រយៈពេលប្រាំខែ ក្រសួងសារធារណការបានពិន័យរថយន្តដឹកជញ្ជូនលើសទម្ងន់កំណត់ចំនួនជាងមួយពាន់គ្រឿង
ភ្នំពេញ៖ ក្នុងរយៈពេលប្រាំខែដំបូងឆ្នាំ២០២៣នេះ ក្រសួងបានពិន័យរថយន្តដឹកជញ្ជូនលើសទម្ងន់កំណត់ បានរហូតចំនួន ១ ១២២ គ្រឿងនៃរថយន្តត្រួតពិនិត្យសរុបជាងមួយលានគ្រឿង ដែលត្រូវបានពិន័យជាទឹកប្រាក់បានប្រមាណ ១, ៧៧ ពាន់លានរៀល។
យោងតាមរបាយការណ៍ផ្សព្វផ្សាយរបស់ក្រសួងសាធារណការ និងដឹកជញ្ជូន កាលពីថ្ងៃទី១៩ ខែមិថុនា បានបញ្ជាក់ថា ការអនុវត្តការងារក្នុងរយៈពេលប្រាំខែដំបូង ឆ្នាំ២០២៣នេះ មានរថយន្តត្រួតពិនិត្យសរុបចំនួន ១ ៣១២ ៥៧៩គ្រឿង ដោយរថយន្តដឹកជញ្ជូនតាមច្បាប់កំណត់មានចំនួន ៨៨៦ ៧៦៥ គ្រឿង និងរថយន្តលើសទម្ងន់កម្រិតកំណត់មានចំនួន ៤២៥ ៨១៤គ្រឿង ស្មើនឹង៣២,៤៤ភាគរយ។
របាយការណ៍បានបន្តថា ៖ «ក្នុងចំណោមរថយន្តលើសទម្ងន់កម្រិតកំណត់ទាំងអស់នេះ មានរថយន្តចំនួន ១ ១២២ គ្រឿង ត្រូវបានធ្វើការផាកពិន័យ ដែលមានទឹកប្រាក់ពិន័យសរុបប្រមាណ ១, ៧៧ពាន់លានរៀល ក្នុងនោះរថយន្តដែលត្រូវឃាត់ទុកមួយឆ្នាំមានចំនួន ៥៥គ្រឿងផងដែរ»។
ប្រភពដដែលបានបន្តថា ចំណែករថយន្តចំនួន ៤ ២៤ ៦៩២ គ្រឿង ដែលបានផ្ទុកលើសទម្ងន់ផងដែរនោះ បានធ្វើការអនុគ្រោះ ដោយសារការដឹកលើសនេះក្រោម ៥ភាគរយ ដែលអាចអនុគ្រោះបាន ខណៈដែលរថយន្តត្រូវធ្វើការផាកពិន័យ ជារថយន្តផ្ទុកលើសទម្ងន់ពី៥ភាគរយ។
ក្នុងកិច្ចប្រជុំ កាលពីថ្ងៃទី១៩ ដដែលនោះ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានណែនាំដល់មន្ត្រីតាមស្ថានីយឱ្យពង្រឹងការអនុវត្តការងារឱ្យបានកាន់តែប្រសើរ ដោយប្រកាន់ភ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធ។
ជុំវិញរឿងនេះ លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានធ្វើការវាយតម្លៃខ្ពស់ ចំពោះការខិតខំរបស់ក្រសួងក្នុងបន្តពង្រឹងការអនុវត្តច្បាប់ ទាំងការពិន័យទៅលើរថយន្តដែលដឹកជញ្ជូនលើសទម្ងន់កំណត់ រួមទាំងការត្រួតពិនិត្យចរាចរណ៍ផ្លូវគោកផងដែរ។
លោកបានប្រាប់នៅថ្ងៃទី២០ ខែមិថុនាថា ចំនួនរថយន្តដែលក្រសួងបានផាកពិន័យនេះក្នុងរយៈពេល ៥ខែមកនេះ ជាចំនួនដែលមានការប្រែប្រួលជាវិជ្ជមាន ដោយសារវិធានការតឹងរ៉ឹងងរបស់ក្រសួង។
រថយន្តដែលដឹកជញ្ជូនលើសទម្ងន់កំណត់ បានបង្កឱ្យមានបញ្ហាផលប៉ះពាល់ច្រើន ក្នុងនោះរួមមាន៖ បង្កការក្រឡាប់ បុកឬប៉ះទង្គិចដល់អ្នកធ្វើដំណើរតាមម៉ូតូ ឬរថយន្តផ្សេងៗ, ធ្វើឱ្យខូចហេដ្ឋារចនាសម្ព័ន្ធ ពិសេសផ្លូវថ្នល់ និងស្ពាន ហើយផលប៉ះពាល់មួយទៀតគឺសណ្ដាប់ធ្នាតាមដងផ្លូវសាធារណៈជាដើម។
លោក គឹម បញ្ញា បានថ្លែងថា ៖ «ខ្ញុំគិតថា អ្វីដែលជាវិធានការរបស់ក្រសួង និងស្ថាប័នពាក់ព័ន្ធ ពិសេសជាមួយស្នងការនគរបាលរាជធានី/ខេត្ត វាជារឿងចាំបាច់ ហើយខ្ញុំសូមស្នើឱ្យក្រសួងពិចារណាបន្តអនុវត្តវិធានការកាន់តែតឹងរ៉ឹងបន្ថែមទៀត ដើម្បីឈានដល់ការលុបបំបាត់ស្ទើរតែទាំងស្រុង ឬទាំងស្រុងម្ដងនូវរថយន្តដែលដឹកជញ្ជូនលើសទម្ងន់កម្រិតកំណត់នេះ»។
លើសពីនេះទៀត លោកក៏ស្នើឱ្យក្រសួងត្រូវតែមានវិធានការច្បាប់បន្ថែមទៀត ចំពោះរថយន្តដែលដឹកជញ្ជូនលើសទម្ងន់កំណត់ ពិសេសគឺអាចឈានទៅដល់ការដកអាជ្ញាប័ណ្ណ ដាក់ពិន័យរថយន្តទាំងនោះត្រូវរក្សាទុកឱ្យបានយូរ។
លោក គឹម បញ្ញា បញ្ជាក់ថា ៖ «ក្រសួងក៏គួរតែមានការអនុវត្តផ្សេងទៀត ដូចជាការបំពាក់កាមេរ៉ាសុវត្ថិភាពនៅតាមដងផ្លូវ និងរួមទាំងដាក់ក្រុមត្រួតពិនិត្យចល័តឱ្យបានច្រើនជាងមុននៅតាមដងផ្លូវ ដើម្បីមានវិធានការភ្លាមៗ កុំឱ្យរថយន្តទាំងនោះចេះតែដឹកនាំឱ្យខូចហេដ្ឋារចនាសម្ព័ន្ធ»។
លោកថា ការអនុវត្តវិធានការទាំងនេះ នឹងធ្វើឱ្យមានសុវត្ថិភាពចរាចរណ៍កាន់តែប្រសើរឡើង ដែលមានន័យសម្រាប់ការការពារអាយុជីវិតរបស់ប្រជាពលរដ្ឋ ហើយក៏ដូចជាការការពារហេដ្ឋារចនាសម្ព័ន្ធឱ្យបានគង់វង្សផងដែរ៕
ដោយ៖ជា សុខនី
