គ្រឿងញៀនជាងប្រាំតោន ត្រូវបានដុតបំផ្លាញចោល ក្នុង​ទិវាអន្តរជាតិប្រយុទ្ធប្រឆាំងគ្រឿងញៀន

អត្ថបទដោយ៖
CPA

​ភ្នំពេញ៖ សារធាតុញៀន និងសារធាតុគីមីផ្សំ ផ្សេងទៀតសរុបជាង​ប្រាំតោន ត្រូវ​បាន​ដុតបំផ្លាញចោល ក្នុង​ឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៨ ខែមិថុនា ​ក្រោមប្រធានបទ «អ្វីៗដើម្បីប្រជាជនជាចម្បង បញ្ឈប់ការរើសអើង និងមាក់ងាយអ្នកញៀនគ្រឿងញៀន ពង្រឹងការងារអប់រំបង្ការ»។

​ទិវានោះដែរឧបនាយករដ្ឋមន្រ្តី ​រដ្ឋមន្រ្តីក្រសួងមហាផ្ទៃសម្ដេចក្រឡាហោម ស ខេង ក៏​បាន​ណែនាំឱ្យអាជ្ញាធរគ្រប់ជាន់ថ្នាក់បន្តការបង្រ្កាបគ្រឿ​ងញៀនបន្ថែមទៀតដោយសារបទល្មើសគ្រឿងញៀននៅមូលដ្ឋាន បន្តកើតមានគួរឱ្យកត់សម្គាល់។

​​ព្រះរាជអាជ្ញាអមសាលាដំបូងរាជធានីភ្នំពេញ លោក ច្រឹង ខ្មៅ ​បាន​ថ្លែង​នា​ទិវានោះថា ​សារធាតុញៀន និងសា​រធាតុគីមីផ្សំជាច្រើនប្រភេទ ដែលត្រូវបានដុតបំផ្លាញចោលនាពេលនេះ មានចំនួនជាង៥តោន ៧១៣ គីឡូក្រាម។

លោកបាន​ថ្លែង​ថា ៖ «តាមលក្ខណៈបច្ចេកទេស និងសុវត្ថិភាពក្នុងការបំផ្លាញចោលនេះ គណៈកម្មការ​បំ​ផ្លាញគ្រឿងញៀន និងមន្ទីរពិសោធន៍នៃអគ្គលេខាធិការដ្ឋាននៃអាជ្ញាធរប្រយុទ្ធប្រឆាំងគ្រឿងញៀន បានសម្រេច​បំផ្លាញគ្រឿងញៀននូវវិធីសាស្រ្តដុតគ្រឿងញៀន និងសារធាតុគីមី ទម្ងន់សរុប ៥ តោន ៧១៣ គីឡូក្រាម»។

លោក ច្រឹង ខ្មៅ បាន​បន្តថា ​រី​ឯសារធាតុញៀន និងសារធាតុគីមីផ្សំដទៃទៀតដែលមានទម្ងន់សរុប ៣៣៦ តោន៥៤៤គីឡូក្រាម ដែលជាសារធាតុរំលាយហើរជាអាស៊ីត និងគីមីពុល​ឆាបឆេះខ្លាំង មិនអាចធ្វើការបំ​ផ្លាញតាមវិធីសាស្រ្តដុតបានទេ ពោលគណៈកម្មការ​បានសម្រេចទិញសារធាតុគីមីផ្សេងមកធ្វើប្រតិកម្មបន្សាប និងសម្ភារបច្ចេកទេសចាំបាច់ដែលទាមទារឱ្យមានការសិក្សាពីគម្រោងចំណាយលម្អិត។

បើតាមលោក ច្រឹង ខ្មៅ សាលាដំបូងរាជធានីភ្នំពេញនៅមានសំណុំរឿងគ្រឿងញៀនកំពុងចាត់ការ និងនៅជាប់បណ្តឹងឧទ្ធរណ៍ជាច្រើនទៀត ដែលនៅពេលខាងមុខគណៈកម្មការនឹងដុតបំផ្លាញជាបន្តបន្ទាប់តាមដំណាក់កាលនៅពេលទទួលបាននូវសេចក្តីសម្រេចរបស់តុលាការ។

ក្នុងឱកាសនោះដែរសម្ដេចក្រឡាហោម ស ខេង ដែល​ជាប្រធាននៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ផងដែរនោះ​ ក៏​បានណែនាំឱ្យអាជ្ញាធរគ្រប់ជាន់ថ្នាក់បន្តទប់ស្កាត់ និងបង្រ្កាបគ្រឿងញៀនបន្ថែមទៀត ព្រោះប​ទល្មើសគ្រឿងញៀននៅមូលដ្ឋាន បន្តកើតមានគួរឱ្យកត់សម្គាល់។

លោកបាន​បន្តថា ការនាំគ្រឿងញៀនពីតំបន់ត្រីកោណមាសចូលមកកម្ពុជា ឆ្លងកាត់តាមខេត្តភាគឦសាន្ត នៃប្រទេស នៅតែមានការកើនឡើង ខណៈក្រុមឧក្រិដ្ឋជននៅតែបាន​និងកំពុងព្យាយាមលួចកែច្នៃផលិតគ្រឿងញៀនសំយោគ នៅក្នុងប្រទេសកម្ពុជា ដោយធ្វើការបង្វែសារធាតុគីមីផ្សំពីការនាំចូលសម្រាប់ការ ប្រើប្រាស់ក្នុងវិស័យស្របច្បាប់ ទៅផលិតជាគ្រឿងញៀនខុសច្បាប់។

សម្ដេចក្រឡាហោមថ្លែងថា៖«បទល្មើសជួញដូរ ចរាចរ កែច្នៃផលិតធំៗត្រូវបានសមត្ថកិច្ចបង្រ្កាបបានយ៉ាងមានប្រសិទ្ធភាពនិងទាន់ពេលវេលា។បទល្មើសចែកចាយ ជួញដូរតូចតាច និងប្រើប្រាស់គ្រឿងញៀនក្នុងមូលដ្ឋានសហគមន៍នៅតែបន្តកើតមានគួរឱ្យកត់សម្គាល់ដែលបង្កនូវការរំខាននិងជាក្តីកង្វល់ពីសំណាក់​ប្រជាព​ល​រដ្ឋដែលយើងហាក់នៅមិនទាន់ដោះស្រាយឱ្យបានទាំងស្រុង និងប្រកបដោយភាពជឿជាក់នៅឡើយ»។​

បើតាម​សម្ដេចក្រឡាហោម ស ខេង បន្តថា ​បច្ចុប្បន្នក្នុងមួយថ្ងៃជាមធ្យមគ្រឿងញៀនកើតឡើងប្រមាណ ១០ករណី ដែលមាន​ក្នុងរាជធានីខេត្ត យ៉ាងតិច ៧ទៅ១០ខេត្ត។

ក្នុង​ពិធីចុះជួបសំណេះសំណាលជាមួយនឹងកម្មករកម្មការរិនី​ជិត​ពីរម៉ឺននាក់​ក្នុង​រាជធានីភ្នំពេញ ថ្ងៃទី​២៨ ខែមិថុនាសម្ដេចតេជោ ហ៊ុន សែន នាយករដ្ឋមន្រ្តីកម្ពុជាមានប្រសាសន៍ដែរថា ការ​លុបបំបាត់នូវ​គ្រឿងញៀន គឺ​ជាការអនុវត្តនយោបាយ​ភូមិឃុំ មានសុវត្ថិភាព​ ដែលធ្វើយ៉ាងណា​នៅតាមរោងចក្រ ​សហគ្រាស កុំឱ្យមាន​ការប្រើប្រាស់គ្រឿងញៀន ការចែកចាយគ្រឿងញៀនជាដើម។​

យោងរបាយការណ៍សង្ខេបបូកសរុបលទ្ធផលប្រយុទ្ធប្រឆាំងគ្រឿងញៀនខុសច្បាប់លើកទី៧របស់ អាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា ក្នុងឆ្នាំ២០២២ កងកម្លាំងអនុវត្តច្បាប់បានធ្វើការបង្ក្រាបបទល្មើសគ្រឿងញៀនបានចំនួន ៦ ៣៩០ករណី ឃាត់ខ្លួន ១៥ ០០២នាក់ ក្នុងនោះ ចាប់យកសារធាតុញៀនគ្រប់ប្រភេទទម្ងន់ ១៤.៩១៩,៤៧គីឡូក្រាម៕ដោយ៖សុខ រក្សា

ads banner