អង្គការសុខភាពពិភពលោក៖ មនុស្សម្នាក់ក្នុងចំណោមប្រាំមួយនាក់ ទូទាំងពិភពលោក មានជំងឺអារ
អ.ស.ប៖ របាយការណ៍ថ្មីរបស់អង្គការសុខភាពពិភពលោក (WHO) បានឱ្យដឹងថា មនុស្សម្នាក់ក្នុងចំណោមប្រាំមួយនាក់នៅជុំវិញពិភពលោករងផលប៉ះពាល់ដោយភាពគ្មានកូន ឬជំងឺអារក្នុងឆាកជីវិតរបស់ពួកគេ។
ទីភ្នាក់ងារសុខាភិបាលរបស់អង្គការសហប្រជាជាតិ(អ.ស.ប)មួយនេះ បាននិយាយថា ប្រហែល ១៧,៥ ភាគរយនៃចំនួនប្រជាជនពេញវ័យ ជួបប្រទះនឹងភាពគ្មានកូន ដោយអត្រានេះមានភាពខុសគ្នាតិចតួចទៅតាមថ្នាក់នៃប្រទេសនិមួយៗ។
ក្នុងប្រទេសមានប្រាក់ចំណូលខ្ពស់អត្រានេះស្ថិតនៅ ១៧,៨ ភាគរយ ខណៈនៅបណ្ដាប្រទេសដែលមានប្រាក់ចំណូលទាប និងមធ្យម អត្រាដូចគ្នាមានត្រឹម ១៦,៥ ភាគរយ។
អគ្គនាយកអង្គការសុខភាពពិភពលោក លោកវេជ្ជបណ្ឌិត Tedros Adhanom Ghebreyesus បាននិយាយក្នុងសេចក្តីថ្លែងការណ៍ថា៖ «របាយការណ៍បង្ហាញពីការពិតដ៏សំខាន់មួយថា ភាពអារគ្មានកូនអាចកើតមានលើមនុស្សគ្រប់គ្នា»។ លោកនិយាយថា ចំនួនដ៏ច្រើននៃអត្រាមនុស្សដែលរងផលប៉ះពាល់ដោយជំងឺអារ បង្ហាញពីតម្រូវការក្នុងការពង្រីកលទ្ធភាពថែទាំសុខភាពដើម្បីឱ្យមានកូន និងធានាថា បញ្ហានេះមានការស្រាវជ្រាវគ្រប់គ្រាន់ និងមានក្នុងគោលនយោបាយសុខាភិបាល។ លោកបន្តថា ដូច្នេះ
ជម្រើសដែលមានសុវត្ថិភាព ប្រសិទ្ធភាព និងមានតម្លៃសមរម្យ ដើម្បីអាចក្លាយជាឪពុកម្តាយ អាចមានសម្រាប់មនុស្សគ្រប់គ្នា។
គួរបញ្ជាក់ថា អារគឺជាជំងឺនៃប្រព័ន្ធបន្តពូជរបស់បុរស ឬស្ត្រី ដែលធ្វើឱ្យពួកគេមិនអាចមានកូនបាន ក្រោយពេលព្យាយាមអស់រយៈពេល ១២ ខែ ឬយូរជាងនេះ។
ជាទូទៅ ក្នុងប្រព័ន្ធបន្តពូជរបស់បុរស ភាពគ្មានកូនបង្កឡើងដោយសារបញ្ហាទឹកកាម ដូចជាអវត្តមាន ឬកម្រិតទាបនៃមេជីវិតឈ្មោល ឬរូបរាងមិនប្រក្រតី (morphology) និងចលនានៃមេជីវិតឈ្មោល។ ក្នុងប្រព័ន្ធបន្តពូជរបស់ស្ត្រីវិញ ភាពគ្មានកូនអាចបណ្តាលមកពីភាពមិនប្រក្រតីជាច្រើននៃអូវែរ ស្បូន បំពង់ស្បូន និងប្រព័ន្ធអង់ដូគ្រីន ក្នុងចំណោមកត្តាផ្សេងៗទៀត។
បន្ថែមពីលើនេះ WHO បាននិយាយផងដែរថា ភាពគ្មានកូន ឬអារអាចបណ្តាលឱ្យអ្នកដែលរងផលប៉ះពាល់ មានទុក្ខព្រួយ រងការមាក់ងាយ និងមានភាពលំបាកផ្នែកហិរញ្ញវត្ថុ ដែលប៉ះពាល់ដល់សុខុមាលភាពផ្លូវចិត្តរបស់ពួកគេ។
ការថែទាំវេជ្ជសាស្រ្តភាគច្រើន សម្រាប់ការការពារ ការធ្វើរោគវិនិច្ឆ័យ និងការព្យាបាលជំងឺអារ រួមទាំងបច្ចេកវិទ្យាបន្តពូជជំនួយ ដូចជាការបង្កកំណើតក្នុងមន្ទីរពិសោធន៍ (IVF) នៅតែខ្វះខាត និងមិនអាចឱ្យមនុស្សគ្រាប់គ្នាទទួលបាន ដោយសារតែការចំណាយខ្ពស់ខ្លាំង និងការមិនសូវមានជាដើម។ លោកស្រីវេជ្ជបណ្ឌិត Pascale Allotey នាយិកាផ្នែកសុខភាពផ្លូវភេទ និងបន្តពូជ និងស្រាវជ្រាវនៅ WHO បាននិយាយថា៖ «មនុស្សរាប់លាននាក់ប្រឈមមុខនឹងការចំណាយលើការថែទាំសុខភាពដ៏សន្ធឹក
សន្ធាប់ បន្ទាប់ពីស្វែងរកការព្យាបាលជំងឺអារ ដែលធ្វើឱ្យនេះជាបញ្ហាសមធម៌ដ៏សំខាន់ ហើយជារឿយៗក៏ជាអន្ទាក់នៃភាពក្រីក្រផ្នែកវេជ្ជសាស្រ្តសម្រាប់អ្នកដែលមានជំងឺនេះ»។
លោកស្រី Allotey បានបន្តថា៖ «ការមានគោលនយោបាយប្រសើរជាងមុន និងហិរញ្ញប្បទានសាធារណៈ អាចធ្វើឱ្យប្រសើរឡើងនូវលទ្ធភាពទទួលបានការព្យាបាល និងអាចទប់ស្កាត់កុំឱ្យគ្រួសារក្រីក្រកាន់តែក្រីក្រទៅៗ»៕
ប្រែសម្រួល៖ហួន ឌីណា
