អង្គការសុខភាពពិភពលោក មិនអញ្ជើញតៃវ៉ាន់ឱ្យចូលរួមសន្និបាតប្រចាំឆ្នាំរបស់ខ្លួន
អន្តរជាតិ៖ អង្គការសុខភាពពិភពលោក (WHO) កាលពីថ្ងៃចន្ទ បានសម្រេចកាត់វត្តមានតៃវ៉ាន់ចេញពីសន្និបាតប្រចាំឆ្នាំរបស់ខ្លួនដែលរៀបចំឡើងពីចន្លោះថ្ងៃទី២១-៣០ ឧសភា ដោយការមិនអញ្ជើញកោះនេះឱ្យចូលរួមបន្ទាប់ពីមានការជំទាស់ពីប្រទេសចិន។
ការសម្រេចនេះ ធ្វើឡើងបន្ទាប់ពីមានការពិភាក្សាកាលពីថ្ងៃអាទិត្យលើសំណើសុំចូលសន្និបាតរបស់តៃវ៉ាន់ក្នុងនាមជាអ្នកសង្កេតការណ៍ ទោះបីជាមានការគាំទ្រនាពេលកន្លងមកពីប្រទេសធំៗដែលជាសម្ព័ន្ធមិត្តរបស់តៃវ៉ាន់ ដូចជាចក្រភពអង់គ្លេស សហរដ្ឋអាមេរិក អូស្ត្រាលី បារាំង ជប៉ុន លីទុយអានី កាណាដា សាធារណរដ្ឋឆេក និងអាល្លឺម៉ង់ក៏ដោយ។
តៃវ៉ាន់បានរិះគន់ការសម្រេចចិត្តរបស់ WHO កាលពីថ្ងៃចន្ទ ហើយនិយាយថា វាជា «ទង្វើគួរឱ្យស្អប់ខ្ពើម» របស់ចិន ក្នុងការរារាំងវត្តមានតៃវ៉ាន់នៅក្នុងស្ថាប័នពិភពលោកដ៏ធំនេះ ហើយថាទីក្រុងប៉េកាំងគ្មានសិទ្ធិនិយាយក្នុងនាមកោះនោះទេ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ក្រសួងការបរទេសតៃវាន់និយាយថា ៖ «មានតែរដ្ឋាភិបាលដែលជាប់ឆ្នោតតាមបែបប្រជាធិបតេយ្យរបស់តៃវ៉ាន់ប៉ុណ្ណោះ ដែលអាចតំណាងឱ្យប្រជាជន ២៣ លាននាក់របស់តៃវ៉ាន់នៅអង្គការសុខភាពពិភពលោក និងអង្គការអន្តរជាតិផ្សេងទៀត និងអាចការពារសុខភាព និងសិទ្ធិមនុស្សរបស់ប្រជាជនតៃវ៉ាន់»។
ចិនឯណោះវិញ បានស្វាគមន៍ចំពោះការសម្រេចចិត្តរបស់ WHO ដោយក្រសួងការបរទេសចិននិយាយក្នុងសេចក្ដីថ្លែងការណ៍កាលពីថ្ងៃចន្ទថា ៖ «នេះបង្ហាញយ៉ាងពេញលេញថា គោលការណ៍ចិនតែមួយ គឺជាសេចក្តីប្រាថ្នារបស់ប្រជាជន ហើយមិនអាចត្រូវបានបំបាក់តាមមធ្យោបាយណាមួយឡើយ»។
ក្រសួងបានបន្តថា មុនពេលបើកសន្និបាត ប្រទេសជិត ១០០ បានសម្តែងការប្រកាន់ខ្ជាប់នូវគោលការណ៍ចិនតែមួយ និងការប្រឆាំងរបស់ពួកគេចំពោះវត្តមានរបស់តៃវ៉ាន់នៅក្នុងសន្និបាតអង្គការសុខភាពពិភពលោក តាមរយៈលិខិតពិសេសទៅកាន់ WHO និងសេចក្តីថ្លែងការណ៍។
មិនត្រឹមតែប៉ុណ្ណេះ ក្រសួងបន្តថា ៖ «ចិនក៏ជំរុញឱ្យប្រទេសមួយចំនួនកុំធ្វើពុតជាច្រឡំ ឈប់យកបញ្ហាសុខាភិបាលធ្វើនយោបាយ ឈប់ជ្រៀតជ្រែកកិច្ចការផ្ទៃក្នុងរបស់ចិន ក្រោមលេសបញ្ហាតៃវ៉ាន់ និងបញ្ឈប់ការប្រើតៃវ៉ាន់ដើម្បីគ្រប់គ្រងចិន»។
គួរបញ្ជាក់ថា ក្រុងប៉េកាំង បានទទូចចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន និងត្រូវគ្រប់គ្រងដោយចិនក្រោមគោលនយោបាយចិនតែមួយ ដែលជាលទ្ធផលធ្វើឱ្យតៃវ៉ាន់រងការដកចេញពីស្ថាប័នអង្គការអន្តរជាតិជាច្រើន។ កន្លងមក ចិន និងសម្ព័ន្ធមិត្តប៉ាគីស្ថាន បានជំរុញសមាជិកផ្សេងទៀតឱ្យប្រឆាំងនឹងវត្តមានរបស់តៃវ៉ាន់ក្នុងសន្និបាតប្រចាំឆ្នាំ WHO ខណៈប្រទេសអ៊ីស្វាទីនី (ស្វាស៊ីឡង់) និងកោះម៉ាសាល់ អំពាវនាវផ្ទុយពីនេះ។
តៃវ៉ាន់ ដែលទទូចបដិសេធការទាមទាររបស់ចិន ត្រូវបានអនុញ្ញាតឱ្យចូលរួមកិច្ចប្រជុំបច្ចេកទេសមួយចំនួនរបស់ WHO ប៉ុន្តែបាននិយាយថា ការដកវត្តមានរបស់ខ្លួនចេញពី WHO នាពេលនេះ បានរារាំងកិច្ចខិតខំប្រឹងប្រែងដើម្បីប្រយុទ្ធប្រឆាំងនឹងជំងឺរាតត្បាតកូវីដ១៩។
ក្រសួងការបរទេសតៃវ៉ាន់បានបន្ថែមថា ការចូលរួមរបស់ខ្លួនជាមួយ WHO គឺជាបញ្ហាសុខភាពសាធារណៈពិភពលោក។ ក្រសួងដដែលនេះបន្តថា៖ «នយោបាយមិនគួរមានអាទិភាពលើវិជ្ជាជីវៈនោះទេ។ វាមិនត្រឹមតែមិនស្មើភាពគ្នា និងអយុត្តិធម៌ក្នុងការរារាំងតៃវ៉ាន់ក្រោមសម្ពាធនយោបាយរបស់ចិនប៉ុណ្ណោះទេ ប៉ុន្តែថែមទាំងបង្កការគំរាមកំហែងយ៉ាងធ្ងន់ធ្ងរដល់សុខភាពសាធារណៈពិភពលោកផងដែរ»។
កោះតៃវ៉ាន់ត្រូវបានដកចេញពី WHO ក្នុងឆ្នាំ ១៩៧២ ពោលគឺមួយឆ្នាំបន្ទាប់ពីបាត់បង់អាសនៈនៅអង្គការសហប្រជាជាតិទៅសាធារណរដ្ឋប្រជាមានិតចិន។កោះនេះអាចចូលរួមកិច្ចប្រជុំប្រចាំឆ្នាំកំពូលរបស់ WHO ចន្លោះឆ្នាំ ២០០៩ និង ២០០៦ ក្នុងនាមជាអ្នកសង្កេតការណ៍។ ប៉ុន្តែក្រោយមកត្រូវបានចិនរារាំង ពេលទំនាក់ទំនងរវាងរដ្ឋាភិបាលទាំងពីរកាន់តែធ្លាក់ចុះខ្លាំង៕
ដោយ៖ហួន ឌីណា
ប្រភព៖ Taiwan excluded from WHO annual assembly following Chinese opposition
Outcry as World Health Organization locks out Taiwan under pressure from China
