ជាគូប្រជែងដ៏ជូរចត់នៅលើឆាកពិភពលោក អាមេរិក និងរុស្សីស្ងាត់ៗកំពុងស្វែងរកវិធីអាចស្របគ្នាបាន
ប្រសិនបើយើងក្រឡេកទៅមើលទំនាក់ទំនងរវាងរុស្សី និងសហរដ្ឋអាមេរិក យើងនឹងសង្កេតឃើញថាមានការផ្លាស់ប្ដូរតិចតួច នោះគឺគូប្រជែងដ៏ជូរចត់ដែលព្យាយាមកាប់បំផ្លាញគ្នាទៅវិញទៅមកនៅជុំវិញពិភពលោក។
ចាប់តាំងពីប្រធានាធិបតីអាមេរិកលោកចូ បៃដិនចូលកាន់អំណាចកាលពីដើមឆ្នាំនេះ សហរដ្ឋអាមេរិកបានបន្ថែមការដាក់ទណ្ឌកម្មទៅលើរុស្សី បន្តផ្គត់ផ្គង់សព្វាវុធ និងការហ្វឹកហាត់ទៅកាន់កងកម្លាំងយោធារបស់ប្រទេសអ៊ុយក្រែន ហើយគំរាមធ្វើការវាយប្រហារតាមអ៊ីធឺណេតជាការសងសឹកទៅលើគោលដៅរុស្សី។ ស្ថានទូតអាមេរិកប្រចាំក្រុងមូស្គូ បានឈប់ចេញទិដ្ឋាការ ហើយជនជាតិរុស្សីដែលចង់បានទិដ្ឋាការអាមេរិកត្រូវធ្វើការស្នើទៅកាន់ស្ថានទូតអាមេរិកនៅប៉ូឡូញ។
មីស៊ីលមានសមត្ថភាពបញ្ជូនក្បាលគ្រាប់នុយក្លេអ៊ែររបស់រុស្សី ត្រូវបានគេសង្កេតឃើញថាកំពុងមានសកម្មភាពនៅតំបន់ព្រំដែនអ៊ុយក្រែន ហើយវិមានក្រឹមឡាំងបានបង្ហាញសញ្ញាថាខ្លួនអាចធ្វើអន្តរាគមន៍ក្នុងសង្គ្រាមផ្ដាច់ខ្លួននៃតំបន់នេះ ប្រសិនបើមានការលូកដៃពីអាមេរិក។ ពួកគេក៏បានធ្វើការសាកល្បងជំនាន់ថ្មីជាច្រើន ដែលរួមមានមីស៊ីលល្បឿនលឿនជាងសំឡេង (Hyper-sonic Missile)។ បន្ទាប់ពីមានភាពស្ងាត់មួយរយៈ ការវាយប្រហារតាមប្រព័ន្ធអ៊ីនធឺណិតចេញពីដែនដីរុស្សីបានចាប់ផ្ដើមកើនឡើងវិញ ដោយក្រុមហ៊ុន Microsoft បាននិយាយថាពួកគេបានរកឃើញយុទ្ធនាការឃ្លាំមើលចេញពីរុស្សី។
ខណៈពេលដែលមេដឹកនាំនៃក្រុមប្រទេសអ្នកមាន G20 ធ្វើការប្រជុំកាលពីចុងសប្ដាហ៍ មេដឹកនាំអាមេរិក និងរុស្សីមិនទទួលបានឱកាសដើម្បីដោះស្រាយរឿងនេះទល់មុខគ្នាទេ ដោយសារតែលោកប្រធានាធិបតីវ្ល៉ាឌីមៀ ពូទីនបានចូលរួមពីចម្ងាយ ដោយសារការព្រួយបារម្ភអំពីកូវីដ-១៩។
បើទោះបីជាយ៉ាងនេះក៏ដោយ នៅពីក្រោមស្រទាប់លើនៃភាពតានតឹង គូប្រជែងពិភពលោកទាំងពីរឥឡូវនេះក៏កំពុងធ្វើអ្វីផ្សេងទៀតដែរ៖ ការនិយាយ។
ជំនួបដំបូងរវាងលោកបៃដិន និងលោកពូទីននៅក្រុងហ្សឺណែវ កាលពីខែមិថុនា បានបង្កឱ្យមានទំនាក់ទំនងជាបន្តបន្ទាប់រវាងប្រទេសទាំងពីរ រួមទាំងការធ្វើដំណើរចំនួនបីទៅកាន់ទីក្រុងមូស្គូដោយមន្ត្រីជាន់ខ្ពស់នៃរដ្ឋបាលលោកបៃដិន ចាប់តាំងពីខែកក្កដា និងកិច្ចប្រជុំជាច្រើនទៀតជាមួយមន្ត្រីរុស្សីក្នុងដែនដីអព្យាក្រឹតដូចជាប្រទេសហ្វាំងឡង់ និងប្រទេសស្វីស។
ការសន្ទនាជុំវិញការគ្រប់គ្រងអាវុធនុយក្លេអ៊ែរ គឺចាប់ផ្ដើមក្នុងលក្ខណៈស៊ីជម្រៅជាងប៉ុន្មានឆ្នាំមុនទៅទៀត។ ស្ងាត់ៗទីប្រឹក្សាសម្រាប់បច្ចេកវិទ្យាអ៊ីនធឺណិត និងបច្ចេកវិទ្យាដែលកំពុងរីកចម្រើនរបស់សេតវិមានលោកស្រីអានី នឺប៊ឺហ្គឺបានធ្វើកិច្ចប្រជុំពីចម្ងាយជាមួយមន្ត្រីវិមានក្រឹមឡាំង។
កាលពីប៉ុន្មានសប្ដាហ៍មុនសហរដ្ឋអាមេរិកបានបញ្ជូនឈ្មោះ និងព័ត៌មានលម្អិតផ្សេងទៀតនៃឧក្រិដ្ឋជនអ៊ីនធឺណិតមួយចំនួនដែលធ្វើសកម្មភាពវាយប្រហារលើអាមេរិកទៅឱ្យរុស្សី បន្ទាប់ពីការជជែកដេញដោលនៅក្នុងសហគមន៍ចារកម្មអាមេរិកអំពីកម្រិតនៃការបង្ហាញ។ ឥឡូវនេះ សហរដ្ឋអាមេរិកកំពុងរង់ចាំមើលថាតើព័ត៌មានដែលត្រូវបានបញ្ជូននឹងមានលទ្ធផលនៅក្នុងការចាប់ខ្លួន ឬយ៉ាងណា ដោយនេះជាការធ្វើតេស្តមួយថាតើលោកពូទីននឹងគោរពការសន្យាថាលោកនឹងជួយសម្រួលដល់ការបង្ក្រាបលើការជំរិតតាមអ៊ីនធឺណិត និងឧក្រិដ្ឋកម្មតាមអ៊ីនធឺណិតផ្សេងទៀត។
បើទោះបីជាមានការមិនស្របគ្នាជុំវិញបញ្ហាការបរទេសជាច្រើន សហរដ្ឋអាមេរិក និងរុស្សីមានលក្ខណៈស្របគ្នាជុំវិញកម្មវិធីនុយក្លេអ៊ែររបស់ប្រទេសអ៊ីរ៉ង់ និងកូរ៉េខាងជើង។
យ៉ាងណាមិញមន្ត្រីនៃប្រទេសទាំងពីរនិយាយថា កិច្ចចរចារហូតមកដល់ពេលនេះ ទទួលបានលទ្ធផលតិចតួច ប៉ុន្តែជួយទប់ស្កាត់មិនឱ្យភាពតានតឹងរវាងរុស្ស៊ី និងអាមេរិក កើនផុតពីការគ្រប់គ្រងបាន។
សម្រាប់លោកបៃដិន ការចរចាជាមួយរុស្សីគឺជាវិធីដើម្បីជៀសវាងបញ្ហាដែលអាចរារាំងគោលដៅអាទិភាពរបស់លោក ដូចជាការប្រកួតប្រជែងជាមួយនឹងប្រទេសចិន និងការអនុម័តគោលនយោបាយក្នុងស្រុក។ សម្រាប់លោក ពូទីន ការចរចាជាមួយសហរដ្ឋអាមេរិក គឺជាមធ្យោបាយមួយដើម្បីបង្ហាញពីឥទ្ធិពលសកលរបស់រុស្ស៊ី និងជួយលើកតម្កើងមុខមាត់ក្នុងស្រុករបស់លោកជាអ្នកធានាស្ថិរភាព៕
ប្រភព៖ New York Times
