ក្រុមគ្រូពេទ្យស្ម័គ្រចិត្ត ហ៊ុន ម៉ានី ពិនិត្យ និងព្យាបាលប្រជាជន ជាងប្រាំពាន់នាក់ នៅសៀមរាប
សៀមរាប៖ក្រុមគ្រូពេទ្យស្ម័គ្រចិត្ត ហ៊ុន ម៉ានី បានចុះទៅពិនិត្យព្យាបាលប្រជាជននៅ ស្រុកប្រាសាទបាគងខេត្តសៀមរាបដោយឥតគិតថ្លៃ ព្រមទាំងបានធ្វើការបណ្ដុះបណ្ដាលពីវគ្គសង្គ្រោះបឋមនិងផ្សព្វផ្សាយយុទ្ធនាការចាក់វ៉ាក់សាំងកូវីដ ១៩ វិធានការសុខាភិបាល ចែកម៉ាស់ និងអាល់កុលផងដែរ។
ការចុះពិនិត្យ ព្យាបាល និងបណ្តុះបណ្តាលដល់ប្រជាជនពីក្រុមការងារគ្រូពេទ្យស្ម័គ្រចិត្ត ហ៊ុន ម៉ានីនេះ ធ្វើឡើងដោយមានការសហការជាមួយមន្ទីរសុខាភិបាលខេត្តសៀមរាប មន្ទីរពេទ្យកុមារអង្គរស.ស.យ.ក ខេត្តសៀមរាបនិងអាជ្ញាធរពាក់ព័ន្ធ កាលពីថ្ងៃទី១៤ ខែឧសភា ឆ្នាំ២០២៣។
លោក លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ហ៊ុន ម៉ានី និងជារដ្ឋលេខាធិការក្រសួងផែនការបានឱ្យដឹងថា ក្រុមគ្រូពេទ្យស្ម័គ្រចិត្តចំនួន ៤៥៦ នាក់ បានចុះទៅពិនិត្យ និងព្យាបាលប្រជាជនចំនួន ៥ ៧៣៩ នាក់ នៅក្នុងវិទ្យាល័យ ហ៊ុន សែន ប្រាសាទបាគង ភូមិឱឡោក ឃុំបាគង ស្រុកប្រាសាទបាគង ខេត្តសៀមរាប។
ជាមួយគ្នានោះ ក្រុមគ្រូពេទ្យបានពិនិត្យ និងព្យាបាលជំងឺកុមារចំនួន ៥១៣នាក់ ជំងឺស្ដ្រី១៣៨នាក់ ជំងឺផ្លូវចិត្ត៤២នាក់ ជំងឺឫសដូងបាត៧៣នាក់ ជំងឺសន្លាក់ឆ្អឹង១៩៨នាក់ ជំងឺផ្លូវដង្ហើម៣៤៦នាក់ និងជំងឺទឹកនោមផ្អែមចំនួន២១៥នាក់។
ក្រុមគ្រូពេទ្យក៏បានពិនិត្យអេកូសាស្ត្រដល់ស្ដ្រីចំនួន១០៧នាក់ វាស់និងពិគ្រោះជំងឺបេះដូងចំនួន៩៤នាក់ ពិនិត្យព្យាបាលត្រចៀក ច្រមុះ បំពង់ក ដល់ប្រជាជន ១២៧នាក់ វះកាត់តូច៦៩នាក់ វិភាគឈាម១១៧២នាក់ ជំងឺទូទៅមនុស្សចាស់១៣៧៦នាក់ ពិនិត្យព្យាបាលផ្នែកប្រព័ន្ធប្រសាទនិងបំបាត់ការឈឺចុកចាប់៤៩នាក់ បណ្ដុះបណ្ដាលវគ្គសង្គ្រោះបឋម១៥៦នាក់ ពិនិត្យជំងឺភ្នែកនិងចែកវែនតា៩៨៦នាក់ និងពិនិត្យសុខភាពមាត់ធ្មេញដល់ប្រជាជនចំនួន៧៨នាក់។
លោក លេង ផាលី បានបញ្ជាក់ថា ៖ «ក្រៅពីការពិនិត្យ និងព្យាបាលជំងឺដល់ប្រជាជន ក្រុមគ្រូពេទ្យស្ម័គ្រចិត្តហ៊ុន ម៉ានី ក៏បានចែកឱសថ ម៉ាស់ អាល់កុល និងវែនតា ដល់ប្រជាជនផងដែរ»។
លោកបានបន្តថាការចុះពិនិត្យ និងព្យាបាលជំងឺជូនប្រជាពលរដ្ឋ និងយុទ្ធនាការចាក់វ៉ាក់សាំងបង្ការកូវីដ១៩ ក្នុងក្របខណ្ឌទូទាំងប្រទេសជាមួយរាជរដ្ឋាភិបាល ជាស្មារតីមនុស្សធម៌សុទ្ធសាធដែលស្តែងចេញពីសេចក្តីស្រឡាញ់ បងប្អូនប្រជាពលរដ្ឋក្នុងនាមជាឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយអនាគតតែមួយ។
សូមជម្រាបដែរថា ក្នុងរយៈពេល១១ឆ្នាំ (០២ ធ្នូ ឆ្នាំ២០១២ ដល់ ១៤ ឧសភា ឆ្នាំ២០២៣) ក្រោមការដឹកនាំដោយផ្ទាល់ និងការចង្អុលបង្ហាញជាប្រចាំរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក្រុមការងារគ្រូពេទ្យស្ម័គ្រចិត្តហ៊ុន ម៉ានី បានចូលរួមអប់រំផ្សព្វផ្សាយចាក់វ៉ាក់សាំងបង្កាកូវីដ១៩ក្នុងក្របខ័ណ្ឌទូទាំងប្រទេស សង្គ្រោះបឋម យកសំណាករកវីរុសកូវីដ១៩ និងពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃក្នុង២៥រាជធានី-ខេត្តបានចំនួន ១០៣១លើក។
គិតត្រឹមថ្ងៃទី១៤ ខែឧសភា ឆ្នាំ២០២៣ ក្រុមគ្រូពេទ្យស្ម័គ្រចិត្ត ហ៊ុន ម៉ានី បានព្យាបាលជំងឺជូនប្រជាពលរដ្ឋបានចំនួន១១,៧១២,៤៦០នាក់៕
ដោយ៖ទិត្យ រានុពិចិត្រ
