ភ្នំពេញ៖ ក្រុមប្រឹក្សាធម្មនុញ្ញគ្រោងនឹងបញ្ចប់ការកែសម្រួលសៀវភៅជំនួយស្មារតីគ្រូពាក់ព័ន្ធនឹងបទប្បញត្តិនៃគ្រឹះរដ្ឋធម្មនុញ្ញនៅពាក់កណ្តាលខែឧសភា​ខាងមុខនេះ ខណៈក្រុមការងារចំពោះកិច្ច ត្រូវរៀ​ប​ចំ​កែម្រួលចំណុចមួយចំនួនដែលមានភាពជាន់គ្នា និងធ្វើឱ្យដូចទៅនឹងកាំជណ្តើរដើម្បីងាយស្រួ​លដល់លោកគ្រូ អ្នកគ្រូ និងសិស្សានុសិស្សងាយយល់។

ក្នុងកម្មវិធីពិគ្រោះយោបល់សៀវភៅជំនួយស្មារតីគ្រូពាក់ព័ន្ធនឹងបទប្បញត្តិ នៃគ្រឹះរដ្ឋធម្មនុញ្ញ នៅថ្ងៃទី១៨ ខែមេសាឆ្នាំ២០២៣ នា​សាលសន្និសីទនៃក្រុម​ប្រឹក្សាធម្មនុញ្ញឯកឧត្តម ហោ ប៉េង ទីប្រឹក្សាក្រុមប្រឹក្សាធម្មនុញ្ញបាន​លើកឡើងថា ​សៀវភៅនេះសរសេរបានល្អ និងគ្រប់ជ្រុងជ្រោយច្រើន ពិ​សេ​សមានលក្ខណៈទាំងបច្ចេកទេសផ្នែកច្បាប់ និងការស្រាវជ្រាវ។ ការស្រាវជ្រាវចងក្រងសៀវភៅនេះ មានកម្រិតខ្ពស់ ​ពិសេសមានព័ត៌មានមួយចំ​នួនទៀតក៏បង្ហាញពីទិដ្ឋភាពច្បាប់មកពីក្រៅប្រទេស ​ហើយនិងប្រវត្តិសាស្ត្រខ្មែរផងដែរ ដែលទាំងអ​ស់នេះ នឹងអាចជួយបំពេញឱ្យលោកគ្រូ អ្នកគ្រូ យកទៅបង្រៀនបាន ប៉ុន្តែបើយកទៅង្រៀននៅកម្រិតជាសាលាអាចនឹងមានការលំបាកទាំងគ្រូ និងសិស្សក្នុងការចាប់យកតម្លៃរដ្ឋធម្មនុញ្ញ។

ឯកឧត្តម ហោ ប៉េង បានបញ្ជាក់ថា ៖ «ដូច្នេះត្រូវតែមានការបំពេញបន្ថែមទៀត​ឱ្យមានភា​ពសាមញ្ញ និងស្រាលៗ សម្រាប់កម្រិតថ្នាក់ទី១ ដល់ថ្នាក់ទី ១២ មុននឹងបញ្ចូលទៅក្នុងប្រព័ន្ធសិ​ក្សា​ផ្លូវការ»។​

ជាមួយគ្នានេះដែរឯកឧត្តម ព្រហ្ម វិចិត្រអក្ខរា អ្នកនាំពាក្យក្រុមប្រឹក្សាធម្មនុញ្ញ និងជាប្រធានក្រុមកា​រងារចំពោះកិច្ចនៃអគ្គលេខាធិការដ្ឋានក្រុមប្រឹក្សាធម្មនុញ្ញបានលើកឡើងថា សៀវភៅនេះ នឹងក្លា​យជាឧបករណ៍សំខាន់មួយ សម្រាប់ធ្វើការបណ្ដុះបណ្ដាលគ្រូទូទាំងប្រទេស ក្នុងកម្រិតជ្រើសរើ​សតាមភូមិភាគ ហើយឲ្យពួកគាត់ទទួលបានចំណេះដឹងផ្នែកនីតិរដ្ឋធម្មនុញ្ញនេះទាំងបីកម្រិត ដែ​ល​​បានបញ្ជ្រាប និងបញ្ជូនបន្តទៅក្រុមគ្រូបង្គោលដទៃទៀត ដើម្បីបានជ្រួតជ្រាបទូទាំងប្រទេស។

ឯកឧត្តម​បន្តថា ក្នុងដំណាក់កាលកសាងឯកសារគោល សៀវភៅនេះត្បិតត្រូវបានរៀបចំ និងមានការព្រមព្រៀងពីក្រុមការងារចំពោះកិច្ច ប៉ុន្តែធាតុចូលសំខាន់ៗនៅតែបើកចំហរ ហើយនិងធ្វើការកែស​ម្រួល រហូតដល់សប្ដាហ៍ទីមួយ ឬសប្ដាហ៍ទីពីរ នៃខែឧសភា ឆ្នាំ២០២៣ បន្ទាប់មកនឹងធ្វើការប​ណ្ដុះ​បណ្ដាលដល់លោកគ្រូ អ្នកគ្រូផងដែរ។

ដោយឡែក ការពិគ្រោះយោបល់លើកនេះ នឹងប្រមូលធាតុចូលបន្ថែម ដើម្បីឲ្យក្រុមការងារពិចា​រណា​អាចនឹងធ្វើការកែសម្រួល។​

សូមរំឮកផងដែរថា ក្រោមអនុស្សរណៈនៃការយោគយល់គ្នា (MoU) កាលពីឆ្នាំ២០១៩ រវាងក្រុ​មប្រឹក្សាធម្មនុញ្ញ និងក្រសួងអប់រំ យុវជន និងកីឡា ភាគីទាំងពីរបានសម្រេចប្រកាសជាផ្លូវការ ចា​ប់​ផ្តើមអនុវត្តបញ្ចូលខ្លឹមសាររដ្ឋធម្មនុញ្ញ ទៅក្នុងកម្មវិធីសិក្សា។

ខ្លឹមសាររដ្ឋធម្មនុញ្ញមាន ៤០មាត្រា ត្រូវបានបញ្ចូលទៅក្នុងកម្មវិធីសិក្សាទាំងបីកម្រិត ពោលចាប់ពីថ្នាក់ទី១ ដល់ថ្នាក់ទី១២។

អនុស្សរណៈដដែលនេះដែរ​ បានកើតឡើងក្រោយក្រុមប្រឹក្សាធម្មនុញ្ញជួបជាមួយក្រសួងអប់រំ យុវជន និងកីឡា ដើម្បីពិភាក្សាលម្អិតលើនីតិវិធីមួយចំនួន ក្នុងការដាក់បញ្ចូលខ្លឹមសារសំខាន់ៗរប​ស់រដ្ឋធម្មនុញ្ញទៅក្នុងកម្មវិធីអប់រំ កាលពីថ្ងៃទី១០ ខែមិថុនា ឆ្នាំ២០១៩។

ក្រុមប្រឹក្សាធម្មនុញ្ញជាអ្នកផ្តល់ជំនួយបច្ចេកទេសក្នុងការរៀបចំខ្លឹមសារគោល និងខ្លឹមសារមេរៀន ដែលពាក់ព័ន្ធនឹងបទបញ្ញត្តិគ្រឹះរដ្ឋធម្មនុញ្ញ ដែលត្រូវដាក់ក្នុងកម្មវិធីសិក្សាទាំងបីកម្រិត រីឯក្រសួងអប់រំជាអ្នករៀបរៀង និងបោះពុម្ពផ្សាយខ្លឹមសារគោល និងខ្លឹមសារមេរៀនដែលពាក់ព័ន្ធ៕ ដោយ៖គឹម យុត្ថារ៉ូ