រដ្ឋបាលរបស់ Biden ចង់បង្កើតទូរស័ព្ទក្រហមទៅកាន់ប្រទេសចិនសម្រាប់ការទំនាក់ទំនងបន្ទាន់
រដ្ឋបាល លោក Biden កំពុងពិនិត្យ មើលលទ្ធភាពនៃការបង្កើតបណ្តាញទូរស័ព្ទ បន្ទាន់ មួយខ្សែជាមួយ រដ្ឋាភិបាលចិនដែលស្រដៀងនឹងអ្វី ដែលហៅថា ទូរស័ព្ទក្រហម ដែលបង្កើតឡើង រវាងសហរដ្ឋអាមេរិកនិងសហភាពសូវៀត ក្នុងអំឡុងសង្រ្គាមត្រជាក់ដែលអនុញ្ញាតឱ្យមានការទំនាក់ទំនងផ្ទាល់ជាមួយ វិមានក្រឹមឡាំងជាវិធីដើម្បីបញ្ចៀសសង្គ្រាមនុយក្លេអ៊ែរ។
ខណៈគំនិតនេះនៅតែស្ថិតក្នុងភាព មិនទាន់អាចចេញជារូបរាងនៅឡើយទេ ហើយមិនទាន់ត្រូវបានលើកឡើង ជាផ្លូវការជាមួយចិនទេ។ រដ្ឋបាល លោកBiden ចង់បង្កើតឧបករណ៍ទំនាក់ទំនងយ៉ាងឆាប់រហ័ស ដែលជាផ្នែកមួយនៃកិច្ច ខិតខំប្រឹងប្រែងយ៉ាងទូលំទូលាយ ដើម្បីកាត់បន្ថយហានិភ័យនៃជម្លោះរវាងសហរដ្ឋអាមេរិកនិងចិន។
យោងតាមប្រភពទាំងពីរ បានអោយដឹង ថាបណ្តាញទូរស័ព្ទបន្ទាន់ទៅកាន់ទីក្រុងប៉េកាំងនឹងអនុញ្ញាតឱ្យលោកប្រធានាធិបតី Joe Biden ឬមន្ត្រីជាន់ខ្ពស់នៅក្នុងក្រុមសន្តិសុខជាតិរបស់លោកផ្ញើការហៅទូរស័ព្ទ ឬសារដែលមានសុវត្ថិភាពត្រឹមត្រូវទៅកាន់លោក ប្រធានាធិបតីស៊ី ជីនពីង ឬអ្នកដែលនៅជុំវិញលោក ស៊ី ឧទាហរណ៍ ព័ត៌មានបន្ទាន់អាចត្រូវបានចែករំលែក អំពីចលនាយោធាភ្លាមៗណាមួយ ឬសារព្រមានអំពីការ hack តាមបណ្តាញអ៊ីនធឺណិត។
គួររំលឹកដែរថាគំនិតនៃការបង្កើតបណ្តាញ ទូរស័ព្ទបន្ទាន់ជាមួយទីក្រុងប៉េកាំង មានតាំងពីយ៉ាងហោចណាស់ អំឡុងរដ្ឋបាលលោក អូបាម៉ា ទោះបីជាគំនិតនេះមិនត្រូវបានដាក់បញ្ចូលទៅក្នុងអនុស្សរណៈសន្តិសុខ ថ្នាក់ជាតិ។
ប្រភពពីមន្ត្រីរដ្ឋបាលលោក Biden បានឲ្យដឹងថាលោកBiden នៅតែចង់ អនុវត្តគំនិតនេះ ប៉ុន្តែ ព័ត៌មានលម្អិតជាច្រើន ថាតើប្រមុខដឹកនាំ ចិននឹងយល់ព្រម ប្រើប្រាស់ឧបករណ៍នេះដែរឬទេ តែវានៅតែមិនទាន់ច្បាស់នោះទេ ។ កន្លងមកមានបញ្ហា ជាច្រើនជាមួយនឹងការទទួលបានការឆ្លើយតប ឲ្យទាន់ពេល និងឆាប់រហ័ស ពីទីក្រុងប៉េកាំងនៅពេលដែលមានការចាំបាច់ឬ ការនិយាយអំពីបញ្ហាបន្ទាន់ជាដើម។
ប្រភពព័ត៌មានបានប្រាប់ CNN ថា មន្រ្តីនៃក្រសួងការបរទេស និងក្រុមប្រឹក្សាសន្តិសុខជាតិនៅតែកំពុងធ្វើការលើរបៀបវារះ ដែលឧបករណ៍នេះអាចដំណើរការបាន។ ហើយជំហានបន្ទាប់គឺការអភិវឌ្ឍគំនិតទូទៅ ហើយធ្វើវាទៅក្នុងផែនការរដ្ឋបាលរបស់ លោក Biden សម្រាប់ការចូលរួមជាមួយប្រទេសចិន។ បន្ទាប់មក ឧបករណ៍នេះនឹងត្រូវការការយល់ព្រម ពីសេតវិមាន និងពីមន្ត្រីចិនមុនពេលអនុវត្តជាផ្លូវការ ។
«វានឹងមានគុណសម្បត្តិច្រើនក្នុងការបង្កើតឧបករណ៍ប្រភេទនេះ សម្រាប់ការផ្ញើសារកម្រិតខ្ពស់ និងបន្ទាន់ជាមួយប្រទេសចិនស្តីពីកង្វល់ ទាក់ទងនឹងបច្ចេកវិទ្យា តាមអ៊ីនធឺណិត ប៉ុន្តែមេដឹកនាំទាំង២ ត្រូវតែប្រាកដ ថាវាត្រូវបានភ្ជាប់ដោយការយកចិត្តទុកដាក់ និងមានសុវត្ថិភាពខ្ពស់បំផុត Chris Painter អតីតអ្នកសម្របសម្រួលនៅក្រសួងការបរទេសសម្រាប់បញ្ហាអ៊ិនធឺរណែត ក្រោមការដឹកនាំរបស់ប្រធានាធិបតីបារ៉ាក់ អូបាម៉ាបាននិយាយ។ »
ប្រភព៖ CNN
