អាមេរិកនឹងបញ្ជូនយន្តហោះទម្លាក់គ្រាប់ទៅអាហ្វហ្គានីស្ថាន ដើម្បីបញ្ឈប់ក្រុមតាលីបង់
សហរដ្ឋអាមេរិកបញ្ជូនយន្តហោះទម្លាក់គ្រាប់បែក B-52 និងយន្តហោះបាញ់គ្រាប់ AC-130 Spectre ពីមូលដ្ឋានអាកាសនៅកាតាទៅអាហ្វហ្គានីស្ថានដើម្បីបញ្ឈប់ក្រុមឧទ្ទាមតាលីបង់ ដែលកំពុងពុះពារគ្រប់គ្រងក្រុងសំខាន់ៗបីរួមមានក្រុង Kandahar, Herat និង Lashkar Gah ។
ការផ្លាស់ប្តូរនេះ ធ្វើឡើងស្របពេលដែលស្ថានការណ៍នៅអាហ្វហ្កានីស្ថានកាន់តែអាក្រក់ទៅៗ ខណៈក្រុមតាលីបង់ចេះតែបន្តកាន់កាប់ទឹកដីនៅទូទាំងប្រទេស ក្រោយកងកម្លាំងអន្តរជាតិដឹកនាំដោយអាមេរិកចាប់ផ្ដើមដកថយកាលពីដើមខែឧសភា។ មន្ទីរបញ្ចកោណប៉ាន់ស្មានថា បច្ចុប្បន្នក្រុមនេះបានគ្រប់គ្រងពាក់កណ្តាលនៃស្រុកចំនួន ៤១៩ របស់អាហ្វហ្គានីស្ថាន។
យន្ដហោះប៊ូអ៊ីង B-52 Stratofortress គឺជាយន្តហោះទម្លាក់គ្រាប់បែកយុទ្ធសាស្ត្រ មានសមត្ថភាពអាចផ្ទុកគ្រាប់បែកបានរហូតដល់ ៣២ តោន។ យន្តហោះប្រភេទនេះ ត្រូវបានប្រើជាលើកដំបូងក្នុងអំឡុងពេលសង្គ្រាមត្រជាក់ និងដើរតួយ៉ាងសំខាន់ក្នុងការផ្តួលរំលំក្រុមតាលីបង់ពីអំណាចនៅចុងឆ្នាំ ២០០១។
អ្នកវិភាគផ្នែកសន្តិសុខលោក Mohammad Hassan បានប្រាប់សារព័ត៌មានអារ៉ាប់ថា៖ «វាកាន់តែអាក្រក់ទៅៗ ពីមួយថ្ងៃទៅមួយថ្ងៃ»។ លោកបន្តថា៖ «ការលុបចោលជើងហោះហើរទៅកាន់ក្រុង Herat និងការពិតដែលថាអាមេរិកបានចាប់ផ្តើមប្រើប្រាស់ B-52 មិនមែនជាសញ្ញាល្អនោះទេ។ វានឹងបង្កឱ្យមានការភ័យស្លន់ស្លោក្នុងចំណោមមនុស្សទូទៅ និងបង្ហាញពីភាពមិនច្បាស់លាស់នៃស្ថានការណ៍»។
ការដាក់ពង្រាយយន្តហោះទម្លាក់គ្រាប់បែក និងបាញ់គ្រប់របស់អាមេរិកចុងក្រោយនេះ បង្ហាញថា កងកម្លាំងអាហ្វហ្កានីស្ថាននៅតែពឹងផ្អែកលើការគាំទ្ររបស់អាមេរិក បើទោះបីរដ្ឋាភិបាលធ្លាប់និយាយថា ខ្លួនអាចគ្រប់គ្រងប្រទេសមិនឱ្យក្រុមបះបោរងើបរួចក្ដី។
យ៉ាងណាមិញ ជម្លោះ និងការប្រយុទ្ធគ្នា បានធ្វើឱ្យប្រជាជនអាហ្វហ្គានីស្ថានជាង ៤ ម៉ឺនគ្រួសារត្រូវផ្លាស់ទីលំនៅ រាប់ចាប់តាំងពីខែឧសភាមក។ នេះបើយោងតាមការប៉ាន់ស្មានរបស់រដ្ឋាភិបាលអាហ្វហ្គានីស្ថាន។
ប្រភព៖ Business Insider
