ភ្នំពេញ៖ ក្នុងទិវាប្រកបដោយសិរីមង្គលដ៏មហោឡារិក នៃព្រះរាជពិធី បុណ្យ ចម្រើនព្រះជន្ម ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទី គោរពសក្ការៈដ៏ខ្ពង់ខ្ពស់បំផុតគម្រប់ព្រះជន្ម ៧០ យាងចូល ៧១ ព្រះវស្សានា ឆ្នាំនេះ គណៈកម្មាធិការជាតិរៀបចំបុណ្យជាតិ-អន្តរជាតិ ដែលដឹកនាំដោយ ឯកឧត្តម ឈិន កេតនា ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍និងជាអគ្គលេខាធិការនៃគណៈកម្មាធិការជាតិរៀបចំបុណ្យជាតិ-អន្តរជាតិតំណាងរដ្ឋបាលខណ្ឌដូនពេញជួបសំណេះ សំណាលជាមួយប្រជាពលរដ្ឋដែលអញ្ជើញមកពីសង្កាត់ចំនួន ១១ ក្នុងខណ្ឌដូនពេញ រាជធានីភ្នំពេញប្រមាណជាង ២០០ នាក់។

ក្នុងឱកាសនេះឯកឧត្តមបានសាកសួរសុខទុក្ខព្រមទាំងនាំយកនូវអំណោយនិងថវិកាមួយចំនួនរបស់អន្តរក្រសួងមកចែកជូនដល់បងប្អូនប្រជាពលរដ្ឋក្នុងមូលដ្ឋាន ជាពិសេសដើម្បីអបអរសាទរនិងថ្វាយ ព្រះសព្វសាធុការពរ បវរមហាប្រសើរ ថ្វាយព្រះករុណា ព្រះមហាក្សត្រ នៃព្រះរាជាណាចក្រកម្ពុជាជាទីគោរព សក្ការៈ ដ៏ខ្ពង់ខ្ពស់ បំផុត។

ឯកឧត្តម ឈិន កេតនា មានប្រសាសន៍បន្តថា ជារៀងរាល់ឆ្នាំ រាជរដ្ឋាភិបាលនៃព្រះរាជាណាចក្រកម្ពុជា រួមជាមួយព្រះរាជ វង្សានុវង្សថ្នាក់ដឹកនាំមន្ត្រីរាជការគ្រប់ក្រសួង រដ្ឋលេខាធិការដ្ឋាន ស្ថាប័ននិងរដ្ឋបាលរាជធានី-ខេត្ត ព្រមទាំងប្រជារាស្ត្រទូទាំង ប្រទេសតែងតែរៀបចំព្រះរាជពិធីបុណ្យចម្រើនព្រះជន្ម ថ្វាយ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈ ដ៏ខ្ពង់ខ្ពស់បំផុត ស្របតាមព្រះរាជប្បវេណីពីបុរាណដ៏ថ្កើនថ្កាន និងបានថ្វាយព្រះរាជពិធីបុណ្យចម្រើនព្រះជន្មគឺជាអាយុវឌ្ឍនមង្គលមួយដ៏ប្រសើរថ្លៃថ្លាដែលប្រារព្ធឡើងដើម្បីសំដែងនូវកត្តញ្ញូចំពោះព្រះមហាករុណាទិគុណរបស់ព្រះមហាក្សត្រដើម្បីថ្វាយព្រះពរសព្វសាធុការនិងថ្វាយព្រះរាជកុសលចំពោះព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុតដើម្បីបានគង់ប្រថាប់នៅក្នុងព្រះបរមសិរីរាជ្យសម្បត្តិ និងជាម្លប់ដ៏ត្រជាក់ត្រជុំរបស់ប្រជានុរាស្រ្ដយូរអង្វែងតរៀងទៅ ។

សូមបញ្ជាក់ជូនថាអំណោយនិងថវិកាមួយចំនួនរបស់អន្តរក្រសួងដែលត្រូវបានចែកជូនដល់ប្រជាពលរដ្ឋក្នុងឱកាសនេះមាន មី ទឹកដោះគោ ស្ករស ត្រីខកំប៉ុង នំក្រៀម សារុង ក្រមា និងថវិកាមួយចំនួនផងដែរ៕
អត្ថបទ៖ ង៉ាន់ ទិត្យ រូបភាព រិន រចនា