ហ្សាការតា៖ ប្រទេសឥណ្ឌូនេស៊ីកាលពីថ្ងៃទី១៤ ខែមិថុនា ឆ្នាំ២០២៣ បានបញ្ជាក់ថា ខ្លួនបានទិញយន្តហោះចម្បាំងប្រភេទ Mirage 2000-5 ចំនួន ១២ គ្រឿង ដែលជាយន្តហោះចម្បាំងធ្លាប់ត្រូវបានប្រើប្រាស់ដោយប្រទេសកាតាម្ដងរួចមកហើយ។ កិច្ចព្រមព្រៀងទិញលក់នេះ ​មាន​តម្លៃ​ជិត ៨០០ លាន​ដុល្លារ​អាមេរិក ហើយធ្វើឡើងក្នុង​គោលបំណង​បង្កើន​កម្លាំង​ទ័ព​អាកាស​របស់​ប្រទេសឱ្យកាន់តែខ្លាំង។ ប៉ុន្តែ សមាជិក​សភាឥណ្ឌូនេស៊ី​មួយចំនួនបាន​រិះគន់​ការ​ទិញ​នេះ ដោយ​លើក​ហេតុផល​ថា យន្តហោះ​ចម្បាំងទាំង​នោះ​មានសភាពចាស់​ពេក។

ក្រសួងការពារជាតិឥណ្ឌូនេស៊ីបានលើកឡើងនៅក្នុងសេចក្តីថ្លែងការណ៍មួយថា កាលពីខែមករា ប្រទេសឥណ្ឌូនេស៊ីបានចុះហត្ថលេខាលើកិច្ចព្រមព្រៀងទិញលក់ក្នុងតម្លៃប្រមាណជា ៧៩២ លានដុល្លារអាមេរិក ជាមួយអង្គភាពមួយឈ្មោះថា Excalibur International ដែលជាអង្គភាពរបស់ក្រុមហ៊ុនយោធារដ្ឋឆែកមួយឈ្មោះថា Czechoslovak Group (CSG)។ យន្តហោះទាំង ១២ គ្រឿងនោះនឹងត្រូវបានដឹកជញ្ជូនទៅដល់ប្រទេសឥណ្ឌូនេស៊ីក្នុងរយៈពេល ២៤ ខែ រាប់ចាប់ពីថ្ងៃដែលកិច្ចព្រមព្រៀងនេះត្រូវបានចុះហត្ថលេខា។

កិច្ចព្រមព្រៀងទិញលក់យន្តហោះចម្បាំងនេះផងដែរ មានយន្តហោះចំនួន ៩ គ្រឿងជាយន្តហោះប្រភេទកៅអីមួយ និង ៣ គ្រឿងទៀតប្រភេទកៅអីពីរ នេះបើយោងតាមការរាយការណ៍កាលពីថ្ងៃពុធដោយប្រព័ន្ធផ្សព្វផ្សាយឥណ្ឌូនេស៊ី ដោយបានដកស្រង់សម្តីសមាជិកសភាដែលបានសាកសួរ និងដាក់ការសង្ស័យជុំវិញបញ្ហានេះ។

ជាក់ស្ដែង កាសែតក្នុងស្រុកមួយឈ្មោះថា Kompas បានដកស្រង់សម្តីសមាជិកសភាម្នាក់ឈ្មោះថា លោក ទូបាហ្គូស ហាសានូឌិន (Tubagus Hasanuddin) ថា «តើអ្វីជាមូលហេតុដ៏បន្ទាន់ពិតប្រាកដ ដែលនាំឱ្យយើងត្រូវសម្រេចចិត្តទិញយន្តហោះចម្បាំងមួយទឹក និងមានសភាពចាស់បែបនេះ?» យោងតាមគេហទំព័រ Dassault Aviation ដែលជាក្រុមហ៊ុនផលិតយន្តប្រភេទនេះបានឱ្យដឹងថា យន្តហោះចម្បាំងម៉ូឌែលនេះត្រូវបានដាក់ឱ្យដំណើរការជាលើកដំបូងក្នុងឆ្នាំ១៩៦៧។

យ៉ាងណាក៏ដោយ ក្រសួងការពារជាតិឥណ្ឌូនេស៊ី ​មិន​បាន​បញ្ជាក់អំពី​​អាយុ​នៃ​យន្តហោះ​ទាំងនោះទេ ប៉ុន្តែក្រសួងបានរំលេចថា ពួកគេនឹងទទួលបានសេវាកម្មថែទាំរយៈពេលបីឆ្នាំ និងការបណ្តុះបណ្តាលអ្នកបើកបរផងដែរ។ លោក អេដវិន អាឌ្រាន ស៊ូម៉ានថា (Edwin Adrian Sumantha) អ្នកនាំពាក្យក្រសួងការពារជាតិ បានបញ្ជាក់បន្ថែមនៅក្នុងសេចក្តីថ្លែងការណ៍មួយថា «ប្រទេសឥណ្ឌូនេស៊ីត្រូវការយន្តហោះចម្បាំងដែលអាចដឹកជញ្ជូនមកដល់បានលឿនរហ័ស ដើម្បីបង្ការបញ្ហាមិនបានត្រៀមខ្លួនរួចរាល់នៅក្នុងជួរកងនាវារបស់កងទ័ពអាកាសឥណ្ឌូនេស៊ី»។

គួរដឹងដែរថា ប្រទេសនេះមានគោលបំណងធ្វើទំនើបកម្មកងយន្តហោះចាស់ៗរបស់ខ្លួន ដែលបច្ចុប្បន្នបានទិញចូលយន្តហោះប្រភេទ F-16 ដែលផលិតដោយសហរដ្ឋអាមេរិក និងយន្តហោះចម្បាំងរុស្ស៊ីប្រភេទ Sukhoi Su-27 និង Su-30។ ក្រសួងបានបញ្ជាក់ថា ការជំនួសយន្តហោះចម្បាំងប្រភេទ F-5 Tiger ដោយយន្តហោះប្រភេទ Su-35 ត្រូវបានពន្យារពេល ដោយសារការដាក់ទណ្ឌកម្មរបស់សហរដ្ឋអាមេរិកទៅលើប្រទេសរុស្ស៊ី។

បន្ថែមលើនេះ ឥណ្ឌូនេស៊ី​បាន​ប្រកាស​ពី​គម្រោង​ទិញ​យន្តហោះ​ចម្បាំងប្រភេទ Su-35 ចំនួន ១១ គ្រឿង​ពី​រុស្ស៊ីកាលពី​ឆ្នាំ២០១៧ ហើយបានមានបំណងចង់​ទូទាត់​ថ្លៃយន្តហោះជា​សាច់ប្រាក់ និង​ទំនិញ​របស់ឥណ្ឌូនេស៊ីទៀតផង។ ម៉្យាងវិញទៀត កាលពីខែកុម្ភៈ ឥណ្ឌូនេស៊ីបានចុះហត្ថលេខាលើកិច្ចព្រមព្រៀងទិញយន្តហោះចម្បាំងប្រភេទ Rafale ចំនួន ៤២ គ្រឿងក្នុងតម្លៃ ៨,១ ប៊ីលានដុល្លារ។

លើសពីនេះ គម្រោងទិញយន្តហោះចម្បាំងប្រភេទ F-15 ដែលកំពុងស្ថិតក្នុងដំណាក់កាលចរចា កំពុងរង់ចាំការសម្រេចជាលើកចុងក្រោយពីសំណាក់រដ្ឋាភិបាល នេះបើយោងតាមការបញ្ជាក់ដោយរដ្ឋមន្ត្រីការពារជាតិ លោក ប្រាបូវ៉ូ ស៊ូប៊ានតូ (Prabowo Subianto) កាលពីឆ្នាំមុន៕

ប្រែសម្រួលដោយ៖ ធា សុណា

ប្រភពព័ត៌មាន៖ Channel NewsAsia Indonesia confirms buying used fighter jets for US$800 million after deal criticized