សហភាពអឺរ៉ុបអះអាងពីការបញ្ជូនគ្រាប់កាំភ្លើងធំជាង ពីរសែនគ្រាប់ទៅឱ្យអ៊ុយក្រែន
អឺរ៉ុប៖ប្រធានគោលនយោបាយការបរទេសសហភាពអឺរ៉ុប លោក Josep Borrell បាននិយាយកាលពីថ្ងៃអង្គារទី ២៣ ខែឧសភា ថា បណ្តាប្រទេសសហភាពអឺរ៉ុបបានផ្តល់គ្រាប់កាំភ្លើងធំចំនួន ២២០ ០០០ គ្រាប់ទៅដល់អ៊ុយក្រែន ក្រោមផែនការបង្កើនការផ្គត់ផ្គង់គ្រាប់រំសេវដល់ទីក្រុងកៀវ ដើម្បីប្រយុទ្ធប្រឆាំងនឹងការឈ្លានពានរបស់រុស្ស៊ី។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
លោក Borrell បាននិយាយថា ប្លុកក៏បានផ្តល់ឱ្យនូវមីស៊ីលចំនួន ១ ៣០០ គ្រាប់ផងដែរ ក្រោមផែនការនេះ ហើយកំពុងស្ថិតនៅលើផ្លូវឆ្ពោះទៅរកគោលដៅនៃការផ្គត់ផ្គង់គ្រាប់រំសេវចំនួន ១ លានគ្រាប់/ឆ្នាំ ទោះបីជាប្រទេស EU មួយចំនួនជៀសវាងការយល់ព្រមលើគោលដៅបែបនេះក៏ដោយ។
លោក Borrell អះអាងយ៉ាងដូច្នេះប្រាប់អ្នកយកព័ត៌មាន នៅពេលលោកប្រកាសអំពីតួលេខនៃគ្រាប់កាំភ្លើងធំដែលត្រូវបញ្ជូនទៅអ៊ុយក្រែន នៅចុងបញ្ចប់នៃកិច្ចប្រជុំរដ្ឋមន្ត្រីការពារជាតិរបស់សហភាពអឺរ៉ុបនៅទីក្រុងប្រ៊ុចសែល។ លោកបន្តថា៖ «នៅថ្ងៃ សប្តាហ៍ និងខែបន្ទាប់ នឹងមានការសម្រេចចិត្តជាយុទ្ធសាស្រ្តនៅក្នុងសង្រ្គាមនៅអ៊ុយក្រែន»។
គួររំឭកថា រដ្ឋាភិបាលសហភាពអឺរ៉ុបបានយល់ព្រមលើផែនការផ្គត់ផ្គង់គ្រាប់រំសេវកាលពីខែមីនា បន្ទាប់ពីទីក្រុងកៀវបានព្រមានថា ខ្លួនកំពុងត្រូវការគ្រាប់កាំភ្លើងធំយ៉ាងខ្លាំង ខណៈសង្រ្គាមឈ្លានពានរបស់អ៊ុយក្រែននៅបន្តតានតឹង ដែលត្រូវការគ្រាប់បាញ់រាប់ពាន់ក្នុង១ថ្ងៃៗ។
ផែនការរបស់ EU ដែលមានតម្លៃយ៉ាងតិច ២ ប៊ីលានអឺរ៉ូនេះ បង្ហាញពីជំហានដំបូងដែលប្លុកចូលរួមKjna ក្នុងការផ្តល់មូលនិធិទិញអាវុធរួមគ្នាទ្រង់ទ្រាយធំ និងឆ្លុះបញ្ចាំងពីរបៀបដែលប្លុកកាន់តែពាក់ព័ន្ធខ្លាំងទៅៗលើកិច្ចការយោធាក្នុងសង្រ្គាម ចាប់តាំងពីរុស្ស៊ីចូលឈ្លានពានអ៊ុយក្រែននៅចុងខែកុម្ភៈឆ្នាំមុន។
កន្លងមក រុស្ស៊ីបានចោទប្រកាន់លោកខាងលិច រួមទាំងប្លុកអឺរ៉ុប និងជាពិសេសប្លុកណាតូ ថាពាក់ព័ន្ធក្នុងជម្លោះដោយផ្ទាល់ តាមរយៈផ្ដល់ជំនួយសព្វាវុធឱ្យអ៊ុយក្រែន រាប់តាំងពីអាវុធធន់ស្រាល រហូតដល់អាវុធធន់ធ្ងន់ទំនើបៗ រួមទាំងមីស៊ីលរយៈចម្ងាយឆ្ងាយ។ រុស្ស៊ីអះអាងថា ការផ្ដល់អាវុធឱ្យអ៊ុយក្រែនធ្វើឱ្យសង្រ្គាមកាន់តែអូសបន្លាយ និងមិនមែនធ្វើឱ្យទិសដៅសង្រ្គាមរបស់ខ្លួនបត់ក្បាលនោះទេ។ លោកខាងលិច និងអ៊ុយក្រែន ដែលកំពុងទទូចសុំយន្តហោះចម្បាំងពីសម្ព័ន្ធមិត្តវិញ បានច្រានចោលការលើកឡើងបែបនេះរបស់វិមានក្រឹមឡាំង ដោយអះអាងពីតម្រូវការអាវុធដើម្បីបណ្ដេញកងទ័ពរុស្ស៊ី និងរំដោះទឹកដីរបស់ខ្លួនមកវិញ៕
ប្រែសម្រួល៖ហួន ឌីណា ប្រភព៖ EU says it’s sent 220,000 artillery shells to Ukraine
