កម្ពុជា-ជប៉ុន រំលឹកខួបអនុស្សាវរីយ៍លើកទី៧០ នៃទំនាក់ទំនងការទូត
ព្រះសីហនុ៖ កម្ពុជា-ជប៉ុន រំលឹកខួបអនុស្សាវរីយ៍លើកទី៧០ នៃទំនាក់ទំនងការទូតនៃប្រទេសទាំងពីរ (១៩៥៣-២០២៣) ខណៈឆ្នាំ ២០២៣ នេះកិច្ចសហប្រតិបត្តិការនៃប្រទេសទាំងពីរឈានដល់ «ភាពជាដៃគូយុទ្ធសាស្រ្តគ្រប់ជ្រុងជ្រោយ»។
នាពិធីបើកការដ្ឋានសាងសង់ចំណតផែកុងតឺន័រនៅខេត្តព្រះសីហនុ និងខួបអនុស្សាវរីយ៍លើកទី៧០ នៃទំនាក់ទំនងការទូតរវាងកម្ពុជា និងជប៉ុននាថ្ងៃទី១ ខែឧសភា ឆ្នាំ២០២៣ លោក អូអិណុ អាត់ស៊ូស៊ី ឯកអគ្គរាជទូតវិសាមញ្ញនិងពេញសមត្ថភាពជប៉ុនប្រចាំកម្ពុជា ថ្លែងថា ក្រោមកិច្ចព្រមព្រៀងរវាងនាយករដ្ឋមន្ត្រីជប៉ុ និងនាយករដ្ឋមន្ត្រីកម្ពុជា កាលពីខែ វិច្ឆិកាឆ្នាំមុន ទំនាក់ទំនងនៃប្រទេសទាំងពីរ បានដំឡើងដល់ «ភាពជាដៃគូយុទ្ធសាស្ត្រ គ្រប់ជ្រុងជ្រោយ»។
លោក អូអិណុ អាត់ស៊ូស៊ី មានប្រសាសន៍ថា ៖ «លើសពីនេះទៅទៀត កាលពីខែមីនាឆ្នាំនេះ នាយករដ្ឋមន្ត្រីជប៉ុន បានប្រកាសពីផែនការថ្មី គឺ ឥណ្ឌូប៉ាស៊ីហ្វិកសេរី និងបើកចំហរ ដែលកម្ពុជាជាប្រទេសដំបូងគេនៅក្នុងតំបន់អាស៊ានបានគាំទ្រគម្រោងនេះ»។
លោកបន្តថា ផែនការថ្មីនេះ នឹងតភ្ជាប់តំបន់ជាស្នូលនៃកិច្ចសហប្រតិបត្តិការ ឥណ្ឌូប៉ាស៊ីហ្វិកសេរី និងបើកចំហរ ដែលតាមទស្សនៈនេះ ការអភិវឌ្ឍន៍កំពង់ផែក្រុងព្រះសីហនុ នឹងរួមចំណែកដល់សន្តិភាព និងវិបុលភាព នៅក្នុងតំបន់ឥណ្ឌូប៉ាស៊ីហ្វិក ទាំងមូល។
ក្នុងឱកាសនោះដែរឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏បានថ្លែងដែរថា ជាមួយនឹងកិច្ចសហប្រតិបត្តិការយ៉ាងល្អប្រសើរតាំងពីដើមរៀងមក ឆ្នាំ២០២៣នេះ គឺជាខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូតរវាងកម្ពុជា-ជប៉ុន (១៩៥៣-២០២៣)។
ឯកឧត្តមបញ្ជាក់ថា ៖ «តាមរយៈទំនាក់ទំនងការទូត និងមិត្តភាពដ៏រឹងមាំនេះ បានជំរុញ និងប្រែក្លាយចំណងការទូតរវាងប្រទេសទាំងពីរទៅជាភាពជាដៃគូយុទ្ធសាស្រ្តគ្រប់ជ្រុងជ្រោយ នៅក្នុងឆ្នាំ២០២៣នេះ ដែលនឹងផ្តល់នូវផ្លែផ្កាដល់ការអភិវឌ្ឍសេដ្ឋកិច្ច-សង្គមយ៉ាងច្រើនដល់ ប្រជាជននៃប្រទេសទាំងពីរ។
ក្នុងឱកាសប្រារព្ធខួបលើកទី៧០ នៃចំណងការទូតកម្ពុជា-ជប៉ុននេះដែរសម្ដេចតេជោ ហ៊ុន សែន នាយករដ្ឋមន្ត្រីកម្ពុជាថ្លែងឡើងដែរថា ជប៉ុនជាមិត្តដ៏សំខាន់មួយរបស់កម្ពុជា ដែលតែងតែបានផ្ដល់ការគាំទ្រ តាមរយៈឥណទាន សម្បទាន និងហិរញ្ញប្បទានឥតសំណង ព្រមទាំងជំនួយបច្ចេកទេសជាច្រើនសន្ធឹកសន្ធាប់ដល់ការអភិវឌ្ឍនៅកម្ពុជា។
សម្ដេចតេជោបានបន្តថា ក្នុងនោះរួមមាន៖ ការអភិវឌ្ឍហេដ្ឋារចនាសម្ព័ន្ធ និងគ្រប់គ្រងកំពង់ផែ, ការអភិវឌ្ឍហេដ្ឋារចនាសម្ព័ន្ធដឹកជញ្ជូន និងការគ្រប់គ្រងប្រព័ន្ធចមោះទឹកកខ្វក់, ការសិក្សាគម្រោងហេដ្ឋារចនាសម្ព័ន្ធផ្លូវ-ស្ពានសំខាន់ៗ និងការរៀបចំផែនការមេប្រព័ន្ធភស្តុភារកម្មនៅកម្ពុជា។
សម្ដេចតេជោ ហ៊ុន មានប្រសាសន៍សង្កត់ធ្ងន់ថា ៖ «នេះសបញ្ជាក់ថា ជប៉ុននៅតែជាដៃគូមិនអាចខ្វះបានរបស់កម្ពុជាទាំងក្នុងអតីតកាល បច្ចុប្បន្នកាល និងបន្តទៅអនាគតកាលផងដែរ»។
បើតាមសម្ដេចតេជោ ហ៊ុន សែន ក្នុងទិវារំលឹកខួបអនុស្សាវរីយ៍លើកទី៧០ នៃទំនាក់ទំនងការទូតនៃប្រទេសកម្ពុជា-ជប៉ុនឆ្នាំនេះ អតីតឯកអគ្គរដ្ឋទូតជប៉ុន និងបច្ចុប្បន្នជាប្រធានសមាគមមិត្តភាពកម្ពុជា-ជប៉ុន លោក តាកាហាស៊ី ហ្វ៊ូមីអាគី (Takahashi Fumaiki) នឹងនាំយកកាំជ្រួចជប៉ុនមកកាន់កម្ពុជា និងស្នើឱ្យមានការបាញ់កាំជ្រួចជប៉ុននេះ ចំនួនបីដង នៅមុខព្រះបរមរាជវាំងនៅក្នុងខែវិច្ឆិកា ឆ្នាំ២០២៣ ដើម្បីឱ្យពលរដ្ឋកម្សាន្តរីករាយ៕
ដោយ៖គឹម យុត្ថារ៉ូ
