អតីតមេដឹកនាំប្រទេសប៉ាណាម៉ា រងការកាត់ទោសឱ្យជាប់គុក១០ឆ្នាំពីបទលាងលុយកខ្វក់
ប៉ាណាម៉ា៖ អតីតប្រធានាធិបតីប៉ាណាម៉ា លោក រីខារដូ ម៉ាទីណេលី (Ricardo Martinelli) រងការកាត់ទោសឱ្យជាប់ពន្ធនាគាររយៈពេល ១០ ឆ្នាំពីបទលាងលុយកខ្វក់ ក្នុងព្រឹត្តិការណ៍នយោបាយកក្រើកដែលអាចជះឥទ្ធិពលដល់ដំណើរការបោះឆ្នោតជាតិឆ្នាំក្រោយ។ នេះបើតាមការចុះផ្សាយរបស់បណ្ដាញព័ត៌មាន Al Jazeera។
លោក ម៉ាទីណេលី ដែលគេរំពឹងថានឹងអ្នកនាំមុខគេសម្រាប់ការបោះឆ្នោតដណ្ដើមតំណែងប្រធានាធិបតីឆ្នាំក្រោយ ក៏រងការពិន័យជាប្រាក់ ១៩ លានដុល្លារផងដែរ ក្នុងការកាត់ទោសកាលពីថ្ងៃអង្គារ។ សំណុំរឿងប្រឆាំងនឹងអ្នកនយោបាយវ័យ ៧១ ឆ្នាំរូបនេះ ផ្តោតលើការទិញក្រុមហ៊ុនប្រព័ន្ធផ្សព្វផ្សាយមួយ ដែលរដ្ឋអាជ្ញាអះអាងថា បានទិញដោយយកលុយពីមូលនិធិ ដែលបានមកពីកិច្ចសន្យារដ្ឋតាមរយៈក្រុមហ៊ុនក្លែងក្លាយជារបាំងមុខ (Front Company) ជាបន្តបន្ទាប់។
លោក ម៉ាទីណេលី បានបង្ហោះនៅលើបណ្ដាញសង្គមធ្វីតធឺរ កាលពីថ្ងៃ ១៣ ខែកក្កដា ដោយច្រានចោលការចោទប្រកាន់នេះថា៖ «នៅពេលដែលនយោបាយចូលតាមទ្វារ យុត្តិធម៌នឹងចេញពីបង្អួច»។
ជុំវិញការវិវត្តចុងក្រោយ លោកបានចាត់ទុកការកាត់ក្ដីលោក ថាជាទម្រង់មួយនៃការធ្វើទុក្ខបុកម្នេញផ្នែកនយោបាយ ហើយមេធាវីរបស់លោកបាននិយាយថា លោកនឹងប្តឹងឧទ្ធរណ៍។
កាលពីខែមុន លោក ម៉ាទីណេលី បានក្លាយជាបេក្ខជនផ្លូវការដំបូងគេដែលឈរឈ្មោះក្នុងការបោះឆ្នោតឆ្នាំ ២០២៤ របស់ប៉ាណាម៉ា បន្ទាប់ពីត្រូវបានជ្រើសរើសឱ្យតំណាងឱ្យគណបក្ស Realizando Metas ដែលលោកបង្កើតកាលពីពីរឆ្នាំមុន។ អ្នកនយោបាយរូបនេះ ធ្លាប់ដឹកនាំប៉ាណាម៉ា ចន្លោះពីឆ្នាំ ២០០៩ ដល់ ២០១៤។
បច្ចុប្បន្ន លោក ម៉ាទីណេលី ទទួលដីកាមិនឱ្យចាកចេញពីប្រទេសប៉ាណាម៉ា ដោយសារដំណើរការផ្លូវច្បាប់ខណៈកូនប្រុសពីរនាក់របស់លោកពីមុន ត្រូវបានកាត់ទោសដាក់ពន្ធនាគារនៅសហរដ្ឋអាមេរិកសម្រាប់ការជាប់ពាក់ព័ន្ធក្នុងគម្រោងលាងលុយ។អ្នកទាំងពីរនោះក៏ប្រឈមមុខនឹងការកាត់ទោសនៅប្រទេសប៉ាណាម៉ាផងដែរ៕
ប្រែសម្រួល៖ហួន ឌីណា ប្រភព៖ Panama’s ex-president sentenced to 10 years for money laundering
