ចិនថ្កោលទោសចំពោះការរិះគន់ណាតូ ហើយព្រមានថាខ្លួននឹងការពារសិទ្ធិរបស់ប្រទេស
ប៉េកាំង៖ ក្រុងប៉េកាំងថ្កោលទោសការចោទប្រកាន់របស់អង្គការណាតូដែលថា ចិនធ្វើការប្រកួតប្រជែងជាមួយខ្លួនផ្នែកផលប្រយោជន៍និងសន្តិសុខ ហើយបានប្រឆាំងនឹងការប៉ុនប៉ងណាមួយរបស់ប្លុកសម្ព័ន្ធមិត្តយោធាមួយនេះ ដើម្បីពង្រីកខ្លួនចូលទៅក្នុងតំបន់អាស៊ីប៉ាស៊ីហ្វិក។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាននៅថ្ងៃពុធ ទី១២ ខែកក្កដា។
ការថ្កោលទោសនេះ ធ្វើឡើងបន្ទាប់ពីអង្គការណាតូ ដែលកំពុងរៀបចំកិច្ចប្រជុំកំពូលនៅប្រទេសលីទុយអានី បានចេញសេចក្ដីថ្លែងការណ៍កាលពីថ្ងៃអង្គារ ដោយប្រើសម្ដីថា សាធារណរដ្ឋប្រជាមានិតចិន (PRC) បានប្រកួតប្រជែងលើផ្នែកផលប្រយោជន៍ សន្តិសុខ និងតម្លៃរបស់ខ្លួនដោយប្រើ «មហិច្ឆតា និងគោលនយោបាយបង្ខិតបង្ខំ» របស់ខ្លួន។
បេសកកម្មការទូតចិនប្រចាំអឺរ៉ុបបាននិយាយក្នុងសេចក្តីថ្លែងការណ៍កាលពីថ្ងៃអង្គារថា ខ្លឹមសារដែលទាក់ទងនឹងប្រទេសចិន ដែលមានក្នុងសេចក្តីថ្លែងការណ៍របស់ណាតូ បានមិនយកចិត្តទុកដាក់លើការពិតជាមូលដ្ឋាន បង្ខូចគោលជំហរ និងគោលនយោបាយរបស់ចិន ហើយធ្វើឱ្យខូចកិត្តិយសប្រទេសចិនដោយចេតនា។ ចិនបន្តថា៖ «យើងប្រឆាំងយ៉ាងម៉ឺងម៉ាត់ និងបដិសេធចំពោះរឿងនេះ»។
មិនត្រឹមតែប៉ុណ្ណេះខណៈកិច្ចប្រជុំកំពូលណាតូនាពេលនេះ មានការចូលរួមពីជប៉ុន និងកូរ៉េខាងត្បូង ដែលព្រួយបារម្ភពីឥទ្ធិពលរបស់ចិន និងកូរ៉េខាងជើង បេសកកម្មការទូតចិនបានលើកឡើងថា ចិនប្រឆាំងដាច់ខាតចំពោះចលនាពង្រីកខ្លួនរបស់ណាតូ ឆ្ពោះទៅភាគខាងកើត ពោលគឺតំបន់អាស៊ីប៉ាស៊ីហ្វិក ហើយព្រមានថាសកម្មភាពណាមួយដែលគំរាមកំហែងដល់សិទ្ធិរបស់ទីក្រុងប៉េកាំង នឹងទទួលការឆ្លើយតបយ៉ាងម៉ឺងម៉ាត់។
បេសកកម្មដដែលបន្តថា៖ «ទង្វើណាមួយដែលប៉ះពាល់ដល់សិទ្ធិ និងផលប្រយោជន៍ស្របច្បាប់របស់ប្រទេសចិន នឹងត្រូវឆ្លើយតបយ៉ាងម៉ឺងម៉ាត់»។
គួរបញ្ជាក់ថា ក្នុងសេចក្ដីថ្លែងការណ៍រួមកាលពីថ្ងៃអង្គារ មេដឹកនាំប្រទេសសមាជិកណាតូ បាននិយាយថា៖ «PRC ប្រើប្រាស់ឧបករណ៍នយោបាយ សេដ្ឋកិច្ច និងយោធាគ្រប់ជ្រុងជ្រោយ ដើម្បីបង្កើនការបោះជំហានជាសាកល និងអំណាចខណៈមិនបង្ហាញឱ្យចំៗអំពីយុទ្ធសាស្ត្រ ចេតនា និងការបង្កើនយោធារបស់ខ្លួន»។ ប្លុកបន្តថា សកម្មភាពរបស់ចិន ក៏ដូជជាវោហាសាស្ត្រ និងព័ត៌មានមិនពិតរបស់ប្រទេសនេះ បានដាក់គោលដៅលើសម្ព័ន្ធមិត្ត និងធ្វើឱ្យប៉ះពាល់ដល់សន្តិសុខសម្ព័ន្ធភាពរបស់អង្គការ។
ដោយឡែកអគ្គលេខាធិការអង្គការណាតូ លោក ជេនស៍ ស្តូលធេនប៊ឺគ បានគូសបញ្ជាក់ប្រាប់អ្នកយកព័ត៌មាននៅឯកិច្ចប្រជុំកំពូលថា ចិនមិនមែនជា «សត្រូវ» របស់អង្គការណាតូនោះទេ ប៉ុន្តែប្រទេសនេះបាននិងកំពុងបង្កើនបញ្ហាលើសណ្តាប់ធ្នាប់អន្តរជាតិ ដោយផ្អែកលើ «អាកប្បកិរិយាបង្ខិតបង្ខំ» របស់ខ្លួន។
លោកថ្លែងយ៉ាងដូច្នេះថា៖ «ចិនកំពុងប្រកួតប្រជែងកាន់តែខ្លាំងឡើង លើសណ្តាប់ធ្នាប់អន្តរជាតិដែលផ្អែកលើច្បាប់ ដោយបដិសេធមិនថ្កោលទោសសង្គ្រាមរបស់រុស្ស៊ីប្រឆាំងនឹងអ៊ុយក្រែន គំរាមកំហែងតៃវ៉ាន់ និងអនុវត្តការបង្កើនយោធាជាដើម»៕
ប្រែសម្រួល៖ហួន ឌីណា
ប្រភព៖ China lashes back at NATO criticism, warns it will protect its rights
