បណ្តុំអាជីវកម្មទុរេនសំឡូត កំពុងសិក្សាបន្ថែមទៀតលើបច្ចេកទេសដាំដុះទុរេនសំឡូត ដើម្បីបំពេញតម្រូវការពីភាគីចិន
ភ្នំពេញ៖ ក្រុមបណ្តុំអាជីវកម្មទុរេនសំឡូត ខេត្តបាត់ដំបង បាននិងកំពុងប្រឹងប្រែងបង្កើនបច្ចេកទេសក្នុងការដាំដុះរបស់ខ្លួន ទៅតាមការណែនាំពីក្រសួង និងមន្ទីរកសិកម្ម បន្ទាប់ពីវិនិយោគិនចិនជាច្រើនក្រុមហ៊ុន បានជួបនិងចចារចង់ប្រមូលទិញទុរេនសំឡូត សម្រាប់នាំចេញទៅកាន់ប្រទេសចិន នាពេលខាងមុខ។
លោក ណៃ ចន ប្រធានបណ្តុំអាជីវកម្មទុរេនសំឡូត ខេត្តបាត់ដំបង បានឱ្យដឹងនៅថ្ងៃទី៩ ខែឧសភា ឆ្នាំ២០២៣ថា បណ្តុំអាជីវកម្មទុរេនសំឡូតបានជួបជាមួយនឹងក្រុមហ៊ុនច្រើនគួរសមដែរ ដែលក្រុមហ៊ុនទាំងនោះ មានបំណងចង់នាំចូលទុរេនរបស់ស្រុកសំឡូតទាំងមូល ទៅលក់នៅទីផ្សារប្រទេសខ្លួន ប៉ុន្តែនៅមានឧបសគ្គខ្លះលើបរិមាណផ្គត់ផ្គង់ ដោយភាគីចិន បារម្ភខ្លាចខាងស្រុកសំឡូតផ្គត់ផ្គង់ មិនបានតាមកិច្ចសន្យា។
លោក ណៃ ចន បានបញ្ជាក់ថា ខាងបណ្តុំអាជីវកម្មទុរេនសំឡូង និងខាងមន្ទីរកសិកម្មខេត្តបាត់ដំបង តែងតែពិភាក្សាគ្នាជាច្រើនដងទាក់ទងនឹងការនាំចេញទុរេនទៅចិននេះ ដោយកន្លងទៅចិន តែងសួរយើងថា តើយើងអាចផ្គត់ផ្គង់ទុរេនឱ្យគេក្នុងមួយឆ្នាំបានប៉ុន្មាន គេតម្រូវឱ្យយើងផ្តល់ទិន្នន័យលម្អិតឱ្យគេ ប៉ុន្តែយើងមានការព្រួយបារម្ភថា បើសិនជាយើងចុះកិច្ចសន្យាហើយ យើងមិនអាចផ្គត់ផ្គង់ឱ្យគេបានតាមកិច្ចសន្យា ដែលនេះហើយជាបញ្ហា។
លោកបានបន្ថែមថា កាលពីពាក់កណ្តាលឆ្នាំ ២០២២ ខាងមន្ទីរកសិកម្មខេត្តបាត់ដំបង បាននាំខាងឈ្មួញជនជាតិថៃ និងចិន ចុះដល់ចម្ការទុរេន ក្នុងបណ្តុំអាជីវកម្មទុរេនក្នុងឃុំសំឡូត ក្នុងគោលបំណងនាំចេញទុរេនទៅកាន់ប្រទេសចិន តាមរយៈទីផ្សារប្រទេសថៃ។ ក្រុមហ៊ុនចិននេះ មានការពេញចិត្តយ៉ាងចំពោះរសជាតិ និងគុណភាពទុរេនសំឡូត។
លោក ណៃ ចន បានបន្តថា ៖ «ចំពោះរសជាតិ និងគុណភាព យើងអាចធានាបានថា ទុរេនយើងមានគុណភាពល្អ ឆ្ងាញ់ ថែមទាំងមានការបញ្ជាក់ពីក្រសួងកសិកម្មទៀតផង ប៉ុន្តែចំពោះបរិមាណផ្គត់ផ្គង់ និងភូតគាមអនាម័យ គេទាមទារឱ្យយើងធ្វើឱ្យបានល្អប្រសើរជាង ដែលនេះវាទាមទារឱ្យមានការចំណាយដើមទុនច្រើន»។
បើតាមលោក ណៃ ចន បណ្តុំអាជីវកម្មទុរេនសំឡូត នៅក្នុងឃុំសំឡូតនេះ មានសមាជិកជាម្ចាស់ចំការចំនួនជិត២០ចម្ការ ដោយការប្រមូលផលក្នុងមួយឆ្នាំ ចន្លោះ៣០០ ទៅ៤០០តោន។
ជាមួយគ្នានេះដែរ លោក ហេង សិទ្ធិ មន្រ្តីនៃមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានប្រាប់ឱ្យដឹងដែរថា ក្រសួង និងមន្ទីរកសិកម្ម មានភារកិច្ចក្នុងការជួយរកទីផ្សារឱ្យកសិករ និងណែនាំឈ្មួញ ពីផលិតផលទុរេនសំឡូតនេះ។ លោកបន្តថា ដោយឡែកចំពោះការចចារ ដែលនឹងឈានដល់ការនាំចេញ គឺវាអាស្រ័យទៅលើសហគមន៍ និងឈ្មួញ។
ចំពោះការដាំដុះទុរេនសំឡូតវិញ លោកបានប្រាប់ថា នៅខេត្តបាត់ដំបង មានតែស្រុកសំឡូតមួយប៉ុណ្ណោះ ដែលមានការដាំដុះទុរេន ដោយបច្ចុប្បន្នផ្ទៃដីដាំដុះទុរេនមានចំនួន៥៤៦ហិកតា ខណៈដែលផ្ទៃដីប្រមូលមានចំនួន៤១៧ហិកតា ដោយក្នុងមួយហិកតាអាចប្រមូលបានជាង១២តោន។
លោក ហេង សិទ្ធិ បានថ្លែងថា ៖ «ការប្រមូលទុនរេនជារៀងរាល់ឆ្នាំ មានបរិមាណជាង៥០០០តោន។ ចំពោះតម្លៃវិញចន្លោះ១៣ ០០០ រៀលទៅ ១៥ ០០០ រៀល សម្រាប់ទុរេនដឹកចេញចម្ការទៅតាមប្រភេទទុរេននីមួយ។ ទុរេនពូជម៉ាន់ថងទឹកគោថ្លៃជាងគេ តែមិនសូវសម្បូរនោះទេ។ នៅដើមឆ្នាំនេះ ទុរេនមិនទាន់សម្បូរនៅឡើយទេ ទាល់ចុងខែ៦ ឬដើមខែ៧ ទើបសម្បូរច្រើន»។
ក្រសួងកសិកម្ម រុក្ខាប្រមាញ់ និងនេសាទ ធ្លាប់បានលើកឡើងថា មកទល់ពេលបច្ចុប្បន្ននេះ ប្រទេសកម្ពុជាពុំទាន់មានទីផ្សារនៅក្រៅប្រទេសនៅឡើយទេ ជាពិសេសប្រទេសចិន ដែលកម្ពុជាពុំទាន់បានឈានទៅដល់ដំណាក់កាលនៃការចរចារបើករបាំងភូតគាមអនាម័យនៅឡើយទេ។
ម្យ៉ាងវិញទៀត ផលិតផលទុរេនរបស់កម្ពុជា នៅមានកម្រិតនៅឡើយ ម្យ៉ាងវិញទៀតនៅមានផលិតផលកសិកម្មជាច្រើនមុខទៀតរបស់កម្ពុជានៅរង់ចាំបន្តកន្ទុយគ្នាដើម្បីរងចាំការអនុញ្ញាត ពីភាគីចិន ហើយខាងចិន អនុញ្ញាតឲ្យកម្ពុជាលើកយកផលិតផលកសិកម្មម្តងមួយមុខៗយកមកពិនិត្យ ទន្ទឹមនឹងនោះ ក៏ត្រូវរង់ចាំមើលបរិមាណនៃការផលិតនៅក្នុងស្រុកមានការកើនឡើងក្នុងកម្រិតណាដែរ៕ ដោយ៖វណ្ណ សុជាតា
