គម្រោងបង្កើតអណ្ដូងរ៉ែលីចូម ត្រូវបរាជ័យដោយសារតែការជំទាស់ពីក្នុងស្រុក
គម្រោងបង្កើតអណ្ដូងរ៉ែដ៏ធំបំផុតមួយនៅអឺរ៉ុបក្បែរទីក្រុងបេតិកភ័ណ្ឌពិភពលោក Cáceres របស់វិនិយោគគិនបរទេសនៅប្រទេសអេស្ប៉ាញ ធ្វើឱ្យមានការប្រឆាំងយ៉ាងដាច់អហង្ការពីសំណាក់ប្រជនជនក្នុងស្រុក។ បញ្ហានេះបានគូសបញ្ជាក់ពីរឿងប្រឈមចំពោះផែនការរបស់ប្រទេសក្នុងការប្រើមូលនិធិសហភាពអឺរ៉ុបដើម្បីអភិវឌ្ឍឧស្សាហកម្មទាញយកលីចូម ដែលជាធាតុសំខាន់សម្រាប់ផ្តល់ថាមពលដល់រថយន្តអគ្គិសនី និងផ្ទុកថាមពលទ្រង់ទ្រាយធំ។
ការអភិវឌ្ឍន៍បច្ចេកវិទ្យាជំនាន់ថ្មីនេះ គឺជាអាទិភាពនៅទូទាំងទ្វីបអឺរ៉ុបនៅពេលដែលក្រុមហ៊ុនផលិតរថយន្តប្រឈមនឹងការប្រកួតប្រជែងដ៏ខ្លាំងក្លាពីក្រុមហ៊ុនផលិតនៅប្រទេសចិន និងកន្លែងផ្សេងទៀត ស្របពេលដែលប្រទេសចិនក៏ជាអ្នកគ្រប់គ្រងលីចូមមួយភាគធំនៅទូទាំងពិភពលោកផងដែរ។
លោក David Valls អ្នកគ្រប់គ្រងប្រចាំប្រទេសរបស់ក្រុមហ៊ុន Infinity Lithium ដែលជាក្រុមចុះបញ្ជីនៅអូស្ត្រាលីមានគម្រោងចង់អភិវឌ្ឍអណ្តូងរ៉ែនេះនិយាយថា៖ «ថ្មលីចូមមិនគ្រាន់តែត្រូវការរយៈពេល ១០ ឆ្នាំខាងមុខទៀតទេ។ វាគឺជាអ្វីដែលទាមទារឱ្យមានការវិនិយោគដ៏ធំដោយវិស័យរថយន្ត ដែលនឹងចាំបាច់សម្រាប់រយៈពេលពី ៣០ ទៅ ៤០ ឆ្នាំខាងមុខជាអប្បបរមា»។
ប៉ុន្តែមហិច្ឆតាដើម្បីធានាបាននូវធនធានដែលមានសារៈសំខាន់សម្រាប់ថាមពលស្អាត ធ្វើឱ្យប៉ះពាល់ដល់បរិស្ថាន ហើយកាលពីខែកក្កដាឆ្នាំមុន អាជ្ញាធរអង្គការសហប្រជាជាតិបានសម្តែងការព្រួយបារម្ភដោយផ្ញើលិខិតមួយទៅក្រុមប្រឹក្សាក្រុងអំពីផលវិបាកដែលអាចកើតមានប្រសិនបើគម្រោងទាញយកលីចូមត្រូវបានអនុម័ត។
នៅទីក្រុងCáceres លោក JoséRamón Bello ប្រធានផ្នែករៀបចំផែនការទីក្រុង ប្តេជ្ញាចិត្តថាផែនការរបស់ក្រុមហ៊ុន Infinity នឹងមិនដើរទៅមុខទៀតទេ។ លោកនិយាយថា គម្រោងបានលុបចោលហើយ ដោយសមាជិកក្រុមប្រឹក្សា ២២ នាក់ក្នុងចំណោម ២៥ នាក់របស់ក្រុងជំទាស់នឹងផែនការនេះ ហើយច្បាប់មូលដ្ឋានក៏មិនរាប់បញ្ចូលអណ្តូងរ៉ែនៅលើទីតាំងនោះដែរ។
លោក Bello បន្តថា៖ «ជាជាងបង្កើតអណ្តូងរ៉ែដែលបង្កការគំរាមកំហែងដល់បេតិកភណ្ឌរបស់យើង យើងបានជ្រើសរើសធ្វើឱ្យវិស័យទេសចរណ៍របស់យើងរស់ឡើងវិញ ហើយផ្តោតលើឧស្សាហកម្មស្អាតនិងនិរន្តរភាព»។ លោកបន្ថែមថា៖ «យើងមិនប្រឆាំងនឹងការទាញយកលីចូមទេ តែយើងប្រឆាំងនឹងទីតាំងរបស់គម្រោងអណ្តូងរ៉ែ»។
ក្រុមអ្នកប្រឆាំងនឹងគម្រោងអណ្ដូងរ៉ែមានជ័យជម្នះ ដោយក្រុមហ៊ុនបាត់បង់លិខិតអនុញ្ញាតស្រាវជ្រាវ និងត្រូវប្រឈមមុខរយៈពេលយូរក្នុងការតតាំងនៅតុលាការ។ ប៉ុន្តែកន្លែងផ្សេងទៀតនៅជុំវិញតំបន់ស្វយ័ត Extremadura គូសបង្ហាញពីភាពមិនស្មើរគ្នារវាងបរិស្ថាន និងសេដ្ឋកិច្ចដោយសារការផ្លាស់ប្តូរទៅប្រើថាមពលស្អាត។
រដ្ឋាភិបាលរបស់ Extremadura និយាយថា រ៉ែលីចូមអាចផ្លាស់ប្តូរជោគវាសនារបស់តំបន់ ដែលសព្វថ្ងៃដើរក្រោយតំបន់ផ្សេងៗទៀតនៃប្រទេស។ តំបន់នេះសង្ឃឹមថា ជំនួយពីមូលនិធិស្តារឡើងវិញចំនួន ៨០០ ប៊ីលានអឺរ៉ូរបស់សហភាពអឺរ៉ុបនឹងជួយមិនត្រឹមតែនាំយករ៉ែលីចូមប៉ុណ្ណោះទេ ថែមទាំងជួយបង្កើតចង្កោមឧស្សាហកម្មទំនើបទៀតផង។
លោកស្រី Olga García មន្ត្រីបរិស្ថានកំពូលរបស់រដ្ឋាភិបាលក្នុងតំបន់និយាយថា៖ «អឺរ៉ុបដីគោកមិនសូវមានលីចូម ហើយនេះគឺជាគុណសម្បត្តិប្រកួតប្រជែងសម្រាប់តំបន់ Extremadura។ ដោយសារយើងមានវត្ថុធាតុដើម វាសមហេតុផលដែលមានខ្សែចង្វាក់តម្លៃផងដែរ»។
លោកស្រី និងមន្រ្តីផ្សេងទៀតនៅតំបន់ Extremadura កំពុងគាំទ្រគម្រោងថាប្រសិនបើមានមហិច្ឆតាជាងអ្វីដែលស្នើធ្វើនៅក្រុង Cáceres ។ វានឹងត្រូវអមដោយហេដ្ឋារចនាសម្ព័ន្ធឧស្សាហកម្មថ្មីនៅទូទាំងតំបន់ រួមមានរោងចក្រផលិតថ្មពិល និងរោងចក្រកាតូត ដោយត្រូវការការវិនិយោគជាង ១ ប៊ីលានអឺរ៉ូ រួមទាំង ៨៥ លានអឺរ៉ូសម្រាប់អណ្តូងរ៉ែ និង ២០០ លានអឺរ៉ូសម្រាប់បរិក្ខារពាក់ព័ន្ធដើម្បីដំណើរការលីចូម។
លោក Ignacio Baños នាយកប្រតិបត្តិក្រុមហ៊ុន Lithium Iberia ដែលជាក្រុមហ៊ុនអភិវឌ្ឍរ៉ែនៅស្រុក Cañaveral ប្រមាណជា ៤០ គីឡូម៉ែត្រពីក្រុង Cáceres និយាយថា៖ «ក្រុមហ៊ុនមកពីទូទាំងទ្វីបអឺរ៉ុបមានទំនាក់ទំនងជាមួយយើង ដោយពួកគេដឹងថាការព្រួយបារម្ភដ៏ធំមួយរបស់សហភាពអឺរ៉ុប គឺការទទួលបានការគ្រប់គ្រងវត្ថុធាតុដើម»។
យ៉ាងណាមិញ លោកស្រី Yolanda Ruiz ដែលជាអ្នកធ្វើយុទ្ធនាការប្រឆាំងនឹងអណ្តូងរ៉ែចង្អុលបង្ហាញថា វានឹងស្ថិតនៅចន្លោះតំបន់អភិរក្សបក្សីពីរ និងក្បែរព្រៃបុរាណ។ លោកស្រីនិយាយថា៖ «យើងរក្សាធម្មជាតិទាំងអស់នេះពីព្រោះរដ្ឋាភិបាលមិនយកចិត្តទុកដាក់ពីប្រវត្តិសាស្រ្តក្នុងតំបន់ Extremadura»។
អ្នកគ្រប់គ្រងអណ្តូងរ៉ែសង្ឃឹមថា ខ្លួននឹងឈ្នះការអនុម័តសម្រាប់ប្រតិបត្តិការពាណិជ្ជកម្មនៅឆ្នាំក្រោយ ហើយចាប់ផ្តើមផលិតនៅចុងឆ្នាំ ២០២៣ ។ ក្រុមហ៊ុន Seat ដែលជាក្រុមហ៊ុនផលិតរថយន្តឈានមុខគេរបស់អេស្ប៉ាញ និងជាផ្នែកមួយនៃក្រុមហ៊ុន Volkswagen ចង់ចាប់ផ្តើមផលិតរថយន្តអេឡិចត្រូនិកដែលមានតំលៃថោកនៅឆ្នាំ ២០២៥ ដោយសង្ឃឹមថានឹងអាចជំនួសរថយន្តប្រើសាំង និងម៉ាស៊ូត។
លោក Mario Celdrán នាយកប្រតិបត្តិនៃក្រុមហ៊ុន Phi4tech ដែលជាក្រុមហ៊ុនគ្រោងនឹងសាងសង់រោងចក្រផលិតថ្មពិល និងរោងចក្រកាតូត និយាយថា ក្រុមរបស់លោកនឹងផ្តោតការយកចិត្តទុកដាក់បន្ថែមលើតម្រូវការពីអ្នកផលិតថាមពលកកើតឡើងវិញ និងមជ្ឈមណ្ឌលទិន្នន័យ។
យ៉ាងណាមិញ លោក Celdrán ដែលសង្ឃឹមលើហិរញ្ញប្បទានរហូតដល់១/៥មកពីរដ្ឋនិយាយថា៖ «វាប្រាកដណាស់ថាបើគ្មានការគាំទ្រពីមូលនិធិអឺរ៉ុបគម្រោងនេះនឹងមិនមានមហិច្ឆតាខ្លាំងទេ។ អ្នកត្រូវតែជឿថាលីចូមដ៏ច្រើនទាំងនេះ នឹងពង្រឹងតំបន់ ប៉ុន្តែវាគឺជាបញ្ហាប្រឈមដ៏ធំមួយ»។
ប្រភព៖ FT
