ប៉ូលិសថៃ ចាប់ខ្លួនជនជាតិអាល្លឺម៉ង់ពីរនាក់ ពាក់ព័ន្ធនឹងការសម្លាប់មនុស្សហើយដាក់សពក្នុងទូទឹកកក
ថៃ៖ ប៉ូលិសថៃបានចាប់ខ្លួនជនជាតិអាល្លឺម៉ង់ពីរនាក់ ពាក់ព័ន្ធនឹងការសម្លាប់ជនជាតិអាល្លឺម៉ង់ម្នាក់ទៀត ដោយកាត់សាកសពជាបំណែកៗ រួចដាក់ក្លាសេក្នុងទូទឹកកកដាក់នៅក្នុងផ្ទះមួយកន្លែង មុនពេលប៉ូលិសតាមដានឃើញ។
កាសែតក្នុងស្រុកថៃ Khaosod បានរាយការណ៍កាលពីថ្ងៃពុធថា បុរសជនជាតិអាល្លឺម៉ង់វ័យ ៥២ ឆ្នាំ ត្រូវបានចាប់ខ្លួនកាលពីល្ងាចថ្ងៃអង្គារនៅទីក្រុងបាងកក ហើយស្ត្រីជនជាតិអាល្លឺម៉ង់វ័យ ៤៧ ឆ្នាំម្នាក់ទៀតដែលជាមិត្តភក្តិជិតស្និទ្ធិនឹងគ្នា បានចូលខ្លួនប្រគល់ទៅប៉ូលិសកាលពីព្រឹកថ្ងៃពុធ។
បើតាមលោក Tawee Kudthalaeng អធិការនគរបាលក្រុង Nong Prue បានឱ្យដឹងថាជនសង្ស័យជនជាតិអាល្លឺម៉ង់ទាំងពីរនាក់ ត្រូវបានចោទប្រកាន់ពីបទមនុស្សឃាត ។ទន្ទឹមនេះប៉ូលិសក៏កំពុងតាមចាប់ជនសង្ស័យទី៣ម្នាក់ទៀត។ ប៉ុន្តែលោក Kudthalaeng មិនបានផ្តល់ព័ត៌មានលំអិតទាក់ទងនឹងជនសង្ស័យទី៣នេះទេ។
ការចាប់ខ្លួនជនជាតិអាល្លឺម៉ង់នេះធ្វើឡើងបន្ទាប់ពីប៉ូលិសថៃ បានរកឃើញបំណែកសាកសពរបស់បុរសជនជាតិអាល្លឺម៉ង់ម្នាក់ ឈ្មោះ Hans-Peter Mack វ័យ ៦២ ឆ្នាំ ក្នុងទូរក្លាសេក្នុងផ្ទះមួយកន្លែងនៅក្រុង Nong Prue នៃខេត្តឈុនបុរី កាលពីយប់ថ្ងៃចន្ទ។ ទូទឹកកកនោះ ត្រូវបានបុរសជនជាតិអាល្លឺម៉ង់ ដែលជាជនសង្ស័យ បញ្ជូនយកទៅដាក់នៅកន្លែងនោះ។
តាមការចុះផ្សាយរបស់ទីភ្នាក់ងារសារព័ត៌មាន AP លោក Mack ដែលជាឈ្មួញកណ្តាលក្នុងវិស័យអចលនទ្រព្យជនជាតិអាល្លឺម៉ង់ និងជាអ្នករស់នៅប្រទេសថៃអស់រយៈពេលជាច្រើនឆ្នាំមកហើយនោះ មុនពេលប្រពន្ធជនជាតិថៃរបស់លោក រាយការណ៍ថាលោកបាត់ខ្លួនកាលពីមួយសប្ដាហ៍មុន។
ក្រោយការបាត់ខ្លួន ប៉ូលិសបានផ្តិតយករូបភាពកាមេរ៉ាសុវត្ថិភាព ដើម្បីស្វែងរកតម្រុយពីលោក ដោយសង្ឃឹមថាលោកនៅរស់ មុនពេលរកឃើញសាពសពរបស់លោកក្នុងទូរទឹកកកនោះ។ ក្រុមអ្នកស៊ើបង្កេតបានរកឃើញថា លុយមួយចំនួនធំត្រូវបានដកចេញពីគណនីធនាគាររបស់លោក Mack ដែលធ្វើឱ្យប៉ូលិសសន្និដ្ឋានជាបឋមថា ការសម្លាប់លោកអាចពាក់ព័ន្ធនឹងឧក្រិដ្ឋកម្មជំរិតទារប្រាក់ ហើយប្រហែលជាលោកត្រូវបានគេធ្វើទណ្ឌកម្មមុនពេលសម្លាប់៕
ប្រែសម្រួលដោយ៖ ហួន ឌីណា ប្រភព៖ Thailand arrests 2 Germans over body found in freezer
