តើអ្វីទៅជា «វិបត្តិជំងឺផ្សិតខ្មៅ» នៅឥណ្ឌា?
ប្រទេសឥណ្ឌា បានរកករណី«ជំងឺផ្សិតខ្មៅ» (black fungus) ជាង ៤៥.០០០ ករណីក្នុងរយៈពេល ២ ខែចុងក្រោយនេះ។នេះបើតាមឱ្យដឹងពី រដ្ឋមន្រ្តីក្រសួងសុខាភិបាលឥណ្ឌាគឺ លោក Bharati Pravin Pawar ដោយក្នុងនោះមនុស្សជាង ៤.២០០ នាក់ បានស្លាប់ដោយសារជំងឺផ្សិតខ្មៅ ឬ mucormycosis នេះ។
ករណីឆ្លងនេះ ពីមុនត្រូវបានគេចាត់ទុកថាជាករណីកម្រ ប៉ុន្តែទើបផ្ទុះឡើងក្នុងកំឡុងពេលរីករាលដាលជំងឺកូវីដ១៩នេះ ពោលលើអ្នកជំងឺ ដែលជាសះស្បើយពីកូវីដ១៩។ វាគឺជាជំងឺកាចសាហាវ កើតមកពីក្រុមផ្សិត ដែលបណ្តាលឱ្យមានពងបែក ហើម និងដំបៅផងដែរ។
គ្រូពេទ្យ ត្រូវបង្ខំចិត្តវះកាត់ ភ្នែក ច្រមុះ និងថ្គាម ចេញពីអ្នកជំងឺ ដែលឆ្លងមេរោគនេះរួច ដើម្បីរារាំងកុំឱ្យរីក រាលដាលដល់ខួរក្បាល ហើយមានអត្រាមរណភាពខ្ពស់ជាង ៥០ ភាគរយ។ ហើយបើយោងតាមទិន្នន័យរបស់រដ្ឋាភិបាល រដ្ឋភាគខាងលិចនៃរដ្ឋ Maharashtra បានរកឃើញករណីផ្សិតខ្មៅនេះចំនួន ៩.៣៤៨ ករណី ដែលជាចំនួនខ្ពស់បំផុតនៅក្នុងប្រទេស។
ជំងឺផ្សិតខ្មៅនេះទៀតសោត បានក្លាយទៅជាទី ២ របស់ឥណ្ឌា បន្ទាប់ពីវិបត្តិកូវីដ១៩ ។ ឆ្នាំមុន កម្រិតនៃការឆ្លងជំងឺនេះនៅកម្រណាស់នៅឥណ្ឌា ទោះបីជាករណីក្នុងប្រទេសនេះមានកម្រិតខ្ពស់ជាងប្រទេសអភិវឌ្ឍន៍ជាង ៨០ ដងក៏ដោយ។
ជំងឺនេះបណ្តាលមកពីពពួកផ្សិត mucormycetes ជាប្រភេទនៃផ្សិត ដែលមនុស្សប៉ះពាល់រាល់ថ្ងៃ ប៉ុន្តែនៅពេល ដែលប្រព័ន្ធភាពស៊ាំរបស់បុគ្គលនោះ ត្រូវបានចុះខ្សោយដោយសារជំងឺកូវីដ ហើយបុគ្គលនោះនឹងប្រឈមនឹងការឆ្លងមេរោគនេះ។ ប្រសិនបើ អ្នកជំងឺមិនបានយកទៅព្យាបាលទាន់ពេលវេលានោះទេ ជំងឺនេះ អាចបណ្តាលឱ្យខូចមុខមាត់ បាត់បង់ចក្ខុវិស័យ និងស្លាប់ (អត្រាមរណភាពច្រើនជាង ៥០%)។
យោងតាមវេជ្ជបណ្ឌិតនានា បានអោយដឹងថា មានកត្តាជាច្រើននៅពីក្រោយការកើនឡើងនៃករណីជំងឺផ្សិតខ្មៅនេះ។ មន្ត្រីជាន់ខ្ពស់ផ្នែកសុខាភិបាលមកពីក្រុមការងារ Tasid របស់ប្រទេសឥណ្ឌា និងវិទ្យាស្ថានវិទ្យាសាស្ត្រវេជ្ជសាស្ត្រឥណ្ឌា បាននិយាយថាការប្រើប្រាស់ថ្នាំ steroids ច្រើនពេកក្នុងការព្យាបាលកូវីដ១៩ បានលុបបំបាត់ប្រព័ន្ធភាពស៊ាំរបស់អ្នកជំងឺ និងធ្វើឱ្យពួកគេងាយប្រឈមនឹងការវាយលុកនៃមេរោគផ្សិតនេះ។
នៅប្រទេសឥណ្ឌា ថ្នាំ steroids អាចត្រូវបានចេញវេជ្ជបញ្ជាដល់អ្នកជំងឺកូវីដ ដែលមានកម្រិតមធ្យម និងធ្ងន់ធ្ងរប៉ុណ្ណោះ ទោះបីជាគោលការណ៍ណែនាំចុងក្រោយបង្អស់ ដែលត្រូវបានចេញផ្សាយក្នុងខែ ឧសភា បានណែនាំឱ្យប្រើប្រាស់ថ្នាំនេះ ដោយ «ការវិនិច្ឆ័យត្រឹមត្រូវ» ដើម្បីការពារ និងកុំឱ្យប្រឈមនឹងការឆ្លងនៃផ្សិត mucormycosis ក៏ដោយ។
វេជ្ជបណ្ឌិតខ្លះ ក៏មានការសង្ស័យថា កង្វះអុកស៊ីសែនកម្រិតវេជ្ជសាស្ត្រ ក៏អាចដើរតួយ៉ាងសំខាន់ដែរ ដោយលើកហេតុផលថា កម្រិតអុកស៊ីសែនទាប និងយូរ អាចធ្វើឱ្យអ្នកជំងឺងាយនឹងឆ្លងមេរោគនេះ។
យ៉ាងណាមិញ ចំនួនករណីជំងឺផ្សិតខ្មៅ (black fungus) នៅឥណ្ឌាបច្ចុប្បន្ន មានចំនួនខ្ពស់ជាងកំឡុងពេលប្រទេសនេះប្រឈមនឹងរលកទី ១ កាលពីពេលថ្មីនេះ ហើយវាអាចបណ្តាលមកពីការរីករាលដាលយ៉ាងឆាប់រហ័សនៃវ៉ារ្យ៉ង់ Delta ក្នុងរលកក្រោយនេះ។
គួរបញ្ជាក់ផងដែរថា ជំងឺទឹកនោមផ្អែម (កម្រិតជាតិស្ករក្នុងឈាមកើនឡើងខ្ពស់) ជាលក្ខខណ្ឌដ៏ល្អឥតខ្ចោះសម្រាប់ផ្សិតទាំងនេះរស់នៅ។ នៅក្នុងប្រទេសឥណ្ឌា មនុស្សយ៉ាងហោច ៧៧ លាននាក់ មានជំងឺទឹកនោមផ្អែម (គិតត្រឹមឆ្នាំ ២០១៩ ស្ថិតក្នុងលំដាប់ទី ២ បន្ទាប់ពីប្រទេសចិន ដែលមានចំនួន ១១៦ លាននាក់)។ នេះបើយោងតាមសហព័ន្ធជំងឺទឹកនោមផ្អែមអន្តរជាតិ ដែលពន្យល់ពីមូលហេតុ ដែលករណីជំងឺផ្សិតខ្មៅនៅឥណ្ឌាកើនឡើងខ្ពស់។
បើយោងតាមក្រសួងសុខាភិបាលដដែលបានឱ្យដឹងថា ករណីជាច្រើនបានកើតឡើងនៅក្នុងប្រទេសឥណ្ឌា ហើយករណីមួយចំនួន តូចត្រូវបានគេរកឃើញនៅប្រទេសផ្សេងទៀត រួមមាន នេប៉ាល់ អាហ្វហ្គានីស្ថាន អេហ្ស៊ីប និងអូម៉ង់ផងដែរ។
អង្គការសុខភាពពិភពលោក(WHO) បាន និយាយថា ចំនួនករណីជំងឺទឹកនោមផ្អែម កំពុងតែកើនឡើងយ៉ាងលឿននៅក្នុងប្រទេស ដែលមានប្រាក់ចំណូលទាប និងមធ្យម ជាជាងប្រទេស ដែលមានប្រាក់ចំណូលខ្ពស់។ គួបផ្សំនឹងការកើនឡើងនៃករណីកូវីដផងនោះ វេជ្ជបណ្ឌិតនានា បានព្យាករណ៍ថា ជំងឺផ្សិតខ្មៅនេះ នឹងក្លាយជារឿងធម្មតានៅទូទាំងពិភពលោក។
ប្រភព៖ CNN
