វ៉ាស៊ីងតោម ឌីស៊ី៖ លោក Trump និយាយថា លោកត្រូវបានចោទប្រកាន់ នៅក្នុងការស៊ើបអង្កេត ករណីការចាត់ចែងឯកសារសម្ងាត់។ អតីតប្រធានាធិបតីអាមេរិក លោក ដូណាល់ ត្រាំ និយាយថា លោក ត្រូវបានចោទប្រកាន់នៅក្នុងការស៊ើបអង្កេតរបស់សហព័ន្ធ ជុំវិញការចាត់ចែងឯកសារសម្ងាត់ បន្ទាប់ពីចាកចេញពីតំណែង។

លោក Trump សរសេរនៅលើវេទិកា Truth Social របស់លោកថា “រដ្ឋបាល Biden ដែលពុករលួយបានជូនដំណឹងដល់មេធាវីរបស់ខ្ញុំថា ខ្ញុំត្រូវបានចោទប្រកាន់ ហាក់ដូចជាមានកំហុស លើ ពាក្យចចាមអារ៉ាមមិនពិត” ។ យ៉ាងណាមិញ មិនមានការបញ្ជាក់ភ្លាមៗ ពីក្រសួងយុត្តិធម៌ទេ។

លោក Trump ដែលកំពុងឈរឈ្មោះជាប្រធានាធិបតីម្តងទៀតបាននិយាយថា លោកត្រូវបានកោះហៅទៅកាន់តុលាការសហព័ន្ធ កាលពីថ្ងៃអង្គារ សប្តាហ៍នេះ នៅទីក្រុង Miami ។ លោកបានសរសេរថា “ខ្ញុំមិនដែលគិតថាវាអាចទៅរួចទេដែលរឿងបែបនេះអាចកើតឡើងចំពោះអតីតប្រធានាធិបតីសហរដ្ឋអាមេរិក”។

ការប្រកាសរបស់លោក Trump បានកើតឡើងមួយថ្ងៃ បន្ទាប់ពីប្រព័ន្ធផ្សព្វផ្សាយអាមេរិកបាននិយាយថា រដ្ឋអាជ្ញាសហព័ន្ធបានជូនដំណឹងដល់មេធាវីរបស់អតីតប្រធានាធិបតីថា លោកគឺជាគោលដៅនៃការស៊ើបអង្កេត លើការដោះស្រាយឯកសារសម្ងាត់។

លោកគឺជាអតីតប្រធានាធិបតី ឬ ជាអតីតប្រធានាធិបតីដំបូងគេហើយ ដែលត្រូវបានចោទប្រកាន់ពីបទឧក្រិដ្ឋមួយ នៅមុនថ្ងៃបោះឆ្នោត ក្នុងករណីលោកបានផ្អាកការបង់ប្រាក់ទៅឱ្យតារាអាសអាភាសដែលនាងនិយាយថា នាងមានទំនាក់ទំនងស្នេហាជាមួយលោក។ ការចោទប្រកាន់នោះត្រូវបានធ្វើឡើង កាលពីខែមីនា៕ ប្រភពពី AFP ប្រែសម្រួល៖ សារ៉ាត