កម្ពុជា និងក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC) ពង្រឹងការឆ្លើយតបនឹងការប្រែប្រួលអាកាសធាតុ
ភ្នំពេញ ៖ ឯកឧត្តម អ៊ាងសុផល្លែត រដ្ឋលេខាធិការ តំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានទទួលជួបពិភាក្សាការងារជាមួយ លោកសាស្រ្តាចារ្យ JIM SKEA បេក្ខជននៃចក្រភពអង់គ្លេសឈរឈ្មោះបោះឆ្នោតជ្រើសរើសប្រធានក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC) នៅទីស្តីការក្រសួងបរិស្ថាន នាព្រឹកថ្ងៃចន្ទ ទី០១ ខែឧសភា ឆ្នាំ២០២៣។
ក្នុងឱកាសនោះ ឯកឧត្តម អ៊ាង សុផល្លែត បានបញ្ជាក់ថា កម្ពុជាបានកំណត់គោលដៅច្បាស់លាស់ សម្រាប់អព្យាក្រឹតភាពកាបូននៅឆ្នាំ ២០៥០ដោយបានដាក់ចេញនូវយុទ្ធសាស្ត្រអភិវឌ្ឍន៍រយ:ពេលវែងប្រកបដោយអព្យាក្រឹតកាបូន និងរបាយការណ៍បច្ចុប្បន្នភាពស្តីពីការចូលរួមចំណែករបស់ជាតិក្នុងការអនុវត្តអនុសញ្ញាក្របខ័ណ្ឌសហប្រជាជាតិស្តីការប្រែប្រួលអាកាសធាតុ។ ប្រការនេះបញ្ជាក់អំពីសក្ខីភាពមួយ ដែលកម្ពុជាបានប្តេជ្ញាចិត្តដ៏រឹងមាំ សង្គតិភាព និងមានឆន្ទៈនយោបាយខ្ពស់ ក្នុងការដោះស្រាយការប្រែប្រួលអាកាសធាតុ។ ឯកឧត្តម បានលើកឡើងគំនិតផ្តួចផ្តើមលើកិច្ចសហការបណ្តុះបណ្តាលធនធានមនុស្សតាមរយ:ការផ្តល់ឱកាសចូលបម្រើការងារ និងធ្វើកម្មសិក្សានៅ IPCC ដល់មន្ត្រីរាជការវ័យក្មេង និងយុវជនកម្ពុជា ដែលជាអនាគតអ្នកដឹកនាំប្រទេសស្របតាម ការប្តេជ្ញាចិត្តរបស់ខ្លួន ក្នុងការចូលរួមចំណែកយ៉ាងសកម្ម ជាមួយសហគមន៍អន្តរជាតិ ក្នុងការដោះស្រាយបញ្ហាប្រឈមនានាដែលបណ្តាលមកពីការប្រែប្រួលអាកាសធាតុ។ លើសពីនេះទៀត ឯកឧត្តមក៏បានស្នើសុំIPCC ចែករំលែកនូវរបកគំហើញថ្មីៗពីការស្រាវជ្រាវរបស់ខ្លួនដល់កម្ពុជាផងដែរ។
ក្នុងឱកាសជួបពិភាក្សានោះ លោកសាស្រ្តាចារ្យ JIM SKEA បានថ្លែងអំណរគុណនិងកោតសរសើរចំពោះកិច្ចខិតខំប្រឹងប្រែងរបស់កម្ពុជា ក្នុងការដោះស្រាយបញ្ហាប្រែប្រួលអាកាសធាតុ និងការលើកកម្ពស់ការគ្រប់គ្រងបរិស្ថាន បានល្អប្រសើរ។ លោកសាស្រ្តាចារ្យ បានគាំទ្រពីការពង្រឹងនិងពង្រីកកិច្ចសហប្រតិបត្តិការរវាង IPCC នឹងរាជរដ្ឋាភិបាលកម្ពុជា ជាពិសេស លើគំនិតផ្តួចផ្តើមរបស់ឯកឧត្តមរដ្ឋលេខាធិការលើការបណ្តុះណ្តាលធនធានមនុស្ស ដើម្បីពង្រឹងការឆ្លើយតបនឹងការប្រែប្រួលអាកាសធាតុ។
ជាការឆ្លើយតប ឯកឧត្តម អ៊ាង សុផល្លែត បានថ្លែងអំណរគុណIPCC ចំពោះចំណាប់អារម្មណ៍ សម្រាប់ការសហការជាមួយកម្ពុជា ជាពិសេស លើការបណ្តុះបណ្តាលធនធានមនុស្ស ដើម្បីឆ្លើយតបនឹងការប្រែប្រួលអាកាសធាតុ ដែលជាបញ្ហាសកល និងគ្រប់គ្នាទាំងអស់ ត្រូវចូលរួមសហការគ្នា។
ជាមួយគ្នានេះដែរ ឯកឧត្តមក៏បានរំលេចអំពីសកម្មភាពសំខាន់នានា ដែលកម្ពុជាបាននឹងកំពុងអនុវត្ត ដើម្បីអភិវឌ្ឍន៍ប្រទេសឆ្ពោះទៅរកភាពបៃតង ភាពធន់ និងប្រកបដោយចីរភាព៕ ដោយ / គ្រី សម្បត្តិ
