ណៃពិដោ៖ ទីក្រុងមួយស្ថិតនៅភាគខាងលិចប្រទេសមីយ៉ាន់ម៉ា បានជួបប្រទះថ្ងៃក្តៅបំផុតក្នុងរយៈពេល ៤៤ឆ្នាំ។ នេះបើយោងតាមនាយកដ្ឋានឧតុនិយម និងជលសាស្ត្រមីយ៉ាន់ម៉ា នៅថ្ងៃទី១៩ ខែមេសា ឆ្នាំ២០២៣។

ទីក្រុង Tamu ក្នុងតំបន់ Sagaing ភាគខាងលិចប្រទេសមីយ៉ាន់ម៉ា បានកត់ត្រាសីតុណ្ហភាពខ្ពស់បំផុតរបស់ខ្លួនក្នុងរយៈពេល ៤៤ឆ្នាំ រហូតដល់ ៤៣.៨អង្សាសេ នៅក្នុងថ្ងៃអង្គារទី១៨ ខែមេសា។ នេះបើយោងតាមការិយាល័យអាកាសធាតុមីយ៉ាន់ម៉ា។

ជំនួយការប្រធាននាយកដ្ឋានឧតុនិយម និងជលសាស្ត្រមីយ៉ាន់ម៉ា លោក Than Naing បានប្រាប់អ្នកយកព័ត៌មានថា ទីក្រុងផ្សេងទៀតក្នុងប្រទេសអាស៊ីអាគ្នេយ៍ ក៏បានទទួលរងនូវសីតុណ្ហភាពកើនឡើងខ្លាំងនៅក្នុងឆ្នាំ២០២៣នេះផងដែរ។

ជំនួយការប្រធាននាយកដ្ឋានឧតុនិយមរូបនេះបន្ថែមថា ខែមេសា និងខែឧសភាឆ្នាំនេះ គឺជាខែដែលមានអាកាសធាតុក្តៅបំផុតនៅក្នុងប្រទេសមីយ៉ាន់ម៉ា ដោយគិតមកទល់ពេលនេះ កង្វះទឹកភ្លៀងក៏ជាមូលហេតុមួយ ដែលជំរុញឱ្យកម្តៅកើនឡើងខ្លាំងនៅក្នុងប្រទេសមីយ៉ាន់ម៉ាផងដែរ៕ ប្រភព៖ ស៊ីនហួរ ប្រែសម្រួលដោយ៖ ឈឹម ទីណា