ភ្នំពេញ៖ ទេសាភិបាលរងធនាគារជាតិនៃកម្ពុជា លោកជំទាវ ជា សិរី បានប្រាប់ឱ្យដឹងថា ចំពោះការចូលជាសមាជិករបស់កម្ពុជាទៅក្នុងប្រព័ន្ធទូទាត់ CIPS របស់ធនាគារកណ្តាល នៃសាធារណរដ្ឋប្រជាមានិតចិន ត្រូវការចំណាយពេលវេលាយូរបន្ថែមទៀ​ត ដោយសារតែខាងធនាគារកណ្តាលចិន​នេះ មានលក្ខខណ្ឌតម្រូវ​ច្រើនសម្រាប់​ការចូលជាសមាជិក។

លោកជំទាវបានប្រាប់បែបនេះ​​ក្នុងពេល​ផ្តល់សម្ភាសន៍ដល់អ្នកសារព័ត៌មាន បន្ទាប់​ពី​កម្មវិធីចុះ​អនុស្សរណៈយោគយល់គ្នា (MoU)ស្តីពីកិច្ចសហប្រតិបត្តិការទូទាត់សងប្រាក់ឆ្លងដែនតាមQR-Codeរវាងធនាគារជាតិនៃកម្ពុជានិងក្រុមហ៊ុនUnionPay International កាលពីល្ងាច​ថ្ងៃទី១០ ខែកក្កដា ឆ្នាំ២០២៣​។

លោកជំទាវបានបញ្ជាក់ថា ៖ «ខ្ញុំបានទៅប្រទេសចិន ហើយក៏បានពិភាក្សាជាមួយទេសាភិបាលរងធនាគារកណ្តាល​​ចិន ហើយក្រុមការងារយើងក៏បានពិភាក្សាថ្នាក់បច្ចេកទេសដែរ គឺទាមទារពេលវេលាយូរ ដោយសារតែលក្ខខណ្ឌរបស់គេ​មានច្រើនជាងអ្វីដែលយើងរំពឹងទុក។ដូច្នេះយើងត្រូវធ្វើការជាមួយគេ​បន្តទៀត ដើម្បីធ្វើយ៉ាងណាឱ្យយើងអាចបំពេញល​ក្ខខណ្ឌការងារនេះបាន និងអាចក្លាយទៅជាសមាជិក»។

លោកជំទាវបានបញ្ជាក់ទៀតថា ក្រុមការងារធនាគារជាតិ កំពុងរិះរកវិធី ដើម្បីអាចចូលរួមក្នុងប្រព័ន្ធទូទាត់នៃធនាគារកណ្តាលរបស់ចិននេះ ប៉ុន្តែក្នុងអំឡុងពេល នៃការជជែកពិភាក្សាជាមួយធនាគារកណ្តាលរបស់ចិន ធ​នាគារជាតិនៃកម្ពុជា ក៏មានគម្រោងតភ្ជាប់ដោយប្រយោលជាមួយធនាគារធំណាមួយនៅប្រទេសចិនសិនទម្រាំបានឡើងទៅផ្ទាល់ជាមួយធនាគារកណ្តាលចិន។

បើតាមលោកជំទាវ ជា សិរី ការចូលជាសមាជិក CIPS នឹងផ្តល់អត្ថប្រយោជន៍ ជាច្រើនដល់កម្ពុជាដូចជា ផ្តល់ជាជម្រើសបន្ថែ​មក្នុងការទូទាត់ទៅកាន់ពិភពលោក និងតំបន់, សម្រួល និងជំរុញពាណិជ្ជកម្មការវិនិយោគ និងទេសចរណ៍ ជាពិសេសពាណិជ្ជកម្មទ្វេភាគីជាមួយប្រទេសចិន និងប្រទេសទទួលការទូទាត់ជាប្រាក់យ៉ន់និងសម្រួលការវិនិយោគទុនបម្រុងអន្តរជា​តិ របស់កម្ពុជាជាប្រាក់យ៉ន់។

ទាក់ទងនឹង​ការចូលជាសមាជិករបស់ប្រ​ព័​ន្ធទូទាត់នៃធនាគារកណ្តាលចិន CIPS នេះ លោក គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បានថ្លែង​ឱ្យដឹងដែរ​ថា ​កម្ពុជា គួរតែចូលជាសមាជិករបស់ប្រព័ន្ធទូទាត់អន្តរជាតិនានាឱ្យ​បានច្រើនកាន់តែល្អ។

លោកបានបន្តថា ៖ «ចូលជាសមាជិករបស់ប្រព័ន្ធទូទាត់អន្តរជាតិនេះមាន​ប្រយោជន៍ ដោយអាចចៀសវាងកា​របិទនូវលំហូរសាច់ជាលុយដុល្លារ ដោយយើងដឹងហើយថាបច្ចុប្បន្ននេះការទូទាត់លុយដុល្លារ ប្រើប្រាស់តាមBank of America គឺប្រព័ន្ធទូទាត់អាមេរិក។ ដូចនេះសហរដ្ឋអាមេរិក អាចនឹងធ្វើការបិទនូវលំហូរសាច់ប្រាក់អន្តរជាតិដែលធ្វើឱ្យប្រទេសផ្សេងជួបវិបត្តិ។ ចំណុចនេះគេហៅថា ការដាក់ទណ្ឌកម្មរបស់សហរដ្ឋអាមេរិក»។

លោក គី សេរីវឌ្ឍន៍ បានបន្ថែមទៀតថា ការចូលជាមួយប្រព័ន្ធទូទាត់របស់ចិន ក៏ជាជម្រើសល្អមួយដែរ សម្រាប់លំហូរសេ​ដ្ឋ​កិច្ចនៅពេលមានវិបត្តិផ្សេងៗកើតមានឡើង ជាពិសេសដោយសារទំនាក់ទំនងសេដ្ឋកិច្ចកម្ពុជា និងចិន កាន់តែធំ និងរឹងមាំ​ ខណៈដែលចិនជាប្រទេសនាំចេញបំផុតលើសកលលោក។

លោកថា ៖ «ដូចនេះ ការចូលជាសមាជិករបស់ប្រព័ន្ធទូទាត់នៃធនាគារកណ្តាលចិន CIPS នឹងជួយសម្រួលដល់ពាណិជ្ជក​ម្មមកកម្ពុជាកាន់តែច្រើន ហើយអាចធ្វើការទូទាត់ប្រាក់យ៉ន់ លើការទូទាត់អន្តរជាតិផងដែរ»។

សូមជម្រាបថា ប្រព័ន្ធទូទាត់ CIPS គឺជាប្រព័ន្ធទូទាត់ថ្នាក់អន្តរជាតិ ដូចទៅនឹងប្រព័ន្ធ SWIFT ដែរ ដែលលផ្តល់នូវសេវាផា​ត់ទាត់ និងទូទាត់សម្រាប់សមាជិក ដើម្បីទូទាត់ឆ្លងព្រំដែនជាប្រាក់យ៉ន់ចិន។ ការទូទាត់ឆ្លងដែន គឺជាសេវាដែលអនុ​ញ្ញាតឱ្យអតិថិជនដែលប្រើប្រាស់សេវាក្នុងប្រទេសមួយ អាចផ្ទេរតាមរយៈប្រព័ន្ធអេឡិចនូវសាច់ប្រាក់ពីគណនីរបស់ខ្លួនទៅកាន់អ្នកលក់ដែលប្រើប្រាស់សេវាហិរញ្ញវត្ថុនៅប្រទេសផ្សេងទៀតបាន​។

CIPS ត្រូវបានបង្កើតឡើងដោយធនាគារកណ្តាលចិននៅឆ្នាំ ២០១៥ ហើយ​សមាជិកដំបូងរបស់ CIPS មានសមាជិកផ្ទាល់ ២៧ និងសមាជិកប្រយោល ៤០០ គ្រឹះស្ថានហិរញ្ញវត្ថុ។

បច្ចុប្បន្ន CIPS មានសមាជិកផ្ទាល់ចំនួន ៧៦ និងសមាជិក ១ ២៦៥ គ្រឹះស្ថាន ដែលក្នុងនោះមកពីតំបន់អាស៊ីចំនួន ៩៦៥, ទ្វីបអឺរ៉ុប ១៨៥, ទ្វីបអាហ្វ្រិក ៤៦, អាមេរិកខាងជើង ២៩, ទ្វីបអូសេអានី ២៣ និងអាមេរកខាងត្បូង ១៧ ដែលមកពីប្រទេសចំនួន ១០៦ ប្រទេស៕

ដោយ៖វណ្ណ សុជាតា