ប៉ូលីសថៃចោទប្រកាន់បុរសម្នាក់ ពីបទឃាតកម្មលើទេសចរជនជាតិស្វីស នៅកោះភូកេត
បាងកក៖ ប៉ូលីសថៃកាលពីថ្ងៃអាទិត្យ បានចោទប្រកាន់បុរសជនជាតិថៃម្នាក់ពីបទឃាតកម្មលើស្រ្តីអ្នកទេសចរដែលជាជនជាតិស្វីសកាលពីសប្ដាហ៍មុននៅរីសតមួយលើកោះភូកេត។
យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោក Krisana Pattanacharoen អ្នកនាំពាក្យរងប៉ូលីសបាននិយាយនៅក្នុងសន្និសីទសារព័ត៌មានថា ប៉ូលីសបានចោទប្រកាន់ជនល្មើសពីបទឃាតកម្ម និងប្លន់ដែលបណ្តាលឱ្យស្លាប់ ក៏ប៉ុន្តែមូលហេតុនៃការស្លាប់របស់ជនរងគ្រោះមិនទាន់ត្រូវបានបញ្ជាក់នៅឡើយទេ ហើយការធ្វើកោសល្យវិច័យមិនទាន់ត្រូវបានបង្ហាញដែរ។
ជនរងគ្រោះជនជាតិស្វីស ឈ្មោះ Nicole Sauvain-Weisskopf បានមកទស្សនាប្រទេសថៃក្រោមយុទ្ធនាការទេសចរណ៍ Sandbox ភូកេត ដែលអនុញ្ញាតឱ្យអ្នកភ្ញៀវទេសចរដែលបានចាក់វ៉ាក់សាំងពេញលេញចូលក្នុងកោះដោយមិនចាំបាច់ធ្វើចត្តាឡីស័កដរាបណាពួកគេស្នាក់នៅទីនោះពីរសប្តាហ៍។
លោក Nanthadet Yoinuan ស្នងការរងខេត្តបាននិយាយថា ជនសង្ស័យបានប្លន់ស្រ្តីរូបនេះនៅក្បែរទឹកជ្រោះកន្លែងដែលនាងស្វែងរកទិញផ្លែឈើ រួចយកលុយ ៩ ដុល្លារក្នុងកាបូបរបស់នាងទិញគ្រឿងញៀន ស្រា និងជួសជុលទូរស័ព្ទ។ លោកថា ជនល្មើសបានសារភាពចំពោះការប្រព្រឹត្តបែបនេះនៅពេលសួរចម្លើយ។
សុវត្ថិភាពភ្ញៀវទេសចរ គឺជាបញ្ហារសើបមួយសម្រាប់ប្រទេសថៃ ដោយសារវិស័យនេះ គឺជាឧស្សាហកម្មសំខាន់ដែលរកចំណូលបានជាង ១២ ភាគរយនៃផលិតផលក្នុងស្រុបសរុបរបស់ប្រទេសប្រចាំឆ្នាំ ២០១៩ ទោះបីជាពេលនេះ ថៃបានរងផលប៉ះពាល់យ៉ាងខ្លាំងពីការរីករាលដាលនៃជំងឺកូវីដ-១៩ក៏ដោយ។
ប្រភព៖ CNA
