នាយករដ្ឋមន្ត្រីប៉ូឡូញទាមទារ «ជំហានជាក់ស្ដែង» ពីណាតូ ដើម្បីដោះស្រាយវិបត្តិនៅព្រំដែនបេឡារូស
កាលពីថ្ងៃអាទិត្យ ទី១៤ វិច្ឆិកានាយករដ្ឋមន្ត្រីប្រទេសប៉ូឡូញបាននិយាយថាអង្គការណាតូត្រូវតែបោះ «ជំហានជាក់ស្ដែង» ដើម្បីជួយដោះស្រាយវិបត្តិនៅព្រំដែនបេឡារូស ដោយបន្ថែមទៀតថាប៉ូឡូញ លីទុយអានី និងឡាតវីអាចស្នើសុំការពិគ្រោះយោបល់ក្រោមសន្ធិសញ្ញាសម្ព័ន្ធភាព។
ជនអន្តោប្រវេសន៍រាប់ពាន់នាក់បានធ្វើដំណើរទៅប្រទេសបេឡារូសក្នុងបំណងធ្វើអន្តោប្រវេសន៍ទៅរស់នៅក្នុងសហភាពអឺរ៉ុប តាមច្រកព្រំដែនប្រទេសប៉ូឡូញ លីទុយអានី និងឡាតវី។ ប៉ុន្តែពួកគេបានជាប់ក្នុងតំបន់ស បន្ទាប់ពីប្រទេសទាំងនេះបានដាក់ពង្រាយទាហានជាងមួយម៉ឺននាក់ ដើម្បីរារាំងមិនឱ្យពួកគេឆ្លងកាត់។ សហភាពអឺរ៉ុបបានចោទប្រកាន់ប្រទេសបេឡារូសថាជាអ្នករៀបចំឱ្យមានវិបត្តិនេះ ជាការសងសឹកនឹងការដាក់ទណ្ឌកម្មលើខ្លួន ប៉ុន្តែប្រទេសបេឡារូសបានច្រានចោលការប្រកាន់នេះ។
លោកនាយករដ្ឋមន្ត្រីម៉ាតេអូស ម៉ូរ៉ាវីស្គីបានប្រាប់សារព័ត៌មានរដ្ឋប៉ូឡូញថា៖ «វាមិនគ្រប់គ្រាន់សម្រាប់ពួកយើងគ្រាន់តែបង្ហាញការព្រួយបារម្ភរបស់យើងជាសាធារណៈនោះទេ ឥឡូវនេះយើងត្រូវការជំហានជាក់ស្ដែង និងការប្ដេជ្ញាចិត្តនៃសម្ព័ន្ធភាពទាំងមូល»។
ក្រោមមាត្រា ៤ នៃសន្ធិសញ្ញាអង្គការណាតូ ប្រទេសជាសមាជិកអាចស្នើធ្វើការពិគ្រោះយោបល់នៅពេលណាក៏បាន ប្រសិនបើតាមមតិរបស់ពួកគេ បូរណភាពទឹកដី ឯករាជ្យភាពនយោបាយ ឬសន្តិសុខរបស់ពួកគេត្រូវបានគំរាមកំហែង។
លោកម៉ូរ៉ាវីស្គីបាននិយាយថាមេដឹកនាំសហភាពអឺរ៉ុបនឹងពិភាក្សាអំពីការដាក់ទណ្ឌកម្មបន្ថែមទៀតទៅលើបេឡារូស រួមទាំងការបិទព្រំដែនទាំងស្រុង។ ប្រធានគោលនយោបាយការបរទេសរបស់សហភាពអឺរ៉ុបលោកចូសិប បូរេលត្រូវបានគេដកស្រង់សំដីនិយាយថាសហភាពអឺរ៉ុបនឹងពង្រីកការដាក់ទណ្ឌកម្មទៅលើបេឡារូស ដើម្បីរួមបញ្ចូលទណ្ឌកម្មលើក្រុមហ៊ុនអាកាសចរណ៍ និងភ្នាក់ងារទេសចរណ៍ ដែលគេគិតថាពាក់ព័ន្ធនឹងការដឹកជញ្ជូនជនអន្តោប្រវេសន៍ក្នុងវិបត្តិនេះ៕
ប្រភព៖ Reuters
