ទីក្រុងញូវយ៉ក កំពុងប្រឈមការបំពុលបរិយាកាសអាក្រក់បំផុតក្នុងពិភពលោក ដែលបង្កមកពីភ្លើងឆេះព្រៃនៅកាណាដា
អាមេរិក៖រូបសំណាកសេរីភាពនៅទីក្រុងញូវយ៉កនៃសហរដ្ឋអាមេរិក កំពុងត្រូវបានគ្របដណ្តប់ដោយអ័ព្ទ និងផ្សែងដែលបណ្តាលមកពីភ្លើងឆេះព្រៃនៅប្រទេសកាណាដា។ អ័ព្ទពណ៌ទឹកក្រូច និងផ្សែងខ្មួរខ្មាញ់ពីប្រទេសកាណាដាបានបក់មកផ្នែកខ្លះនៃភាគខាងកើតសហរដ្ឋអាមេរិក។ កាលពីថ្ងៃពុធ ក្រុមមន្ត្រីបានព្រមានដល់ប្រជាជននៅក្នុងប្រទេសទាំងពីរ អំពីផលប៉ះពាល់នៃខ្យល់អាកាសមិនល្អ ឬខ្យល់គ្រោះថ្នាក់។
ប្រជាជនជាង ៥៥ លាននាក់នៅភាគខាងកើតនៃសហរដ្ឋអាមេរិកស្ថិតនៅក្រោមការក្រើនរំឮកអំពីគុណភាពខ្យល់ដោយសារតែផ្សែង។ ផ្សែងដ៏ខ្មួរខ្មាញ់បំផុតនេះត្រូវបានគេព្យាករថានឹងបន្តជះឥទ្ធិពលដល់ភាគឦសានសហរដ្ឋអាមេរិក ដោយឆ្លងកាត់អាត្លង់ទិកកណ្តាល និងចុះទៅដល់រដ្ឋ Carolina។ ហើយលក្ខខណ្ឌផ្សែងនៅក្នុងតំបន់ទាំងនោះ នឹងបន្តយ៉ាងហោចណាស់ត្រឹមថ្ងៃព្រហស្បតិ៍។
ញូវយ៉កបានក្លាយជាទីក្រុងមានខ្យល់បំពុលបំផុតនៅលើពិភពលោករួចទៅហើយកាលពីយប់ថ្ងៃអង្គារ នេះបើយោងតាមក្រុមហ៊ុន IQAir ដែលជាក្រុមហ៊ុនបច្ចេកវិទ្យាតាមដានគុណភាពខ្យល់ និងការបំពុលជុំវិញពិភពលោក។ កម្រិតនៃការបំពុលនៅក្នុងទីក្រុងត្រូវបានគេចាត់ទុកថាស្ថិតក្នុងកម្រិត «ប៉ះពាល់សុខភាព»។
ចំណែកឯរាជធានី Ottawa របស់ប្រទេសកាណាដា កំពុងរងការប៉ះពាល់ជាទម្ងន់ដោយគុណភាពខ្យល់ដ៏អាក្រក់បំផុត នេះដូចគ្នាបើយោងតាមគេហទំព័រ AirNow.gov។ ប្រទេសកាណាដា ទំនងមានប្រវត្តិភ្លើងឆេះព្រៃដ៏អាក្រក់បំផុតមិនធ្លាប់មាន ប្រសិនបើអត្រានៃការឆេះនេះនៅតែបន្តក្នុងល្បឿនបែបនេះ។
មន្ត្រីរដ្ឋាភិបាលរបស់ប្រទេសកាណាដា បាននិយាយថា រហូតមកដល់ពេលនេះផ្ទៃដីប្រមាណ ៣,៣ លានហិកតា បានឆេះខ្ទិចខ្ចី។ ខណៈភ្លើង ៤១៣ តំបន់ទៀតកំពុងឆាបឆេះ ហើយប្រជាជនកាណាដាចំនួន ២៦,០០០ នាក់ត្រូវបានបង្ខំឱ្យជម្លៀសចេញពីផ្ទះរបស់ពួកគេ។
បើយោងតាម ភ្នាក់ងារពន្លត់អគ្គិភ័យ បានឱ្យដឹងថា នៅភាគខាងកើតប្រទេសកាណាដា កេបិច (Quebec) ត្រូវបានរងផលប៉ះពាល់ខ្លាំងជាងគេបំផុតដោយភ្លើងឆេះព្រៃ គិតត្រឹមរសៀលថ្ងៃអង្គារ។
មន្ត្រីក្នុងតំបន់កេបិច បាននិយាយថាអ្នកស្រុកនៅក្នុងតំបន់ខ្លះត្រូវបានណែនាំឱ្យបិទបង្អួច និងទ្វាររបស់ពួកគេ។
ដោយឡែកនៅក្នុងសន្និសីទសារព័ត៌មានមួយកាលពីថ្ងៃចន្ទ នាយករដ្ឋមន្ត្រីកាណាដា លោក Justin Trudeau បាននិយាយថា លោកកំពុងទាក់ទងជាមួយមន្ត្រីក្នុងតំបន់ទូទាំងប្រទេសកាណាដាអំពីអគ្គិភ័យ។ លោក Trudeau បានបន្តថា៖ «នេះគឺជាពេលវេលាដ៏គួរឱ្យតក់ស្លុតសម្រាប់មនុស្សជាច្រើន»៕
ប្រែសម្រួល៖ ស្រ៊ុន សិរីវឌ្ឍនៈ
