នាយករដ្ឋមន្ត្រីអង់គ្លេស៖ ស្នូរជួងបុណ្យសពធ្យូងថ្មត្រូវបានបន្លឺ បើទោះបីជាមានការផ្លាស់ប្ដូរភាសាក្នុងកិច្ចព្រមព្រៀងក៏ដោយ
នាយករដ្ឋមន្ត្រីអង់គ្លេសលោកបូរីស ចនសុនបាននិយាយថាកិច្ចព្រមព្រៀងអាកាសធាតុក្រុងក្លាសហ្គូ ថាជា «កិច្ចព្រមព្រៀងមានឥទ្ធិពលផ្លាស់ប្ដូរដ៏ធំ» ដែលបានបន្លឺ«ស្នូរជួងបុណ្យសពរបស់ថាមពលធ្យូងថ្ម» បើទោះបីជាមានការផ្លាស់ប្ដូរភាសាក្នុងកិច្ចព្រមព្រៀងក៏ដោយ។
ហត្ថលេខីនៃកិច្ចព្រមព្រៀងបាននេះបានយល់ព្រម «កាត់បន្ថយ» ជាជាង «កាត់ផ្ដាច់» ការប្រើប្រាស់ថាមពលធ្យូងថ្ម។ ការផ្លាស់ប្ដូរភាសានេះគឺធ្វើតាមសំណើរបស់ប្រទេសចិន និងប្រទេសឥណ្ឌា ដែលជាអ្នកប្រើប្រាស់ធ្យូងថ្មច្រើនជាងគេក្នុងពិភពលោក។ ប៉ុន្តែនៅតែជាលើកទីមួយដែលផែនការកាត់បន្ថយធ្យូងថ្មត្រូវបានលើកឡើងនៅក្នុងកិច្ចព្រមព្រៀងអាកាសធាតុបែបនេះ។
កិច្ចព្រមព្រៀងនេះត្រូវបានសម្រេចបន្ទាប់ពីការចរចានៅកិច្ចប្រជុំកំពូល COP26 រយៈពេលពីរសប្ដាហ៍បានឈានដល់ម៉ោងបន្ថែមកាលថ្ងៃសៅរ៍។
អ្នករិះគន់បាននិយាយថាកិច្ចព្រមព្រៀងនេះបានទៅមុខគ្រប់គ្រាន់ទេ ហើយនឹងមិនបំពេញគោលដៅចម្បងនៃកិច្ចប្រជុំដើម្បីការពារកុំឱ្យកម្ដៅពិភពលោកកើនឡើង ១,៥ អង្សាសេបន្ថែមទៀត។ អ្នកវិទ្យាសាស្ត្រនិយាយថាគោលដៅនេះគឺសំខាន់ណាស់ដើម្បីបញ្ចៀសផលប៉ះពាល់អាក្រក់បំផុតរបស់ការប្រែប្រួលអាកាសធាតុ។
ក្នុងសន្និសីទកាសែតមួយលោកចនសុន ដែលជាម្ចាស់ផ្ទះកិច្ចប្រជុំ COP26 បាននិយាយថា៖ «យើងអាចជិះឥទ្ធិពល យើងអាចបញ្ចុះបញ្ចូល យើងអាចលើកទឹកចិត្ត ប៉ុន្តែយើងមិនអាចបង្ខំប្រទេសដែលមានអធិបតេយ្យភាពឱ្យធ្វើអ្វីដែលពួកគេមិនចង់ធ្វើនោះទេ»។ លោកបន្តទៀតថា៖ «ចំពោះការមិនយល់ស្របរបស់យើងទាំងអស់ ពិភពលោកកំពុងឆ្ពោះទៅរកទិសដៅត្រឹមត្រូវ»។
ថ្វីបើមានសមិទ្ធផលក្នុងកិច្ចប្រជុំកំពូលក៏ដោយ លោកចនសុននៅមានការខកមួយចំនួន។ លោកនិយាយថាមានគោលដៅមហិច្ឆតាខ្ពស់ជាច្រើន ជាពិសេសពីប្រទេសប្រឈមបញ្ហាភ្លាមៗពីការប្រែប្រួលអាកាសធាតុ ប៉ុន្តែមានប្រទេសមួយចំនួនមានភាពស្ទាក់ស្ទើរ។ លោនិយាយថាចក្រភពអង់គ្លេសមិនអាចបង្ខំប្រទេសផ្សេងឱ្យធ្វើសកម្មភាពទេ។
យ៉ាងណាមិញ គោលដៅចម្បង ដែលបានកំណត់ដោយ COP26 គឺដើម្បីធានាថាការឡើងកម្ដៅផែនដីមិនឡើងលើស ១,៥ អង្សាសេ នៅឆ្នាំ ២១០០ ប៉ុន្តែរបាយការណ៍មួយដោយក្រុមតាមដានសកម្មភាពអាកាសធាតុបានគណនាថាក្នុងអត្រាបច្ចុប្បន្ន ពិភពលោកគឺកំពុងឆ្ពោះទៅរកការឡើងកម្ដៅ ២,៤ ត្រឹមកាលបរិច្ឆេទនោះ។
ជាផ្នែកមួយនៃកិច្ចព្រមព្រៀង ដែលបានធ្វើឡើងនៅទីក្រុងក្លាសហ្គូ ប្រទេសនានាជុំវិញពិភពលោកនឹងជួបប្រជុំគ្នានៅឆ្នាំក្រោយម្ដងទៀតដើម្បីធ្វើសន្យាកាត់បន្ថយកាបូនបន្ថែមទៀតក្នុងគោលបំណងឈានដល់គោលដៅ ១,៥ អង្សាសេ។
កិច្ចព្រមព្រៀងក៏បានចែងថាប្រទេសនានាត្រូវបោះពុម្ពឡើងវិញនូវផែនការសកម្មភាពអាកាសធាតុរបស់ពួកគេនៅចុងឆ្នាំក្រោយ ជាមួយនឹងគោលដៅកាត់បន្ថយការបញ្ចេញឧស្ម័នពោរពេញដោយមហិច្ឆតាបន្ថែមទៀតសម្រាប់ឆ្នាំ ២០៣០។ កិច្ចព្រមព្រៀងនេះក៏មានការសង្កត់ធ្ងន់លើតម្រូវការសម្រាប់ប្រទេសអភិវឌ្ឍន៍ឱ្យបង្កើនប្រាក់ដែលពួកគេផ្ដល់ដល់អ្នកដែលទទួលរងផលប៉ះពាល់នៃការប្រែប្រួលអាកាសធាតុរួចទៅហើយ ឱ្យបានលើសពីគោលដៅប្រចាំឆ្នាំ ១០០ ពាន់លានដុល្លារនាពេលបច្ចុប្បន្ន៕
ព្រភព៖ BBC
