គៀវ៖ មេដឹកនាំប្រទេសអ៊ុយក្រែនបាននិយាយថា យុទ្ធនាការប្រឆាំងនឹងរុស្ស៊ីត្រូវតែបន្តរហូតដល់ “សណ្តាប់ធ្នាប់អន្តរជាតិ” ត្រូវបានស្តារឡើងវិញ។

ប្រធានាធិបតីអ៊ុយក្រែន លោក Zelensky បានស្នើសុំឱ្យមានសម្ពាធបន្ថែម លើទីក្រុងមូស្គូ បន្ទាប់ពីការសន្ទនាតាមទូរស័ព្ទ ជាមួយប្រធានាធិបតីអាមេរិក លោក ចូ បៃដិន។ បើតាមមេដឹកនាំអ៊ុយក្រែនរូបនេះ ពួកគេបាននិយាយអំពីការបញ្ជូនអាវុធធុនធ្ងន់បន្ថែមទៀតផង។

លោក Zelensky បាននិយាយ កាលពីល្ងាចថ្ងៃអាទិត្យថា “យើងបានពិភាក្សាអំពីដំណើរនៃអរិភាព និងដំណើរការដែលកើតឡើងនៅក្នុងប្រទេសរុស្ស៊ី” ។ “ពិភពលោកត្រូវតែដាក់សម្ពាធលើរុស្ស៊ី រហូតដល់សណ្តាប់ធ្នាប់អន្តរជាតិត្រូវបានស្តារឡើងវិញ”។

លោក Zelensky បានបន្ថែមថា រូបលោក និងលោក Biden បានពិភាក្សាអំពី “ការពង្រីកបន្ថែមទៀតនៃកិច្ចសហប្រតិបត្តិការការពារជាតិ ដោយផ្តោតលើអាវុធរយៈចម្ងាយឆ្ងាយ” ។

មេដឹកនាំអ៊ុយក្រែនបានបន្ថែមថា “ការពង្រឹង” នៃកាំភ្លើងធំរបស់ គៀវ និងការបាញ់គ្រាប់រ៉ុក្កែតជាច្រើនក៏ស្ថិតនៅក្នុងរបៀបវារៈផងដែរ។

សេតវិមានបានចេញសេចក្តីថ្លែងការណ៍ខ្លីមួយដោយនិយាយថា លោក Biden “បានអះអាងជាថ្មីនូវការគាំទ្ររបស់សហរដ្ឋអាមេរិក ដោយមិនងាករេ រួមទាំងតាមរយៈការបន្តសន្តិសុខ សេដ្ឋកិច្ច និងជំនួយមនុស្សធម៌”។

ការសន្ទនានេះបានធ្វើឡើង នៅរយៈពេលពីរសប្តាហ៍ មុនពេលកិច្ចប្រជុំកំពូលរបស់អង្គការណាតូនៅក្នុងប្រទេសលីទុយអានី ដែលសមាជិកនៃប្លុកដែលដឹកនាំដោយសហរដ្ឋអាមេរិកនឹងផ្តោតលើជំនួយរួមគ្នាបន្ថែមទៀតសម្រាប់ទីក្រុងគៀវ។

តាមសេចក្តីរាយការណ៍ អ៊ុយក្រែនមានក្តីសង្ឃឹមខ្ពស់សម្រាប់កិច្ចប្រជុំនៅពេលនោះ ដោយគិតថានឹងទទួលបានផែនទីបង្ហាញផ្លូវសម្រាប់សមាជិកភាពណាតូ។ យ៉ាងណាមិញ សហរដ្ឋអាមេរិកបានប្រឆាំងនឹងការផ្តល់ឲ្យក្រុងកៀវ នូវផ្លូវជាក់លាក់មួយដើម្បីចូលរួមក្នុងសម្ព័ន្ធភាព នេះបើយោងតាមរបាយការណ៍ជាច្រើន៕

ប្រភពពី RT ប្រែសម្រួល៖ សារ៉ាត