បារាំងជំរុញឱ្យមានការស៊ើបអង្កេតបន្ថែម លើក្រុមហ៊ុនបច្ចេកវិទ្យាអ៊ីស្រាអ៊ែលធ្វើចារកម្មលើពិភពលោក
ប្រធានាធីបតីបារាំង លោក Emmanuel Macron ចេញថ្លែងការណ៍មួយទៅកាន់នាយករដ្ឋមន្រ្តីអ៊ីស្រាអែល គឺលោក Naftali Bennett ដើម្បីធានាឱ្យបានថារដ្ឋាភិបាលអ៊ីស្រាអែល នឹងស៊ើបអង្កេតយ៉ាងល្អិតល្អត់លើករណីមួយ ហើយប្រធានាធិបតីបារាំងចោទប្រកាន់ថាខ្លួនក្លាយជាគោលដៅចារកម្មរបស់ក្រុមហ៊ុនបច្ចេកវិទ្យាអ៊ីស្រាអែល។ នេះបើតាមឱ្យដឹងពីសារព័ត៌មាន The Guadian កាលពីពេលថ្មីៗនេះ។
លោក Macron បង្ហាញការព្រួយបារម្ភថាខ្សែរទូរស័ព្ទរបស់លោកជាមួយនឹងគណៈរដ្ឋមន្រ្តីភាគច្រើនអាចឆ្លងមេរោគ Pegasus ជាកម្មវិធីលួចស្តាប់ព័ត៌មានតាមទូរស័ព្ទបង្កើតឡើង ដោយក្រុមហ៊ុនឃ្លាំមើលអ៊ីស្រាអែល NSO អាចឱ្យប្រតិបត្តិករនៃកម្មវិធីនេះដកស្រង់សាររូបភាពនិងអ៊ីមែល កត់ត្រាការហៅទូរស័ព្ទ និងបើកមីក្រូហ្វូនដោយសម្ងាត់លើឧបករណ៍ដែលមានវីរុស។
ទិន្នន័យ database ដែលបានបែកធ្លាយចេញពីគម្រោង Pegasus មានរួមបញ្ចូលទាំងលេខទូរស័ព្ទដៃរបស់លោក Macron ផងដែរ។
យ៉ាងណាមិញ ក្រុមហ៊ុន NSO បាននិយាយថា លោក Macron មិនមែនជាគោលដៅរបស់អតិថិជនខ្លួនណាមួយទេ ពោលក្រុមហ៊ុនបដិសេធថា ខ្លួនមិនបានជ្រើសរើសលោក Macron ដើម្បី ជាគោលដៅក្នុងការឃ្លាំមើល ដោយប្រើមេរោគ Pegasus នោះទេ។ ក្រុមហ៊ុននិយាយថា ការពិតដែលថាលេខរបស់លោកមានវត្តមាននៅក្នុងបញ្ជី គឺមិនមានន័យថា លេខនោះត្រូវបានជ្រើសរើសសម្រាប់ការឃ្លាំមើល ដោយប្រើ Pegasus ទេ។
គម្រោង Pegasus មិនអាចពិនិត្យមើលទូរស័ព្ទចល័តរបស់មេដឹកនាំ និងអ្នកការទូតបានទេ ដូច្នេះមិនមានភស្ដុតាងណាមួយ ដែលអាចបញ្ជាក់ថា តើក្រុមហ៊ុននេះមានការប៉ុនប៉ងដំឡើងមេរោគនៅលើទូរស័ព្ទរបស់គោលដៅពួកគេឬយ៉ាងណាទេ។
ទោះយ៉ាងណា ការិយាល័យនាយករដ្ឋមន្រ្តី បានបដិសេធមិនធ្វើអត្ថាធិប្បាយលើការហៅទូរស័ព្ទ ឬ ការសន្ទនារបស់មេដឹកនាំទាំងពីរឡើយ។ តែបើយោងតាមប៉ុស្តិ៍លេខ ១២ របស់អ៊ីស្រាអែល ដែលបានរាយការណ៍អំពីសន្ទនាតាមទូរស័ព្ទរវាងមេដឹកនាំទាំងពីរ ប្រភពមិនបញ្ចេញឈ្មោះម្នាក់បាននិយាយថា លោក Bennett បានសង្កត់ធ្ងន់ថា ព្រឹត្តិការណ៍ ដែលបានចោទប្រកាន់ បានកើតឡើងមុនពេលគាត់ចូលកាន់តំណែងនៅខែ ឧសភា ហើយគណៈកម្មការរបស់ខ្លួនកំពុងពិនិត្យមើលថា តើច្បាប់ស្តីពីការវាយលុកតាមអ៊ីនធើណេតរបស់អ៊ីស្រាអែល ដូចជាគម្រោង Pegasus គួរតែត្រូវរឹតបន្តឹងបន្ថែមដែរឬយ៉ាងណា។
គម្រោង Pegasus ដែលមានសម្ព័ន្ធជាមួយប្រព័ន្ធផ្សព្វផ្សាយចំនួន ១៧ រួមទាំងកាសែត The Guardian ផងនោះ បានបង្ហាញកាលពីសប្តាហ៍មុនថា រដ្ឋាភិបាលដែលជាអតិថិជន របស់ខ្លួននៅជុំវិញពិភពលោក បានប្រើប្រាស់សូហ្វវែរ ទិញពីក្រុមហ៊ុន NSO ដើម្បីតាមដានលើសកម្មជនសិទ្ធិមនុស្ស អ្នកសារព័ត៌មាន និងមេធាវីនានា។
ការស៊ើបអង្កេត ធ្វើឡើងដោយផ្អែកលើការវិភាគកោសល្យវិច្ច័យលើទូរស័ព្ទ និងការវិភាគទិន្នន័យ ដែលបានលេចធ្លាយលេខទូរស័ព្ទចំនួន ៥០០០០ ក្នុងនោះរាប់បញ្ចូលទាំងលោក Macron និងប្រមុខរដ្ឋ និងរដ្ឋាភិបាលជាន់ខ្ពស់ មន្ត្រីការទូត និងយោធានៅក្នុងប្រទេសចំនួន ៣៤ លើពិភពលោក។
បើទោះជាក្រុមហ៊ុន NSO តែងតែធានាលេខទូរស័ព្ទ ដែលត្រូវបានលេចធ្លាយនេះ មិនត្រូវបានប្រើប្រាស់ជាគោលដៅនៃមេរោគ Pegasus ក្ដី ក៏បញ្ជីនេះត្រូវបានគេជឿជាក់ថា ផ្តល់នូវព័ត៌មាន អំពីអ្នកដែលត្រូវបានកំណត់អត្តសញ្ញាណជាមនុស្សដែលត្រូវបានគេកំណត់គោលដៅ ដោយអតិថិជនរបស់ក្រុមហ៊ុន NSO។
បញ្ជីនេះរួមបញ្ចូលទាំងលេខ ទូរស័ព្ទរបស់បុគ្គល ដែលត្រូវបានតាមដានដោយកម្មវិធីចារកម្មលួចទិន្នន័យតាមទូរស័ព្ទ របស់ក្រុមហ៊ុន NSO។ នេះបើយោងតាមការវិភាគរបស់ឧបករណ៍ Pegasus របស់ពួកគេ។ ការវិភាគនេះត្រូវបានធ្វើឡើង ដោយមន្ទីរពិសោធន៍សន្តិសុខរបស់អង្គការលើកលែងទោសអន្តរជាតិ ដែលបានរកឃើញដានទាក់ទងនឹងសកម្មភាពរបស់ឧបករណ៍ Pegasus លើទូរស័ព្ទចំនួន ៣៧ ក្នុងចំណោម ៦៧ ដែលខ្លួនបានវិភាគ។
ប្រភព៖ The Verge
