ភ្នំពេញ៖គិតត្រឹមថ្ងៃទី១៣ ខែឧសភា ឆ្នាំ២០២៣ គណៈកម្មាធិការជាតិរៀបចំការបោះឆ្នោត (គ.ជ.ប) បា​នសម្រេចទទួលស្គាល់ជាផ្លូវការនូវ​អ្នកសង្កេតការណ៍​ជាតិជាង ១៥ ០០០ នាក់ មកពីអង្គការស​មាគមចំនួនប្រាំ។

គ.ជ.ប​ ក៏​​កំពុងបន្តពិនិត្យពាក្យសុំចុះឈ្មោះអ្នកសង្កេតការណ៍ជាតិ និងភ្ញៀវពិសេស​ដើម្បីសម្រេចចំនួនជាង ១ពាន់​នាក់ទៀត​ សម្រាប់ចូលរួមសង្កេតមើលដំណើរការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។​

យោងតាមសេចក្តីប្រកាសព័ត៌មានរបស់ គ.ជ.ប ចុះថ្ងៃទី១៣ ខែឧសភា ឆ្នាំ ២០២៣​ បាន​ឱ្យដឹងថា សម្រាប់​អ្នកសង្កេ​តការណ៍ជាតិដែល គ.ជ.ប បានសម្រេចទទួលស្គាល់ជាផ្លូវការ មកពីអង្គការចំនួន ៥ សរុបចំនួន ១៥ ១៦៩ នាក់។  អ្នក​ទាំងនោះ មកពី សហភាពសហព័ន្ធយុវជនកម្ពុជា, គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល), អង្គការសហព័ន្ធសិទ្ធិមនុស្ស និងអភិវឌ្ឍន៍កម្ពុជា,ស មា គមនារីកម្ពុជាដើម្បីសន្តិភាព និងអភិវឌ្ឍន៍ និងអង្គការមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ​

សេចក្តីប្រកាសព័ត៌មានដដែលបន្តថា ​គ.ជ.ប ក៏កំពុងពិនិត្យ អង្គការសមាគមចំនួនប្រាំទៀត​ផងដែរ ដែល​មាន​ចំនួន ១ ១៥៧ នាក់ ដែលពួកគេមកពី​​ សហភាពសហព័ន្ធយុវជនកម្ពុជា សម្រាប់ខេត្តប៉ៃលិន, សមាគមមិត្តយើង, អង្គការដើម្បីអភិវឌ្ឍន៍ និងការពារធនធានធម្មជាតិ, សមាគមនារីកម្ពុជាដើម្បីសន្តិភាព និងអភិវឌ្ឍន៍សម្រាប់ខេត្តព្រះសីហនុ និងសមាគមរាជសីហ៍។

ខណៈ​ភ្ញៀវពិ​សេស ចំនួនមួយ​ផងដែរ គឺ​សមាគមកុមារជ័យនៅប្រទេសបារាំង (KOMAR CHEY ASSOCIATION in France) ចំនួនពីរនាក់​​។​​

បើតាម គ.ជ.ប ការដាក់ និងការទទួលពាក្យសុំចុះឈ្មោះអ្នកសង្កេតការណ៍ជាតិបានប្រព្រឹត្តទៅពីថ្ងៃទី១ ខែមេសា ដល់ថ្ងៃទី១២ ខែកក្កដា ឆ្នាំ២០២៣ និងអ្នកសង្កេតការណ៍អន្តរជាតិ ចាប់ពីថ្ងៃទី១ ខែមេសា ដល់ថ្ងៃទី១៩ ខែកក្កដា ឆ្នាំ២០២៣។​​

លោក ខន កែវមនោ អ្នកនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប) បានប្រា​ប់​ឱ្យដឹងនៅថ្ងៃទី១៤ ខែឧសភា​ ​ថា ការចូលរួមរបស់អ្នកសង្កេតការណ៍បោះឆ្នោតមានសារៈសំខាន់ណាស់​ ដើម្បីវាយតម្លៃ​ការបោះឆ្នោតប្រកបដោយសេរី ត្រឹមត្រូវ យុត្តិធម៌ និងតម្លាភាព។​

លោកបាន​ឱ្យដឹងថា ៖ «​អ្នកសង្កេតការណ៍បោះឆ្នោតត្រូវបំពេញតួនាទី ប្រក​បដោ​យឯករាជ្យ អព្យា​ក្រឹត ឥតលម្អៀង ក្នុងការចូលរួមសង្កេតមើលការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ ខណៈគិតត្រឹម ថ្ងៃទី១៣ ខែឧសភា ឆ្នាំ២០២៣ គ.ជ.ប បានទទួលស្គាល់អ្នកស​ង្កេតការណ៍បោះឆ្នោតជាផ្លូវការ ជាង ១ ម៉ឹន ប្រាំពាន់នាក់ហើយ»។​

ជាមួយគ្នានេះដែរ លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែល ក៏បាន​ឱ្យដឹងដែរថា អង្គការរបស់លោក​បានដាក់អ្នកសង្កេតការណ៍ ស្ទើរតែគ្រប់ដំណាក់កា​ល​នៃការបោះឆ្នោត ដែលរៀបចំដោយ​គ.ជ.ប រហូតមក ហើយក៏បានបន្តចូលរួមសង្កេតការណ៍ស ម្រាប់ការបោះឆ្នោត ជ្រើសតាំងតំណាងរាស្ត្រនីតិកាលទី​៧ នៅពេលខាងមុខនេះដែរ។ ​

លោកបាន​បន្តថា ៖ «ក្នុងដំណើការបោះឆ្នោតនៅពេលខាងមុខនេះ អង្គការខុមហ្វ្រែលបានដាក់អ្ន​កសង្កេតការណ៍​នៅគ្រប់ ២៥ រាជធានីខេត្ត ប៉ុន្តែ​ទំហំបុណ្ណានោះ គឺមិនទាន់បានពិភាក្សានៅឡើ​យទេ អាស្រ័យទៅលើការចូលរួមរបស់ប្រជាពលរដ្ឋ»។

ទោះជាយ៉ាងណា នៅក្នុងផែនការ ​អង្គការខុមហ្វ្រែល  មានបំណងដាក់​អ្នកសង្កេតការណ៍ឱ្យបានច្រើន នៅតាមការិយាល័យបោះឆ្នោត៕

ដោយ៖គឹម យុត្ថារ៉ូ