ភ្នំពេញ៖ ធនាគារជាតិនៃកម្ពុជា(NBC) និងស្ថាប័នទូទាត់ប្រាក់អន្តរជាតិ ( NPCI) របស់ឥណ្ឌា នឹងធ្វើការរួមគ្នាដើម្បីសិក្សាពីលទ្ធភាពក្នុងការដាក់ឱ្យដំណើរការការផ្ទេរប្រាក់ភ្លាមៗរវាងប្រទេសកម្ពុជានិងប្រទេសឥណ្ឌា ហើយលទ្ធផលនៃកិច្ចសហប្រតិបត្តិការនេះត្រូ​វបានជឿថា នឹងផ្តល់ជាធាតុចូលដ៏សំខាន់សម្រាប់ការទូទាត់ និងការផ្ទេរប្រាក់ឆ្លងដែន។

ការសិក្សាពីលទ្ធភាពក្នុងការដាក់ឱ្យដំណើរការ ការផ្ទេរប្រាក់ភ្លាមៗរវាងប្រទេសទាំងពីរ នឹងត្រូវធ្វើឡើងក្នុងពេលឆាប់ៗនេះ បន្ទាប់ពីស្ថាប័នទាំងពីរ បានចុះអនុស្សរណៈយោគយល់ស្តីពី កិច្ចសហប្រតិបត្តិការលើការទូទាត់ និងការផ្ទេរប្រាក់ឆ្លងដែន រវា​ងគ្នា តាមរយៈប្រព័ន្ធអនឡាញនៅថ្ងៃទី១៧ ខែមីនាឆ្នាំ២០២៣ ក្រោម អធិបតីភាព លោកជំទាវ ជា សិរី ទេសាភិបាលរង ធនាគារជាតិនៃកម្ពុជា និងលោក  រីតេស ស៊ូក្លា(Ritesh Shukla) នាយកប្រតិបត្តិនៃស្ថាប័នទូទាត់ប្រាក់អន្តរជាតិ ។

តាមរយៈសេចក្តីប្រកាសព័ត៌មានរបស់ធនាគារជាតិនៃកម្ពុជាបង្ហាញថាក្រៅពីការជំរុញពីការសិក្សាពីលទ្ធភាពក្នុងការដាក់ឱ្យដំណើរការ កា​រផ្ទេរប្រាក់ភ្លាមៗហើយ អនុស្សរណៈនេះក៏មានគោលបំណងក្នុងការបង្កើតជាក្របខ័ណ្ឌកិច្ចសហប្រតិបត្តិការសម្រាប់ប្រ​ទេ​ស​ទាំងពីរសិក្សា និងពិភាក្សាបន្ថែមលើផ្នែកបច្ចេកទេស ពាណិជ្ជកម្ម ប្រតិបត្តិការ និងផ្នែកផ្សេងៗទៀត ក្នុងការអភិវឌ្ឍការត​ភ្ជា​ប់ និងអន្តរប្រតិបត្តិការជាឌីជីថល គាំទ្រ​ដល់ការទូទាត់ និងការផ្ទេរប្រាក់ឆ្លងដែនរវាងប្រទេសទាំងពីរ។ ការចុះអនុស្សរណៈយោ​គយល់នេះ នឹងផ្តល់អត្ថប្រយោជន៍កាន់តែច្រើនដល់ប្រជាពលរដ្ឋនៃប្រទេសទាំងពីរ ក្នុងការប្រើប្រា​ស់បណ្តាញផ្លូវការស​ម្រា​ប់ធ្វើប្រតិបត្តិការទូទាត់ និងផ្ទេរប្រាក់ឆ្លងដែន ប្រកបដោយសុវត្ថិភាព ងាយស្រួល និងតម្លៃសមរម្យ។

ប្រភពដដែលថា លើសពីនេះការតភ្ជាប់ការទូទាត់ និងផ្ទេរប្រាក់ ឆ្លងដែនខាងលើត្រូវបានរំពឹងថា នឹងក្លាយជាកិច្ចសហប្រតិ​បត្តិការដ៏មានសក្តានុពលមួយ ដើម្បីគាំទ្រ ដល់ការអភិវឌ្ឍទំនាក់ទំនងសេដ្ឋកិច្ចនិងហិរញ្ញវត្ថុ ដែលនឹងរួមចំណែកក្នុងការជំរុញកា​រអភិវឌ្ឍសេដ្ឋកិច្ច ទេសចរណ៍ និងពាណិជ្ជកម្ម សម្រាប់ប្រទេសទាំងពីរនាពេលអនាគត។

បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានឱ្យដឹងនៅថ្ងៃទី​១៨ ខែមេសា ថា កិច្ចសហការរវាងធនាគាជា​តិនៃកម្ពុជា ជាមួយនឹងស្ថាប័នទូទាត់ប្រាក់អន្តរជាតិគឺជា​ដំណឹងដ៏ល្អមួយសម្រាប់វិស័យហិរញ្ញវត្ថុ និងធនាគារនៅកម្ពុជា ដែលរំពឹងថាវានឹងជួយសម្រួល និងចំណេញ សម្រាប់អតិថិជន ក្នុងការទូទាត់ប្រាក់បានយ៉ាងងាយស្រួល​។

​បណ្ឌិត អ៊ិន ចាន់នី បាន​បញ្ជាក់ថា ៖ «ខ្ញុំ​គិត​ថា​វា​ល្អ​ខ្លាំង​ណាស់​សម្រាប់​អាជីវកម្ម​ក៏​ដូច​ជា​អតិថិជន ឬ​អ្នក​ទេសចរ​នៃ​ប្រ​ទេស​ទាំង​ពីរ គឺ​កម្ពុជា និង​ឥណ្ឌា។ វានឹងជួយក្នុងការបង់ប្រាក់ឆ្លងដែនតាមពេលវេលាជាក់ស្តែងជាមួយនឹងការចំណាយទាប ហើយលើសពីនេះ វានឹងជួយបង្កើនទាំងបរិមាណ និងតម្លៃនៃប្រតិបត្តិការ ហើយជាការពិតណាស់ វានឹងជួយជំរុញសេដ្ឋកិច្ចនៃប្រទេសទាំងពីរ និងអ្នកផ្សេងទៀត ដែលជាបណ្តាញទូទាត់»។

ចំណែក លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុនៅកម្ពុជា បានលើកឡើងដែរថា ប្រជាជននៃប្រទេសទាំ​ងពីរ ជាអ្នកដែលទទួលបានផលប្រយោជន៍ច្រើនជាងគេ បន្ទាប់ពីមានកិច្ចសហការរវាងធនាគារជាតិនៃកម្ពុជា និងស្ថា​ប័នទូទាត់ប្រាក់អន្តរជាតិរបស់ឥណ្ឌាននេះ។

លោកបានបន្ថែមថា ការណ៍ដែលធនាគារជាតិនៃកម្ពុជា សិក្សាពីលទ្ធភាពក្នុងការពង្រីកប្រតិបត្តិការភ្ជាប់ទៅប្រទេសផ្សេងៗទៀតនៅលើពិភពលោក នេះគឺនឹងផ្តល់ផលវិជ្ជមានខ្លាំងដល់ប្រជាពលរដ្ឋខ្មែរ ដែលគាត់ត្រូវការធ្វើដំណើរទៅទេសចរណ៍ ការធ្វើ​ពាណិជ្ជកម្មផ្សេងៗ ការទូទាត់ប្រាក់ជាដើម វានឹងផ្តល់ភាពរលូនក្នុងការរវាងប្រទេសនានាលើពិភពលោក។

លោកបានបញ្ជាក់ទៀតថា ៖ «កន្លងមកយើងបានធ្វើហើយ ជាមួយនឹងប្រទេសវៀតណាម និងថៃ ។ដូចនេះនៅពេលយើងប​ន្ថែមការភ្ជាប់ទំនាក់ទំនងលើការទូទាត់ប្រាក់ជាមួយខាងប្រទេសឥណ្ឌាទៀតនោះ វានឹងជាឱកាសដែលផ្តល់ភាពងាយស្រួលប្រ​ជា​ពលរដ្ឋ និងអ្នកប្រើប្រាស់ មិនថាតែនៅក្នុងប្រទេសកម្ពុជាទេ។ នៅពេលដែលប្រជាពលរដ្ឋឥណ្ឌាមកទេសចរណ៍ ឬមកធ្វើពា​ណិជ្ជកម្មនៅកម្ពុជា គឺគាត់អាចទូទាត់បានយ៉ាងងាយស្រួល»។

លោក កាំង តុងងី យល់ថា ក្រៅពីផ្តល់ភាពងាយស្រួលក្នុងការទូទាត់ និងការផ្ទេរប្រាក់ឆ្លងដែន រវាងប្រទេសទាំងពីរហើយ ការចុះ​អនុស្សរណៈនេះ នឹងអនុញ្ញាតឱ្យកម្ពុជា រៀនសូត្របន្ថែមបានពីការប្រើប្រាស់ប្រព័ន្ធបច្ចេកវិទ្យារបស់ឥណ្ឌា ខណៈដែលប្រ​ទេ​សនេះ មានភាពល្បីល្បាញដែរ លើការរីកចំរើននៃប្រព័ន្ធព័ត៌មានវិទ្យានេះ៕

ដោយ៖វណ្ណ សុជាតា