វ៉ាក់សាំងការពារជំងឺកូវីដ-១៩ ប្រភេទវ៉ាក់សាំងស៊ីណូវ៉ាក់ ចំនួន ៣លានដូសទៀត ដែលជាវ៉ាក់សាំងបញ្ជាទិញពី រដ្ឋាភិបាលចិននឹងដឹកមកដល់កម្ពុជានៅថ្ងៃអង្គារស្អែកនេះ។

រដ្ឋលេខាធិការក្រសួងសុខាភិបាល លោកស្រី យក់ សម្បត្តិ បានបញ្ជាក់នៅថ្ងៃនេះ ជុំវិញវ៉ាក់សាំងស៊ីណូវ៉ាក់៣លានដូសដែលនឹងមកដល់នៅថ្ងៃទី២៨កញ្ញា ដែលជា  វាក់សាំងសម្រាប់ ចាក់ជូនកុមារអាយុ ៦ ឆ្នាំ ដល់ ១២ ឆ្នាំ និងសម្រាប់ការចាក់ដូសជំរុញ ជូនមនុស្សពេញវ័យ។

លោកជំទាវ បានបញ្ជាក់ទៀតថា បើរាប់ទាំងវ៉ាក់សាំងដែលនឹងមកដល់ថ្ងៃអង្គារ៍ស្អែកនេះ រួម ទាំងវ៉ាក់សាំង ជំនួយនិងវ់ាក់សាំងបញ្ជាទិញ កម្ពុជាមានវ់ាក់សាំងសរុបចំនួន៣៥លាន៥សែនដូសហើយ។ លោកជំទាវ យក់ សម្បត្តិ បានបញ្ជាក់បន្ថែមទៀតថា នៅក្នុងខែតុលា ឆ្នាំ ២០២១ ខាងមុខនេះ វ៉ាក់សាំងជំនួយពីប្រទេសចិនចំនួន ៣លានដូសទៀត នឹងត្រូវដឹកមកដល់កម្ពុជាជាបន្ថែមទៀតផងដែរ៕