សៀមរាប៖​ រដ្ឋមន្រ្តីក្រសួងសុខាភិបាលឯកឧត្តម​ ម៉ម ប៊ុនហេង បានឱ្យដឹងថា គិតមកដល់ពេលនេះ ដំណើរការសាងស​ង់អគារពេទ្យថ្មីនៃមន្ទីរពេទ្យបង្អែកខេត្តសៀមរាបសម្រេចបាន៨០ភាគរយហើយ ខណៈមន្ទីពេទ្យដែលមា​នបំពាក់ដោយបរិក្ខាពេទ្យទំនើបៗនេះគ្រោងនឹងបញ្ចប់ការសាងសង់នៅចុងខែកញ្ញា​ផងដែរ។​

មានប្រសាសន៍ក្នុង​ឱកាសចុះ​ពិនិត្យមើលមន្ទីរពេទ្យ និង​ដំណើរការសាងសង់អគារពេទ្យមន្ទីរពេទ្យបង្អែកខេត្តសៀម​រាបកាលថ្ងៃទី​១៨ ខែមិថុនា​ ឯកឧត្តមរដ្ឋមន្រ្តីបានឱ្យដឹងថា ដំណើរការសាងសង់អគារពេទ្យ​មន្ទីរពេទ្យបង្អែកខេត្តសៀ​មរាប ដែលជាជំនួយរបស់ជប៉ុន មកដល់ពេលនេះសាងសង់បាន៨០ភាគរយ ហើយគ្រោងបញ្ចប់នៅចុ​ងខែកញ្ញាខាងមុខ​។​ការពង្រីកអគារនេះឆ្លើយតបទៅនឹង​តម្រូវការប្រជាពលរដ្ឋ និងភ្ញៀវទេ​សចរជាតិនិងអន្តរជាតិជាច្រើន ហើយការសាងសង់អគារមន្ទីរពេទ្យ​ជាជំនួយរបស់ប្រទេសជប៉ុន​ និ​ងកា​របំពាក់បរិក្ខាពេទ្យទំនើបៗ និងមានសារៈសំខាន់ណាស់ ដើម្បីពង្រីកសេវាឱ្យកាន់តែល្អប្រសើរ។​

​ឯកឧត្តមមានប្រសាសន៍ថាគោលដៅរបស់រាជរដ្ឋាភិបាល ការពង្រីកអគារនេះ គឺស្របទៅតាមតម្រូវការរបស់ប្រជាពលរដ្ឋ និងធ្វើឱ្យការផ្តល់សេវាសុខាភិបាលនៅក្នុងតំបន់កាន់​តែល្អប្រសើរ ។មានទំនើបកម្មនៃសេវា​សុខាភិបាល។នៅពេលអគារនេះសាងសង់ហើយ​នឹងបំពាក់បរិក្ខាពេទ្យទំនើបៗរួចរាល់នៅឆ្នាំ២០​២​៣ មន្ទីរពេទ្យបង្អែកខេត្តសៀមរាបនេះ នឹងក្លាយជាមន្ទីរពេទ្យទំនើបមួយនៅក្នុងតំបន់។​

បើតាមក្រសួងសុខាភិបាល បានឱ្យដឹងថា ការសាងសង់អគារថ្មី នៃមន្ទីរពេទ្យខេត្តសៀមរាប ស្ថិតក្រោមគ​ម្រោងធ្វើឱ្យប្រសើរឡើងមន្ទីរពេទ្យបង្អែកខេត្តសៀមរាប ដែលជាជំនួយឥតសំណងរបស់រដ្ឋាភិបាល និងប្រ​ជា​ជននៃប្រទេសជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ជូនរាជរដ្ឋាភិបាល និងប្រជាជន​កម្ពុជា។

ក្រសួងបានបញ្ជាក់ថា គម្រោងសាងសង់មន្ទីរពេទ្យបង្អែកថ្មីខេត្តសៀមរាបនេះ ​មានតម្លៃប្រមាណ ១៩លាន​ដុល្លារអាមេរិក ដោយមាន​រួមមាន​ការសាងសង់អគារថ្មីមួយខ្នង​ ការបំពាក់ឧបករណ៍បរិក្ខារវេជ្ជសាស្រ្ត និងការបណ្តុះបណ្តាលមន្រ្តី​ផងដែរ​។ ​

​អគារថ្មីនេះត្រូវបានសាងសង់លើផ្ទៃដីសរុប ៣៧, ៣៨០ម៉ែត្រការ៉េ ដែលមានទំហំអគារសរុប ៨, ៣២០ម៉ែត្រការ៉េ មានកម្ពស់៤ជាន់ គិតទាំងជាន់ផ្ទាល់ដី និងអាចដាក់បាន​២០០គ្រែ ដែលបានចាប់ផ្តើមសាងស​ង់កាលពីខែធ្នូ ឆ្នាំ២០២១​។ អគារថ្មីនេះរួមមាន ផ្នែកសង្រ្គោះបន្ទាន់ ផ្នែកប្រពោធទនកម្ម ផ្នែកសម្រាកពេ​ទ្យ ផ្នែកវះកាត់ ផ្នែករូបភាពវេជ្ជសាស្រ្ត និងផ្នែកគាំទ្រ។​

តាមរយៈអគារថ្មីនេះ កម្ពុជា-ជប៉ុន បានបង្ហាញក្តីរំពឹងទុកថា នឹងចូលរួមចំណែកបង្កើនប្រសិទ្ធភាព គុណភាព សុវត្ថិភាព ប្រកបដោយសមធម៌ មិនត្រឹមតែប្រជាជននៅខេត្តសៀមរាបទេ តែនឹងគ្របដណ្តប់ប្រជាជននៅជុំវិញខេត្តសៀមរាបផងដែរ ហើយនឹងកាត់បន្ថយបានការបញ្ជូនអ្នកជំងឺទៅភ្នំពេញ៕ ដោយ៖បូរ ពេជ្រហ្សាលីន