ចិន ថ្កោលទោសលោក បៃដិន ដែលប្រៀបធៀបលោក ស៊ី ទៅនឹងជនផ្ដាច់ការដទៃទៀត
ប៉េកាំង៖ ក្រសួងការបរទេសចិនកាលពីថ្ងៃពុធទី ២១ខែមិថុនាបានថ្កោលទោសការលើកឡើងរបស់ប្រធានាធិបតីអាមេរិក លោក ចូ បៃដិន ដែលប្រៀបធៀបមេដឹកនាំចិន លោក ស៊ី ជិនពីង ថាស្មើនឹងជនផ្ដាច់ការដទៃទៀត ដោយចាត់ទុកសម្ដីបែបនេះថាជា «ការញុះញង់នយោបាយដោយបើកចំហ»។
អ្នកនាំពាក្យក្រសួងការបរទេសចិនលោកស្រី ម៉ៅ នីង (Mao Ning) បាននិយាយក្នុងសន្និសីទសារព័ត៌មានកាលពីថ្ងៃពុធដោយបានចាត់ទុកការលើកឡើងរបស់លោក បៃដិន ថាជារឿង «គួរឱ្យអស់សំណើច»។ នេះបើតាមការស្រង់សម្ដីរបស់ទីភ្នាក់ងារសារព័ត៌មាន AFP។
លោកស្រីនិយាយយ៉ាងដូច្នេះថា៖ «ការលើកឡើងពាក់ព័ន្ធរបស់ភាគីអាមេរិកគឺជាការគួរឱ្យអស់សំណើចបំផុត និងគ្មានការទទួលខុសត្រូវ ដែលបំពានយ៉ាងធ្ងន់ធ្ងរលើការពិតជាមូលដ្ឋាន ពិធីសារការទូត និងសេចក្តីថ្លៃថ្នូរនយោបាយរបស់ប្រទេសចិន»។ លោកស្រី Ning បានបន្ថែមទៀតថា៖ «ចិនមិនពេញចិត្ត និងប្រឆាំងយ៉ាងដាច់អហង្ការចំពោះរឿងនេះ»។
ការថ្កោលទោសបែបនេះរបស់ចិន ធ្វើឡើងបន្ទាប់ពី លោក បៃដិន កាលពីថ្ងៃអង្គារ បានថ្លែងនៅឯកម្មវិធីរៃអង្គាសថវិកាមួយក្នុងរដ្ឋកាលីហ្វ័រញ៉ា ថា លោក ស៊ី ខឹងសម្បារអាមេរិក ចំពោះការបាញ់ទម្លាក់បាឡុង «ចារកម្ម» របស់ខ្លួនក្រោយពេលវាអណ្តែតលើទឹកដីរបស់សហរដ្ឋអាមេរិក។
លោក បៃដិន ថ្លែងថា៖ «លោក ស៊ី ជិនពីង មានការខឹងសម្បារយ៉ាងខ្លាំង ពេលដែលខ្ញុំបាញ់ទម្លាក់បាឡុងដែលផ្ទុកដោយឧបករណ៍ចារកម្មនោះដោយសារលោកមិននឹកស្មានអញ្ចឹងនោះទេ»។ លោកបន្តថា៖ «ខ្ញុំនិយាយមែន នោះគឺជាការអាម៉ាស់ដ៏ធំសម្រាប់ក្រុមជនផ្តាច់ការនៅពេលដែលពួកគេមិនដឹងថាមានរឿងអ្វីកើតឡើង»។
គួរបញ្ជាក់ថា ការអត្ថាធិប្បាយរបស់លោក បៃដិន ធ្វើឡើងបន្ទាប់ពីរដ្ឋមន្ត្រីការបរទេសអាមេរិក លោក អែនថូនី ប្ល៊ីងកែន បានបញ្ចប់ដំណើរទស្សនកិច្ចទៅកាន់ទីក្រុងប៉េកាំង ក្នុងគោលបំណងបង្កើតបណ្ដាញទំនាក់ទំនងជាមួយចិនឡើងវិញ ដើម្បីជៀសវាងជម្លោះរវាងមហាអំណាចពិភពលោកទាំងពីរ។
ចំណែកសេតវិមាន បានព្យាយាមបន្ធូរបន្ថយភាពតានតឹងដោយសារពាក្យសម្ដីរបស់លោក
បៃដិន កាលពីថ្ងៃពុធ ដោយនិយាយថា លោក ប្ល៊ីងកែន បានធ្វើឱ្យមានវឌ្ឍនភាពខ្លះ» ក្រោមដំណើរទស្សនកិច្ចទៅចិន ហើយថាទីក្រុងវ៉ាស៊ីនតោន នៅតែមានការរំពឹងទុកចំពោះការកសាងវឌ្ឍនភាពនោះ៕
ប្រែសម្រួលដោយ៖ ហួន ឌីណា
