ភ្នំពេញ៖ ការពង្រឹង និងពង្រីកកិច្ចសហប្រតិបត្តិការពាណិជ្ជកម្មទ្វេភាគីរវាងកម្ពុជា និងតំបន់ស្វយ័តក្វាងស៊ី តាមរយៈវេទិកា ស្តីពី “ការជំរុញពាណិជ្ជកម្ម និងវិនិយោគកម្ពុជា-ចិន(ក្វាងស៊ី)”ត្រូវបានប្រារព្ធ ឡើងកាលពីថ្ងៃទី២២ ខែមេសា ឆ្នាំ២០២៣ ក្រោមអធិបតីភាព ឯកឧត្តម ឈួន ដារ៉ា រដ្ឋមន្ត្រីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងពាណិជ្ជកម្ម តំណាងរបស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និង ឯកឧត្តម ឡាន ធានលី អភិបាលតំបន់ស្វយ័តជនជាតិជាំង ក្វាងស៊ី នៃសាធារណរដ្ឋប្រជាមានិតចិន ។

ក្នុងឱកាសនេះ ឯកឧត្តម ឡាន ធានលី បានលើកឡើងថា ចំណង មិត្តភាពកម្ពុជា-ចិន បានក្លាយជាមិត្តភាពត្បួងពេជ្រ នាឆ្នាំ២០២៣នេះ គឺគម្របខួបទី៦០ នៃកិច្ចទំនាក់ទំនងការទូត និងកិច្ចសហប្រតិបត្តិការរវាងប្រទេសទាំងពីរ។ តាមរយៈកិច្ចសហប្រតិបត្តិការកម្ពុជា-ចិន ក្រោមគម្រោងផ្លូវមួយខ្សែក្រវាត់មួយ ក្នុងការកសាងសហគមន៍ជោគវាសនាតែមួយ និងមានកិច្ចព្រមព្រៀងពាណិជ្ជកម្មកម្ពុជា-ចិន បានជំរុញឱ្យកិច្ចការអភិវឌ្ឍសេដ្ឋកិច្ច ពាណិជ្ជកម្ម វិនិយោគ និងកសិកម្មកាន់តែស៊ីជម្រៅ និងកាន់តែរឹងមាំបន្ថែមទៀត។ ជាក់ស្តែង តំបន់ស្វយ័តក្វាងស៊ី បានធ្វើការទំនាក់ទំនងយ៉ាងជិតស្និទ្ធជាមួយកម្ពុជា ដែលកម្ពុជាបានអញ្ជើញចូលរួមពិព័រណ៍ចិន-អាស៊ាននៅទីក្រុងណានីងជារៀងរាល់ឆ្នាំ។

ថ្លែងក្នុងវេទិកាដ៏មានសារៈសំខាន់នេះ ឯកឧត្តមរដ្ឋមន្ត្រីប្រតិភូអមនាយករដ្ឋមន្រ្តី បានលើកឡើងថា ប្រមុខរាជរដ្ឋាភិបាលកម្ពុជាបានផ្តល់ការលើកទឹកចិត្តដល់ធុរជន និងវិនិយោគិនបរទេស តាមរយៈការអនុគ្រោះពន្ធ និងកិច្ចសម្រួលពាណិជ្ជកម្មឱ្យកាន់តែមានភាពងាយស្រួល និងកាន់តែមានទំនុកចិត្តខ្ពស់។ ជាក់ស្តែង កិច្ចព្រមព្រៀងពាណិជ្ជកម្មសេរីកម្ពុជា-ចិន បានចូលជាធរមានមុនគេបង្អស់សម្រាប់ប្រទេសកម្ពុជា បន្ទាប់មកគឺកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងRCEP ហើយថ្មីៗនេះបានបញ្ចប់ជាផ្លូវការនៃការចរចាកិច្ចព្រមព្រៀមភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម ហើយគ្រោងនឹងចុះហត្ថលេខា នាពេលខាងមុខនេះ។

ឯកឧត្តមរដ្ឋមន្ត្រីប្រតិភូ បានបន្តថា កម្ពុជាបានបង្កើតមជ្ឈមណ្ឌលពាណិជ្ជកម្មឯកជនកម្ពុជានៅសាធារណរដ្ឋប្រជាមានិតចិនចំនួន១០ទីតាំង និងគ្រោងបើកចំនួនប្រាំបន្ថែម ក្រោមការគាំទ្រ និងកិច្ចសហប្រតិបត្តិការល្អរវាងប្រទេសទាំងពីរ។

ឯកឧត្តម បានបញ្ជាក់ជូនសហគ្រាស-ក្រុមហ៊ុនចិនពីខេត្តក្វាងស៊ីដែលអញ្ជើញមកទស្សកិច្ចនៅព្រះរាជាណាចក្រកម្ពុជានាពេលនេះ សូមធ្វើការបណ្តាក់ទុន និងវិនិយោគនៅប្រទេសកម្ពុជា លើការផលិត និងកែច្នែផលិតផលកសិកម្ម ដែលកម្ពុជាមានទីផ្សារនាំចេញទៅសហភាពអឺរ៉ុប បណ្តាប្រទេសនៅក្នុងតំបន់ និងលើពិភពលោក។

ឯកឧត្តម សង្ឃឹមថាការចូលរួមពិព័រណ៍ចិន-អាស៊ាន និងវេទិកាពាណិជ្ជកម្ម និងវិនិយោគ នាខែកញ្ញា នៅទីក្រុងណាននីង ប្រទេសចិន នឹងជួយជំរុញកិច្ចសហប្រតិបត្តិការពាណិជ្ជកម្ម និងវិនិយោគរវាងប្រទេសទាំងពីរបន្ថែមមួយកម្រិតទៀត។

ក្នុងវេទិកានេះដែរ ក៏មានពិធីចុះហត្ថលេខាលើគម្រោងអជីវកម្មរវាងក្រុមហ៊ុនកម្ពុជា-ចិន ចំនួន១១ ទាក់ទងនឹងកិច្ចសហប្រតិបត្តិការលើការជំរុញវិស័យដាំដុះ និងកែច្នៃផលិតផលកសិកម្មផងដែរ៕
អត្ថបទ រូបភាព ង៉ាន់ ទិត្យ