ឆ្នាំជូត

សម្រាប់លោកអ្នកដែលកើតឆ្នាំជូត នាមសត្វកណ្តុរ ធាតុទឹក ពង្សទេវតាប្រុស។ រាសីលោកអ្នកថ្ងៃនេះល្អជាមធ្យម។ សូមលោកអ្នកចាប់ផ្តើមពិនិត្យ វាយតម្លៃ និងកែប្រែវិធីសាស្រ្តការងារជាថ្មី។ ក្នុងពេលនេះ ភាគច្រើនអ្នកកំពុងផ្លាស់ប្តូរការងារ និងអាជីវកម្មទៅរកទិសដៅត្រឹមត្រូវ។ លោកអ្នកមានលទ្ធភាពបំពេញការងារដោយជោគជ័យគួរឲ្យកត់សម្គាល់។ ប៉ុន្តែក្នងនោះសូមកុំបោះចោលចំណេះដឹង និងបទពិសោធន៍របស់មិត្តរួមការងារ ឬដៃគូប្រជែងរបស់អ្នក។ សូមប្រុងប្រៀប ហើយបើកឳកាសឲ្យខ្លួនឯងដើម្បីស្វែងរកចំណេះដឹងវិជ្ជាជីវៈ និងបទពិសោធន៍។ ក្រៅពីនេះសូមលោកអ្នកមានចិត្តសណ្តោយប្រណីចំពោះមនុស្សចាស់ដែលនៅក្បែរខ្លួន។

ឆ្នាំឆ្លូវ

សម្រាប់លោកអ្នកដែលមានកំណើតឆ្នាំឆ្លូវ នាមសត្វគោ ធាតុដី ពង្សមនុស្សប្រុស។​ រាសីអស់លោកអ្នកថ្ងៃនេះឡើងខ្ពស់ត្រដែត។  ថ្ងៃនេះជាពេលអំណោយផលសម្រាប់ការពិភាក្សា ឬចរចាកិច្ចការងារសំខាន់ លោកអ្នកអាចក្លាយទៅជាប្រមុខនៃកិច្ចការទាំងឡាយ។ ទន្ទឹមនឹងនោះពាក្យសំដី និងមតិយោបល់របស់អ្នកអាចទទួលបានការគាំទ្រណាស់ ហើយអ្នកក៏អាចឈានទៅដល់ការយល់ដឹងស្ថានភាពជុំវិញខ្លួនយ៉ាងឆាប់រហ័ស និងងាយស្រួលផងដែរ។ ដោយឡែក អាស្រ័យដោយលោកអ្នកអាចនឹងខ្សត់ខ្សោយពេលវេលាបន្តិច ដូច្នេះសូមជ្រើសរើសការងារអាទិភាព ហើយព្យាយាមបំពេញឲ្យបានរួសរាន់។

ឆ្នាំខាល

សម្រាប់លោកអ្នកដែលមានកំណើតឆ្នាំខាល នាមសត្វខ្លា ធាតុឈើ ពង្សយក្សស្រី។ រាសីអស់លោកអ្នកស្រុតចុះ។ សូមលោកអ្នកកុំរំពឹងទៅលើអាជីពដែលកំពុងដំណើរការក្នុងពេលនេះច្រើនពេក ពីព្រោះផលចម្រើនលូតលាស់ហាក់នៅតឹងតែងនៅឡើយ។ ចំពោះការធ្វើទំនាក់ទំនងតូចធំគឺអាចទៅរួច ប៉ុន្តែការជឿជាក់សូមឲ្យមានកំរិត។ ក្រៅពីនេះហាមដាច់ចខាតចំពោះជំហានដែលគ្មានផែនការ ពីព្រោះស្ថានភាពខាងក្រៅកំពុងមានឥទ្ធិពលយ៉ាងខ្លាំងដល់អាជីពរបស់អ្នក។ ក្នុងនោះដែរ ដើម្បីបញ្ចៀសពីបញ្ហាមួយចំនួន សូមលោកអ្នកព្យាយាមយល់ដឹងពីស្ថានការណ៍ និងគួរតែធ្វើទំនាក់ទំនងបន្ថែមជាមួយថ្នាក់លើ​។

ឆ្នាំថោះ

សម្រាប់លោកអ្នកដែលមានកំណើតឆ្នាំថោះ នាមសត្វទន្សាយ ធាតុឈើ ពង្សមនុស្សស្រី។ រាសីអស់លោកអ្នកថ្ងៃនេះល្អជាមធ្យម។ ក្នុងពេលនេះសូមកុំខ្ជះខ្ជាយពេលវេលាទៅនិយាយ ឬធ្វើកិច្ចការដែលឥតប្រយោជន៍ ពីព្រោះលោកអ្នកមិនសូវមានពេលវេលាបំពេញការងារឲ្យបានចប់ចុងចប់ដើមដោយងាយស្រួលទេ។ ក្រៅពីនេះមានបញ្ហាខ្លះដែលមិនទាន់អាចកំណត់ទំហំនៅឡើយ ដូច្នេះការរស់នៅដោយប្រុងប្រយ័ត្នជាការល្អប្រសើរបំផុត។ ក្រៅពីនេះសូមគិតគូរពីការបង្កើនកំរិតវិជ្ជាជីវៈ​ ការតុបតែងខ្លួនប្រាណ និងការផ្សព្វផ្សាយពាណិជ្ជកម្មចំពោះផលិតផលបន្ថែម។

ឆ្នាំរោង

​សម្រាប់លោកអ្នកដែលមានកំណើតឆ្នាំរោង នាមសត្វនាគ ធាតុមាស ពង្សទេវតាប្រុស។ រាសីអស់លោកអ្នកក្នុងថ្ងៃនេះឡើងខ្ពស់ត្រដែត។ ថ្ងៃនេះមានអំណោយផលសម្រាប់អាជីវកម្ម សូមធ្វើយ៉ាងណាកុំឲ្យមានការខកខានឳកាសសំខាន់ៗទាំងនេះ។ ចំពោះលោកអ្នកមានមានក្តីប៉ងប្រាថ្នាបង្កើតការងារ ឬផ្លាស់ប្តូរស្ថានភាពការងារ ដំណើរការថ្ងៃនេះនឹងទទួលបានផលច្រើន។ ប៉ុន្តែសូមចងចាំថា លោកអ្នកអាចនឹងពិបាកក្នុងការពឹងពាក់អាស្រ័យមនុស្សដែលនៅក្បែរខ្លាំងណាស់ បើយកល្អគួរបំពេញការងារដោយខ្លួនឯង។ ក្នុងនោះដែរ សូមមានការអត់ធ្មត់ ហើយជៀសវាងការដោះស្រាយបញ្ហាច្រើនក្នុងពេលតែមួយ ពីព្រោះលោកអ្នកមិនអាចអាចមានលទ្ធភាពពេញលេញនៅឡើយ។

ឆ្នាំម្សាញ់

សម្រាប់លោកអ្នកដែលមានកំណើតឆ្នាំម្សាញ់ នាមសត្វពស់ ធាតុភ្លើង ពង្សមនុស្សប្រុស។ ​​ រាសីអស់លោកអ្នកថ្ងៃនេះល្អជាមធ្យម។ ថ្ងៃនេះជាពេលវេលាមានអំណោយផលសម្រាប់ការបង្កើតមុខរបរការងារ ការបណ្តាក់ធុន ហើយចំពោះលោកអ្នកដែលមិនពេញចិត្តនឹងកន្លែងការងារបច្ចុប្បន្នអាចផ្លាសប្តូរបាន។ បញ្ហាសំខាន់ដែលអាចបង្អាក់ដំណើររីកចម្រើននៃការងារថ្ងៃនេះទាក់ទងនឹងមន្ទិលសង្ស័យ ដូច្នេះសូមលោកអ្នកវែកញែក និងវាយតម្លៃចំពោះពត៌មានដែលអ្នកទទួលបាន។ ក្រៅពីនេះ ការចេញដំណើរឆ្ងាយសូមត្រៀមរាល់ឯកសារសំខាន់​ ពីព្រោះមានស្ថានភាពខ្លះអាចនឹងប្រែប្រួលលឿន ហើយក៏ត្រូវការការសម្រេចចិត្តភ្លាមៗផងដែរ។ ដោយឡែក ចូរចៀសវាងមនុស្សសំដីផ្អែម។

ឆ្នាំមមី

សម្រាប់លោកអ្នកដែលមានកំណើតឆ្នាំមមី នាមសត្វសេះ ធាតុភ្លើង ពង្សទេវតាសី្រ។ រាសីអស់លោកអ្នកនៅក្នុងថ្ងៃនេះល្អជាមធ្យម។ អ្វីៗក្នុងពេលនេះដំណើរទៅដោយរលូន ដូច្នេះមិនចាំបាច់ត្រូវព្រួយបារម្ភអំពីស្ថានភាពហិរញ្ញវត្ថុរបស់អ្នកច្រើនពេកនោះទេ។ ​បើទោះបីជាវាអាចប៉ះពាល់តិចតួចក្តី អ្វីៗក៏អាចប្រែប្រួលទៅជាល្អប្រសើរក្នុងពេលឆាប់ៗ។ ក្នុងថ្ងៃនេះលោកអ្នកទទួលបានអំណោយផលក្នុងការគិត និងគ្រប់គ្រង ដូច្នេះលោកអ្នកអាចប្រើប្រាស់បញ្ញដើម្បីទទួលបានការទំនាក់ទំនងរឹងមាំជាមួយមនុស្សនៅជុំវិញខ្លួន។ ប៉ុន្តែសញ្ញាណនៃជម្លោះ ការមិនយល់ចិត្តថ្លើម ឬគំនិតខ្លាចរអាមានឥទ្ធិពលណាស់ ដូច្នេះការគ្រប់គ្រងពាក្យសំដី និងកាយវិការជាចំណុចសំខាន់។

ឆ្នាំមមែ

សម្រាប់លោកអ្នកដែលមានកំណើតឆ្នាំមមែ នាមសត្វពពែ ធាតុមាស ពង្សទេវតាសី្រ។ រាសីអស់លោកអ្នកថ្ងៃនេះស្រុតចុះ។ ពេលនេះមិនមែនជាពេលវេលាល្អបំផុតដើម្បីស្វែងរកការងារថ្មី ការបណ្តាក់ទុន ឬចរចាការងារតូចធំនោះទេ។ បើទោះបីជការងារហាក់មិនទាន់អាចទទួលបានផលតាមការប៉ងប្រាថ្នា អ្នកក៏អាចមានលទ្ធភាពគ្រប់គ្រងអាជីពបានល្អ ហើយប្រសិនបើអ្នកអាចគ្រប់គ្រងបានល្អ នោះដំណឹងរីករាយក៏អាចនឹងកើតឡើងក្នុងអណាគតដ៏ខ្លីខាងមុខដែរ។ ដោយឡែក ការវាតតម្លៃហាក់មិនសូវបានល្អទេ ដូច្នេះការសំងំស្ងៀម ស្តាប់ច្រើនជាងនិយាយ និងការយោគយល គឺអាចផ្តល់នូវជំហានយ៉ាងវិជ្ជមាន។

ឆ្នាំវក

សម្រាប់លោកអ្នកដែលមានកំណើតឆ្នាំវក នាមសត្វស្វា ធាតុដែក ពង្សយក្សប្រុស។ រាសីលោកអ្នកក្នុងថ្ងៃនេះល្អមធ្យម។ សូមលោកអ្នកព្យាយាមរកពេលវេលាដើម្បីទំនាក់ទំនងជាមួយអាជ្ញាធរ ប្រសិនបើអ្នកអាចធ្វើបាន។ អ្វីៗអាចឈានដល់ការយល់ដឹងលើបញ្ហាជាច្រើន និងអាចរកច្រកចេញពីបញ្ហាទាំងនោះផងដែរ។ ចំពោះអាជីវករ សូមគ្រប់គ្រងលំហូរផលិតផល ផ្សព្វផ្សាយពាណិជ្ជកម្ម និងកែប្រែសោភណ្ឌភាពជានិច្ច។ លោកអ្នកកំពុងស្ថិតក្នុងស្ថានភាពពាក់កណ្តាលទីរវាងភាពជោគជ័យធំ និងបញ្ហា ដូច្នេះការចាយវាយបោះទុន សូមពិចារណា។ ទន្ទឹមនឹងនោះ សូមកុំភ្លេចខ្លួន ដោយជឿជាក់លើគេជ្រុលពេក។

ឆ្នាំរកា

សម្រាប់លោកអ្នកដែលមានកំណើតឆ្នាំរកា នាមសត្វមាន់ចែ ធាតុដែក ពង្សយក្សប្រុស។ រាសីអស់លោកអ្នកក្នុងថ្ងៃនេះឡើងខ្ពស់ត្រដែត។ ថ្ងៃនេះមានអំណោយផលសម្រាប់អាជីវកម្ម ដូច្នេះសូមព្យាយាមមិនឲ្យខកខានឳកាសរកប្រាក់ចំណេញឡើយ។ លោកអ្នកគួរចេញទៅក្រៅដើម្បីប្រឈមជីវិតជាមួយស្ថានភាពជាច្រើន ពីព្រោះទីនោះក៏ជាប្រភពនៃឳកាសប្រមូលទ្រព្យ និងភាពជោគជ័យដែរ។​ ដោយឡែក លោកអ្នកដែលប្រកបការងាររដ្ឋ និងឯកជនអាចនឹងទទួលបានអំណោយផលលើការតាំងបង្ហាញគម្រោង ដាក់ចេញផែនការអនុវត្តការងារឲ្យសម្រេចផលបានល្អ។ ឧបស័គ្គធំបំផុតក្នុងពេលនេះ គឺការបាត់បង់ជំនឿចិត្ត ព្រោះការភ្ជាប់ខ្លួនជាមួយនឹងបញ្ហាអតីត។  

ឆ្នាំចរ

សម្រាប់លោកអ្នកដែលមានកំណើតឆ្នាំចរ នាមសត្វឆ្កែ ធាតុដី ពង្សយក្សស្រី។ រាសីលោកអ្នកក្នុងថ្ងៃនេះឡើងខ្ពស់ត្រដែត។ រាល់អាជីពការងាររបស់អ្នកមានដំណើរការល្អប្រសើរ។ មនុស្សជាច្រើនដែលនៅជុំវិញអ្នកមានចិត្តសណ្តោសប្រណី និងជួយយកអាសារណាស់ ដូច្នេះមិនមានបញ្ហាណាមួយគួរឲ្យព្រួយបារម្ភនោះទេ។ ហេតុផលចំបងសម្រាប់លោកអ្នក គឺការខំប្រឹងប្រែងធ្វើការងារ បញ្ចប់ និងដោះស្រាយបញ្ហាកន្លងមកដែលនៅសេសសល់ទើបជាការល្អប្រសើរ។ ដោយឡែក ថ្ងៃនេះមានអំណោយផលដល់ការកសាង ដូច្នេះប្រសិនបើអ្នកមានបំណងបង្កើតមុខរបរថ្មី កសាងផ្ទះសម្បែងនោះនឹងកើតលាភសំណាង និងភោគទ្រព្យល្អប្រសើរពេកក្តាត់។

ឆ្នាំកុរ​

សម្រាប់លោកអ្នកដែលមានកំណើតឆ្នាំកុរ  នាមសត្វជ្រូក ធាតុទឹក ពង្សមនុស្សស្រី។ រាសីអស់លោកអ្នកល្អជាមធ្យម។ ក្នុងពេលនេះសូមរក្សាស្ថានភាពការងាររបស់អ្នកឲ្យនៅធម្មតាសិន។ ភាពចម្រើនលូតលាស់ និងប្រតិបត្តិការងាយស្រួល គឺអាចសម្រេចទៅបាន ប៉ុន្តែក៏ត្រូវការពេលវេលា និងកំលាងកាយចិត្តច្រើនផងដែរ។ ប៉ុន្តែប្រសិនបើអ្នកអាចផ្អាកការសម្រេចចិត្ត ឬការផ្លាស់ប្តូរស្ថានភាពការងារបានគួរតែផ្អាកសិន ពីព្រោះប្រសិនបើគ្មានបញ្ហាក្តី ក៏ទិន្នផលមិនទាន់ល្អប្រសើរណាស់ណានោះទេ។ ចំណុចសំខាន់ដែលត្រូវជៀសវាងក្នុងពេលនេះ គឺភាពឆេវឆាវ រឹងទន្ទឹង មិនការមិនយោគយល់។ អ្នកគួររក្សាភាពស្ងៀមស្ងាត់ ហើយច្រានចោលរាល់មតិរិះគន់ឈ្នានីសទាំងឡាយ។

ចំណាំ៖

ឆ្នាំទាំង៤ ឆ្លូវ រោង រកា ចរ រាសីរបស់លោកអ្នកឡើងខ្ពស់ត្រដែត។ ថ្ងៃនេះលាភសំណាង មុខតំណែង និងឳកាសការងារជាច្រើន ព្រមទាំងភាពរីករាយនឹងកើតឡើងចំពោះលោកអ្នក។