(កំពង់ធំ)៖ ព្រះបដិមាមួយព្រះអង្គ កសាងពីថ្មពួកភ្នំព្រះវិហារ មានព្រះភ្នែន ២ម៉ែត្រកន្លះ កម្ពស់ ២ម៉ែត្រកន្លះ បានប្រារព្វពិធីតាមប្រពៃណីព្រះពុទ្ធសាសនា ដើម្បីលើករំកិលឡើងគង់លើបល្ល័ង្ក នៅបរិវេណផ្លូវបំបែក ស្របកំណាត់ផ្លូវជាតិលេខ៦ ទីរួមស្រុកសន្ទុក ជាទីសក្ការៈគោរពបូជា និងតំណាងនៃសេចក្ដីសុខរបស់ប្រជាជាតិ មាតុភូមិ ក្រោមដំបូលសុខសន្តិភាព។

ពិធីនេះរៀបចំឡើងដោយមានការអញ្ជើញចូលរួមពីលោជំទាវ ខៀវ ស៊ីណា ជា ចាន់តូ អនុធានកិត្តិយសសាខាកាកបាទក្រហមកម្ពុជាខេត្តកំពង់ធំ នៅព្រឹកថ្ងៃទី១២ ខែកក្កដា ឆ្នាំ២០២៣ ដោយមានការនិមន្ត និងអញ្ជើញចូលរួមពី ព្រះសង្ឃ ប្រជាពុទ្ធបរិស័ទ និងសិស្សានុសិស្សផងដែរ ។

លោក ឯក ប្រុស អ្នកទទួលលើកការរៀបចំ និងលោកអភិបាលស្រុកសន្ទុក បានឲ្យដឹងថា ព្រះបដិមាមួយព្រះអង្គនេះ គឺកើតចេញពីទឹកចិត្តដ៏សប្បុរសរបស់លោកជំទាវ ខៀវ ស៊ីណា ជា ចាន់តូ ដែលបានបរិចាកថវិកា ជាវនាំមកតម្កល់នៅទីសាធារណៈដ៏សមរម្យមួយនេះ លើផ្ទៃដីទំហំប្រមាណ ៣ពាន់ម៉ែត្រការ៉េ មានតម្លៃសរុប ២ម៉ឺន ៥ពាន់ដុល្លារអាមេរិក ។

មានប្រសាសន៍សំណេះសំណាល ក្នុងឱកាសនោះ លោកជំទាវ ខៀវ ស៊ីណា ក៏បានអំពាវនាវបងប្អូនប្រជាពលរដ្ឋ អញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា ដើម្បីជ្រើសរើសអ្នកដឹកនាំប្រទេស ធានាបានការថែរក្សាសុឋសន្តិភាព និងការអភិវឌ្ឍជាបន្តទៀត ៕

អត្ថបទ៖ វណ្ណលុក, រូបភាព៖ វ៉េង លីមហួត