មេដឹកនាំថៃ លោក ប្រាយុទ្ធ បង្កើនវោហាសាស្រ្តមុនការបោះឆ្នោតថ្នាក់ជាតិខាងមុខ
ថៃ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានបង្កើនវោហាសាស្រ្តនយោបាយរបស់ខ្លួន ដោយនិយាយអួតនៅថ្ងៃចន្ទ ទី ៣ ខែមេសា ថា ប្រទេសថៃត្រូវការមេដឹកនាំដែលមានបទពិសោធន៍ ខណៈមេដឹកនាំដែលធ្លាក់ប្រជាប្រិយភាពរូបនេះ ប្រឈមនឹងការប្រកួតប្រជែងដ៏ខ្លាំងក្លាក្នុងការបោះឆ្នោតថ្នាក់ជាតិនាពេលខាងមុខ។
ការថ្លែងរបស់លោក ប្រាយុទ្ធ ដែលជាអតីតមេកងទ័ពថៃ និងឡើងកាន់អំណាចតាមរយៈការធ្វើរដ្ឋប្រហារនៅឆ្នាំ ២០១៤ ធ្វើឡើងខណៈដែលសមាជិកសភារាប់រយនាក់នៅក្នុងប្រទេសថៃចាប់ផ្តើមដំណើរការចុះឈ្មោះជាផ្លូវការសម្រាប់ការបោះឆ្នោត។ បច្ចុប្បន្ននេះ គេមើលឃើញថា លោក ប្រាយុទ្ធ កំពុងប្រឈមមុខនឹងឧបសគ្គដ៏ស្វិតស្វាញពីក្រុមប្រឆាំង ដឹកនាំដោយលោកស្រី ភែតងតាន ស៊ីណាវ៉ាត (Paetongtarn Shinawatra ) ដែលជាកូនស្រីរបស់អតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត ។
លោក ប្រាយុទ្ធ ដែលមានវ័យ ៦៩ ឆ្នាំ បាននិយាយប្រាប់ទូរទស្សន៍ក្នុងស្រុក Thairath TV នៅពេលជួបជាមួយអ្នកគាំទ្រនៅសាលកីឡដ្ឋាននាទីក្រុងបាងកកង នៅថ្ងៃចន្ទ យ៉ាងដូច្នេះថា ប្រទេសថៃ «ត្រូវការមនុស្សដែលដឹងពីរបៀបធ្វើការ។ បើគេមិនដែលធ្វើទេ គេមិនអាចធ្វើបាននោះទេ»។ នេះបើតាមការស្រង់សម្ដីបន្តរបស់ទីភ្នាក់ងារសារព័ត៌មាន AFP។
គួរបញ្ជាក់ថា ថៃនឹងរៀបចំការបោះឆ្នោតថ្នាក់ជាតិនៅថ្ងៃទី ១៤ ខែឧសភា ដែលជាការបោះឆ្នោតលើកដំបូងចាប់តាំងពីប្រទេសនេះរងនូវភាពចលាចល ដែលរំជើបរំជួលដោយការធ្វើបាតុកម្មតវ៉ាគាំទ្រលទ្ធិប្រជាធិបតេយ្យក្នុងឆ្នាំ ២០២០ ដែលដឹកនាំដោយក្រុមយុវជន។
កន្លងមកថ្មីៗនេះ គេសង្កេតឃើញមាន ការស្ទង់មតិផ្សេងៗបានបង្ហាញថា សន្ទុះគាំទ្រលោក ប្រយុទ្ធ និងគណបក្សថៃរួបរួមជាតិ (UTNP) របស់លោក កំពុងស្ថិតនៅក្រោមសន្ទុះនៃការគាំទ្រលើគណបក្សភឿថៃ របស់អ្នកនយោបាយវ័យក្មេងលោកស្រី ភែតងតាន និងគណបក្ស Move Forward ដែលគាំទ្រការធ្វើកំណែទម្រង់ របស់លោក ភីតា លីមចារឺនរ៉ាត (Pita Limjaroenrat)។
ខណៈសន្ទុះនៃការគាំទ្រគណបក្សប្រឆាំងកំពុងកើនឡើងខ្ពស់សម្រាប់ការបោះឆ្នោតនាពេលខាងមុខ រដ្ឋធម្មនុញ្ញឆ្នាំ ២០១៧ របស់ថៃ ដែលតាក់តែងដោយរបបយោធារបស់លោក ប្រាយុទ្ធ បានជួយដល់គណបក្សដែលយោធាគាំទ្រក្នុងការបង្កើតរដ្ឋាភិបាល។ ដើម្បីក្លាយជានាយករដ្ឋមន្រ្តី បេក្ខជនម្នាក់ត្រូវតែឈ្នះសម្លេងភាគច្រើននៃសមាជិកសភាជាន់ទាបជាប់ឆ្នោតចំនួន ៥០០ នាក់ ព្រមទាំងសមាជិកព្រឹទ្ធសភាពីក្រុមយោធាចំនួន ២៥០ រូប។
គណបក្សភឿថៃបាននិយាយថា ខ្លួនកំពុងកំណត់គោលដៅទទួលជ័យជម្នះភ្លូកទឹកភ្លូកដីក្នុងការបោះឆ្នោត ដើម្បីកុំឱ្យយោធារារាំងខ្លួនមិនឱ្យអំណាចបាន ដូចអ្វីដែលបានកើតឡើងក្នុងឆ្នាំ ២០១៩ នៅពេលដែលគណបក្សនេះ ទទួលបានអាសនៈភាគច្រើន ប៉ុន្តែមិនអាចបង្កើតរដ្ឋាភិបាល ដោយសារតែទទួលបានការគាំទ្រមិនលើសលុប។
លោកស្រី ភែតងតាន និយាយនៅថ្ងៃចន្ទថា៖ «ខ្ញុំជឿថាចំណុចខ្លាំងរបស់ភឿថៃ គឺគណបក្សខ្លួនឯង មិនមែនខ្ញុំទេ។ ប្រជាប្រិយភាពរបស់គណបក្សនាំមុខខ្ញុំ។ ខ្ញុំជឿថាប្រជាជនជ្រើសរើសបក្សដោយសារគោលនយោបាយរបស់យើង។ នោះជាចំណុចខ្លាំងរបស់យើង»។
ក្រោមការដឹកនាំរបស់លោក ប្រាយុទ្ធ ថៃបានប្រឈមមុខយ៉ាងត្រដាបត្រដួសដើម្បីងើបឡើងវិញពីផលប៉ះពាល់សេដ្ឋកិច្ចនៃវិបត្តិកូវីដ-១៩។ យោងតាមធនាគារពិភពលោក ថៃគឺជាប្រទេសតែមួយគត់នៅអាស៊ីអាគ្មេយ៍ ក្រៅពីតែមីយ៉ាន់ម៉ា ដែលផលិតផលក្នុងស្រុកសរុប មិនទាន់ងើបទៅកម្រិតមុនវិបត្តិកូវីដ ខណៈបញ្ហានយោបាយរបស់ថៃក្នុងរយៈពេលមួយទសវត្សរ៍ចុងក្រោយគឺជាផ្នែកមួយនៃភាពទ្រុធទ្រោម៕
ប្រែសម្រួល៖ ហួន ឌីណា
ប្រភព៖ Thai PM Prayut touts experience ahead of tough election
