគ្រោះធម្មជាតិជាពិសេសនោះ នារដូវប្រាំងនេះបង្កឱ្យមានភាពហួតហែងខ្លាំង ហើយពេលមានភ្លៀងធ្លាក់ម្ដងៗ គឺលាយឡំដោយខ្យល់កន្ត្រាក់ ផ្គររន្ទះ ដែលអាចបង្កគ្រោះថ្នាក់ដល់មនុស្ស និងផ្ទះសម្បែងប្រជាពលរដ្ឋ។ ដោយឡែកនារដូវប្រាំងនេះដែរ មន្រ្តីជាន់ខ្ពស់ក្រសួងសុខាភិបាល

ភ្នំពេញ៖ថ្នាក់ដឹកនាំនៅតាមបណ្តាខេត្តមួយចំនួនអំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះគ្រោះធម្មជាតិជាពិសេសនោះ នារដូវប្រាំងនេះបង្កឱ្យមានភាពហួតហែងខ្លាំង ហើយពេលមានភ្លៀងធ្លាក់ម្ដងៗ គឺលាយឡំដោយខ្យល់កន្ត្រាក់ ផ្គររន្ទះ ដែលអាចបង្កគ្រោះថ្នាក់ដល់មនុស្ស និងផ្ទះសម្បែងប្រជាពលរដ្ឋ។ ដោយឡែកនារដូវប្រាំងនេះដែរ មន្រ្តីជាន់ខ្ពស់ក្រសួងសុខាភិបាល ណែនាំឱ្យពលរដ្ឋពិសារទឹកឱ្យបានលើសពី២លីត្រ ក្នុងមួយថ្ងៃ ទោះបីជាមិនស្រេកទឹកក៏ដោយ។

ការអំពាវនេះធ្វើឡើងខណៈរដូវប្រាំងបានចូលមកដល់ ហើយថ្នាក់ដឹកនាំបណ្តាខេត្តមួយចំនួន បានចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ជូនប្រជាពលរដ្ឋរងគ្រោះដោយខ្យល់កន្រ្តាក់នោះ។

 អភិបាលខេត្តប៉ៃលិនលោកជំទាវ បាន ស្រីមុំ អមដំ​ណើ​រដោយ សមាជិក សមាជិកា សាខាកាក​បាទក្រហមកម្ពុជាខេត្ត និងអាជ្ញាធរមូលដ្ឋាន កាលពីថ្ងៃទី​១ខែមេសានេះ បានអញ្ជើញចុះសួរសុខទុក្ខ និងនាំយកអំ​ណោយសង្គ្រោះបន្ទាន់ទៅឧបត្ថម្ភដ​ល់បងប្អូ​នប្រ​ជា​ពលរដ្ឋ ដែលរងគ្រោះដោយសារខ្យល់កន្ត្រាក់បំផ្លា​ញផ្ទះសម្បែង ចំនួន ១៧៩គ្រួសារ នៅទូទាំង​ខេត្តប៉ៃលិន ។

ក្នុងឱកាសនោះលោកជំទាវបានផ្តាំផ្ញើថា៖«បងប្អូនប្រជាពលរដ្ឋ ត្រូវ​បង្កើនការប្រុងប្រយ័ត្នខ្ពស់ ចំពោះគ្រោះធម្មជាតិ ដើម្បីធានាបាននូវសុវត្ថិភាពផ្ទាល់ខ្លួន និងសេ​ចក្តី​សុ​ខ​ក្រុមគ្រួសារទាំងមូល ពីព្រោះរដូវ​នេះ ជារដូវមានភ្លៀងធ្លាក់ច្រើន និងលាយឡំជាមួយខ្យល់កន្ត្រាក់ ផ្គររន្ទះ ដែលងាយបង្កការគ្រោះថ្នាក់កើតឡើងជាយថាហេតុ»។ លោកជំទាវបន្ថែមថា ក្នុងករណីពលរដ្ឋមានបញ្ហាកើតឡើង ត្រូវប្រញ៉ាប់​រាយ​​ការណ៍មកកាន់អាជ្ញាធរមូលដ្ឋានដែលនៅជិតបំផុតឱ្យបានលឿន ដើម្បីឱ្យក្រុមការងារចុះទៅ​ជួយ​អន្ត​រាគមន៍

និងផ្តល់អំណោយសង្គ្រោះបន្ទាន់ឱ្យបានទាន់ពេលវេលា ក្នុងការចូលរួមសម្រាលកា​រខ្វះខា​តនា​នាជាបណ្តោះអាសន្ន។

លោកជំទាវ បាន ស្រីមុំ បញ្ជាក់ផងដែរថា ថ្វីត្បិតតែអំណោយមនុស្សធម៌ដែលបាន​នាំយ​ក​មកចែកជូនបងប្អូននាពេលនេះ មានចំនួនតិចតួច មិនសមល្មមនឹងការខាតបង់របស់បងប្អូនក្តី ប៉ុន្តែក៏​អាចជួយសម្រាលទុក្ខបាករបស់បងប្អូនបានមួយកម្រិតដែរ  ហើយនេះក៏ជាការបង្ហាញនូវការយ​កចិត្ត​ទុក​ដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ និងអាជ្ញាធរគ្រប់ជាន់ថ្នាក់ ជាពិសេស​គឺ​កាកបា​​ទក្រ​ហមកម្ពុជា។ ជាមួយគ្នានោះ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជា

ខេត្តបាត់ដំបងឯកឧត្តម សុខ លូ កាលពីថ្ងៃទី១ខែមេសានះ បានដឹកនាំក្រុមការងារ ចុះជួបសំណេះ​សំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋរងគ្រោះ ដោយខ្យល់កន្ត្រាក់ចំនួន៧២គ្រួសារ ក្នុងឃុំចំនួន២ នៃស្រុកភ្នំព្រឹក គឺឃុំពេជ្រចិន្តា និង ឃុំអូរំដូល។

ក្នុងឱកាសនោះដែរឯកឧត្តមបានក្រើនរំលឹកដល់ លោកយាយ លោកតា អ៊ំពូមីងថា រដូវនេះ ជារដូវប្រាំង ក្កៅហួតហែងខ្លាំង ហើយពេលមានភ្លៀងធ្លាក់ម្ដងៗ គឺលាយឡំដោយខ្យល់កន្ត្រាក់ ផ្គររន្ទះ ហេតុនេះ  សូមមេត្តាប្រុងប្រយ័ត្នឱ្យបានខ្ពស់។ ដោយឡែកពាក់ព័ន្ធសុខភាពវិញ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល នៅថ្ងៃទី២ខែមេសានេះ បានណែនាំថា អាកាសធាតុក្តៅទៅៗហើយ! 

សូមប្រជាជនទាំងអស់ថែរក្សាសុខភាពផ្ទាល់ខ្លួនឱ្យបានល្អ។  សូមពិសារទឹកឱ្យបានគ្រប់គ្រាន់លើសពីពីរលីត្រក្នុងមួយថ្ងៃ​ បើទោះជាមិនស្រេកទឹកក៏ដោយ។ កុំស្ថិតនៅក្រោមកម្ដៅថ្ងៃផ្ទាល់យូរពេក៕

ដោយ៖សុខ រក្សា