របាយការណ៍ចារកម្មអាមេរិក៖ តាលីបង់អាចដណ្ដើមយក រដ្ឋធានីអាហ្វហ្គានីស្ថានក្នុងរយៈពេល៩០ថ្ងៃខាងមុខនេះ
ក្រុមឧទ្ទាមតាលីបង់អាចធ្វើការឡោមព័ទ្ធរដ្ឋធានីនៃប្រទេសអាហ្វហ្គានីស្ថានក្នុងរយៈពេល ៣០ ថ្ងៃខាងមុខ ហើយអាចដណ្ដើមយកការត្រួតត្រាទាំងស្រុងនៅក្នុងរយៈពេល ៩០ថ្ងៃខាងមុខ នេះបើតាមការលើកឡើងរបស់មន្ត្រីការពារជាតិអាមេរិកមួយរូបដោយផ្អែកលើរបាយការណ៍ចារកម្ម។
ក្នុងលក្ខខណ្ឌមិនបញ្ចេញអត្តសញ្ញាណ មន្ត្រីរូបនេះបានប្រាប់សារព័ត៌មានរ៉យទ័រ កាលពីថ្ងៃពុធនេះថា ការវាយតម្លៃថ្មីអំពីរយៈពេលដែលទីក្រុងកាប៊ុលអាចឈរបាន គឺជាលទ្ធផលនៃការកើនឡើងការវាយលុកយ៉ាងឆាប់រហ័សរបស់តាលីបង់ នៅពេលដែលកងកម្លាំងបរទេសដឹកនាំដោយអាមេរិកធ្វើការចាកចេញពីប្រទេសអាហ្វហ្គានីស្ថាន។
ប៉ុន្តែមន្ត្រីរូបនេះបាននិយាយថានេះ «មិនមែនជាការសន្និដ្ឋានចុងក្រោយទេ» ដោយសារកងកម្លាំងយោធាអាហ្វហ្គានីស្ថាននៅអាចបញ្ឈប់សំទុះការវាយលុករបស់ក្រុមតាលីបង់បាន ដោយធ្វើការតតាំងបន្ថែមទៀត។
លោក Waheed Omer ទីប្រឹក្សាជាន់ខ្ពស់របស់ប្រធានាធិបតីអាហ្វហ្គានីស្ថានលោក Ashraf Ghani បានច្រានចោលការព្យាករណ៍នេះ ដោយនិយាយថា៖ «វាជាពេលវេលាពិបាកសម្រាប់យើង ប៉ុន្តែយើងដឹងថាយើងនឹងឈ្នះ»។
លោក Omer និយាយថា៖ «ពួកគេបានដណ្ដើមការគ្រប់គ្រងទឹកដីខ្លះ ប៉ុន្តែវាមិនមែនអំពីទឹកដីទេ វាគឺអំពីប្រជាជន។ ប្រជាជនមិនចង់បានពួកគេទេ ហើយពួកគេនឹងដឹងថាពួកគេពិតជាមានកំហុសក្នុងការវាយប្រហារប្រជាជនរបស់យើង»។
កាលពីថ្ងៃអង្គារមន្ត្រីការទូតសហភាពអឺរ៉ុបមួយរូបបាននិយាយថាក្រុមតាលីបង់ត្រូវគេប៉ាន់ស្មានថាបានកាន់កាប់ ៦៥ ភាគរយនៃផ្ទៃដីប្រទេសអាហ្វហ្គានីស្ថាន និងបានកាន់កាប់ទីរួមខេត្តយ៉ាងហោចណាស់ចំនួន៩ ហើយកំពុងធ្វើការឡើងឡោមព័ទ្ធទីរួមខេត្តចំនួន ១១ ផ្សេងទៀត។
អង្គការសហប្រជាជាតិបាននិយាយថាក្នុងរយៈពេលមួយខែចុងក្រោយនេះជនស៊ីវិលជាង ១០០០ ត្រូវបានសម្លាប់ដោយការប្រយុទ្ធគ្នា។
គណៈកម្មាធិការនៃកាកបាទក្រហមអន្តរជាតិ (ICRC) បាននិយាយថាការប្រយុទ្ធគ្នាតាមចិញ្ចើមផ្លូវដ៏ខ្លាំងក្លាគឺកំពុងកើតឡើងនៅក្នុងទីក្រុង Kandahar ដែលទីក្រុងធំបំផុតទី ២ របស់អាហ្វហ្គានីស្ថាន។ ការប៉ះទង្គិចគ្នាដ៏ខ្លាំងក៏បានកើតឡើងនៅទីក្រុង Ghazni ផងដែរ បន្ទាប់ក្រុមតាលីបង់ចំណុចកណ្ដាលនៃទីក្រុងនេះ។
គ្រប់ច្រកចេញចូលរដ្ឋធានីកាប៊ុល ដែលស្ថិតជ្រលងឡោមព័ទ្ធដោយភ្នំ បានកកស្ទះសឹងទាំងអស់ដោយសារការហូរចូលនៃជនភៀសខ្លួនពីតំបន់នានានៃប្រទេសអាហ្វហ្គានីស្ថាន។ អ្នកវិភាគសន្តិសុខមួយចំនួនបានបង្ហាញការព្រួយបារម្ភអំពីលំហូរជនភៀសខ្លួនដោយសារគេមិនដឹងថាក្នុងចំណោមមនុស្សទាំងនេះមានសមាជិកក្រុមតាលីបង់ដែរ ឬទេ។
ដើម្បីប្រមូលផ្ដុំកងកម្លាំងគាំទ្ររដ្ឋាភិបាលលោកប្រធានាធិបតី Ashraf Ghaniបានហោះទៅទីក្រុង Mazar-i-Sharif ភាគខាងជើងប្រទេស ដែលជាតំបន់ប្រឆាំងក្រុមតាលីបង់។ លោកGhani បានជួបជាមួយមេដឹកនាំកងជីវពលជនជាតិអ៊ូបេគីស្ថាន Abdul Rashid Dostum និងមេដឹកនាំកងជីវពលជនជាតិតាហ្ស៊ីគីស្ថានលោក Atta Mohammad Noor ដើម្បីពិភាក្សាការប្រមូលផ្ដុំកងកម្លាំងជនជាតិភាគតិចទាំងនេះមកពង្រឹងកងទ័ពរដ្ឋាភិបាល ក៏ដូចជាការការពារទីក្រុងខាងលើផងដែរ។
អស់រយៈពេលជាច្រើនឆ្នាំមកហើយដែលលោក Ghani បានព្យាយាមកាត់បន្ថយអំណាចរបស់មេដឹកនាំកងជីវពលទាំងនេះ ដើម្បីពង្រឹងអំណាចរបស់រដ្ឋាភិបាល ប៉ុន្តែលោកបានងាកទៅរកពួកគេនៅពេលដែលរដ្ឋាភិបាលកំពុងជួបវិបត្តិដ៏ធំ។ កាលពីដើមសប្ដាហ៍លោក Ghani បានយល់ព្រមធ្វើការបំពាក់អាវុធជូនក្រុមជីវពលទាំងនេះ ដើម្បីជួយទប់ស្កាត់ការវាយលុករបស់តាលីបង់។ ទីក្រុង Mazar-i-Sharif មានទីតាំងនៅជិតព្រំដែនជាមួយប្រទេសអ៊ូបេគីស្ថាន និងតាហ្ស៊ីគីស្ថាន និងមជ្ឈមណ្ឌលសេដ្ឋកិច្ចដ៏ធំមួយសម្រាប់ពាណិជ្ជកម្មជាមួយប្រទេសទាំងពីរនេះ។ បើសិនទីក្រុងនេះដួលរលំ រដ្ឋាភិបាលអាហ្វហ្គានីស្ថាននឹងបាត់បង់ការគ្រប់គ្រងតំបន់ភាគខាងជើង ហើយអាចធ្វើឱ្យមានការបាក់ទឹកចិត្តក្នុងចំណោមកងកម្លាំងរដ្ឋាភិបាល៕
ប្រភព៖ Reuters
