ម៉ានីល៖ កងទ័ពអាមេរិកនិងហ្វីលីពីនបានផ្តើមធ្វើសមយុទ្ធរួមគ្នា ជាលក្ខណៈទ្រង់ទ្រាយដ៏ធំពុំធ្លាប់មាន។

ប្រទេសហ្វីលីពីន និងសហរដ្ឋអាមេរិក បានចាប់ផ្តើមសមយុទ្ធយោធារួមគ្នាទ្រង់ទ្រាយធំបំផុតមិនធ្លាប់មាន នាថ្ងៃទី១១ ខែមេសា ឆ្នាំ២០២៣។

កងទ័ពប្រមាណជិត ១៨ ០០០នាក់ កំពុងចូលរួមក្នុងសមយុទ្ធប្រចាំឆ្នាំមានឈ្មោះជាភាសាហ្វីលីពីនថា បាលីកាតាន់ (Balikatan) ឬ «ស្មាប្រកៀកស្មា» ដោយក៏ នឹងមាននូវការចុះចតឧទ្ធម្ភាគចក្រយោធានៅលើកោះហ្វីលីពីនមួយ ដែលស្ថិតនៅឯភាគខាងជើងនៃកោះលូសុន (Luzon)ផងដែរ។

មេបញ្ជាការកងយន្តហោះចម្បាំងនៃកងម៉ារីនអាមេរិកទីមួយ លោកឧត្តមសេនីយ៍ទោ អេរ៉ិក អូស្ទីន (Eric Austin) បានថ្លែងក្នុងពិធីបើកនាទីក្រុងម៉ានីល យ៉ាងដូច្នេះថា «តាមរយៈសមយុទ្ធនេះ កងកម្លាំងហ្វីលីពីន និងសហរដ្ឋអាមេរិក នឹងពង្រឹងសមត្ថភាពអន្តរប្រតិបត្តិការ បង្កើនជំនាញ និងបំពេញបន្ថែមសមត្ថភាពរបស់យើងតាមរយៈការសហការគ្នា ដោយធានាថាយើងត្រៀមខ្លួនដើម្បីឆ្លើយតបទៅនឹងបញ្ហាប្រឈមក្នុងពិភពពិតជាមួយគ្នា»។

វាជាលើកទីមួយហើយដែលសមយុទ្ធនេះត្រូវបានធ្វើឡើង ក្រោមរដ្ឋបាលរបស់ប្រធានាធិបតី ហ្វឺឌីណាន ម៉ាកូស (Ferdinand Marcos) ដែលបានព្យាយាមពង្រឹងទំនាក់ទំនងជាមួយសហរដ្ឋអាមេរិក បន្ទាប់ពីអតីតប្រធានាធិបតីហ្វីលីពីន លោក រ៉ូឌីហ្គោ ឌូតឺតេ (Rodrigo Duterte) ហាក់បានបំផ្លាញសម្ព័ន្ធភាពនេះ៕

ប្រភពពី AFP ប្រែសម្រួលដោយ៖ សារ៉ាត