ចិនតែងតាំងអតីតអ្នកស្រាវជ្រាវនៅវិទ្យាស្ថានអាមេរិកឱ្យកាន់តំណែងជាន់ខ្ពស់ទី៣ នៅស្ថានទូតរបស់ខ្លួននៅវ៉ាស៊ីនតោន
ចិនកំពុងតែសម្លឹងក្នុងការពង្រឹងស្ថានទូតរបស់ខ្លួននៅសហរដ្ឋអាមេរិក ដោយគ្រោងនឹងតែងតាំងអគ្គនាយករងនៃអគ្គនាយកដ្ឋានកិច្ចការអាមេរិកខាងជើង និងអូសេអានី លោក ជីង ឈ័ន (Jing Quan) ធ្វើជាអគ្គទីប្រឹក្សាស្ថានទូត ដែលជាតំណែងជាន់ខ្ពស់លំដាប់ទី៣។ នេះបើតាមការចុះផ្សាយរបស់សារព័ត៌មាន South China Morning Post។
ការតែងតាំងលោក ជីង ត្រូវបានអ្នកតាមដានមួយចំនួនយល់ឃើញថា ចិនអាចនឹងកែប្រែវិធីសាស្ត្រការទូតរបស់ខ្លួនពី អ្នកការទូតបែបអ្នកចម្បាំងចចក ឬ អ្នកការទូតបែបប្រតិកម្មនិយម ក្លាយទៅជាអ្នកការទូត «ស្រដីស្រទន់» និងបែបប្រាកដនិយម។
បន្ថែមពីនេះដែរ ការតែងតាំងនេះដែរក៏ត្រូវបានគេមើលឃើញថាជាការពង្រឹងប៉ុស្តិ៍ការទូតរបស់ចិនប្រចាំសហរដ្ឋអាមេរិកផងដែរ ដោយកាលពីខែកក្កដា កន្លងទៅ ចិនបានផ្លាស់ទូតរបស់ខ្លួនទៅកាន់ទីក្រុងវ៉ាស៊ីនតោនពី អ្នកការទូតចំណាស់លោក ស្វេ ធានកាយ (Cui Tiankai) ទៅកាន់អ្នកការទូតជំនាន់ថ្មីគឺលោក ឈីន កាង (Qin Gang) ដែលទើបតែកាន់តំណែងជាឯកអគ្គរដ្ឋទូតដំបូងបង្អស់នៅក្នុងអាជីពរបស់លោក។
លោក ជីង ធ្លាប់ធ្វើជាមនុស្សជំនិតរបស់លោក យ៉ាង ជៀឈី (Yang Yiechi) ប្រធានគណៈកម្មការការបរទេសនៃគណបក្សកុម្មុយនិស្តចិន ដែលគេចាត់ទុកថាជា អ្នកការទូតកំពូលរបស់ប្រទេសមហាអំណាចអាស៊ីបូព៌ា។
បុរសវ័យ ៤៦រូបនេះចាប់ផ្ដើមចូលរួមជាមួយក្រសួងការបរទេសចិន តាំងពីឆ្នាំ១៩៩៧មកម្ល៉េះ ក្រោយពីលោកបញ្ចប់បរិញ្ញាបត្រភាសាអង់គ្លេសនៅសាកលវិទ្យាល័យសិក្សាបរទេសស៊ីអាន (Xian)។
លោកស្ថិតក្នុងចំណោមមន្ត្រីចិនជំនាន់ដំបូងៗ ដែលបានជាប់ជាអ្នកស្រាវជ្រាវទស្សនកិច្ចនៅមជ្ឈមណ្ឌលសិក្សាគោលនយោបាយអាស៊ីឦសាន នៃវិទ្យាស្ថានប្រ៊ូកឃីង ដែលមានមូលដ្ឋាននៅឯរដ្ឋធានីវ៉ាស៊ីនតោន។ នៅកាលនោះលោកបានសិក្សាអំពីបញ្ហាតៃវ៉ាន់ និងបញ្ហាកូរ៉េខាងជើង នៅក្នុងបរិបទទំនាក់ទំនងអាមេរិក-ចិន។
ជាមួយគ្នានេះដែរ មានមតិមួយចំនួនបង្ហាញពីភាពសុទិដ្ឋិនិយម ដោយលោក ជីង អាចជួយធ្វើឱ្យទំនាក់ទំនងរវាងអាមេរិក និងចិនមានភាពវិជ្ជមានជាងមុន។
លោក Huang Jing ព្រឹទ្ធបុរសនៃវិទ្យាស្ថានសិក្សាអន្តរជាតិ និងតំបន់ នៃសាកលវិទ្យាល័យប៉េកាំងនៃភាសា និងវប្បធម៌ បានលើកឡើងថា លោក ជីង ជាអ្នកមានបទពិសោធន៍លើកិច្ចការពាក់ព័ន្ធនឹងសហរដ្ឋអាមេរិក ហើយវត្តមានរបស់លោក អាចនឹងជួយដល់ លោកទូត ឈីន កាង ដែលបានតែងតាំងកាលពីខែកក្កដា។
«ស្របពេលដែលទំនាក់ទំនងទ្វេភាគីមានការថយចុះ ការគ្រប់គ្រងទំនាក់ទំនងជាមួយអាមេរិកកាន់តែលំបាកទៅៗ។ លោក ឈីន ជាការពិតណាស់ត្រូវការពេលវេលាបន្ថែមទៀត ដើម្បីធ្វើការរបស់លោកឱ្យបានត្រឹមត្រូវ ហើយបង្កើតក្រុមការងាររបស់ខ្លួនឯង»។ នេះជាការលើកឡើងរបស់លោកប្រាប់សារព័ត៌មាន South China Morning Post។
លោកបានបន្ថែមថា៖ «ការតែងតាំងរបស់លោកជីង បញ្ជូនជាសញ្ញាណវិជ្ជមានទៅដល់ទីក្រុងវ៉ាស៊ីនតោន»។
អ្នកការទូតចិនជាច្រើនបានចាត់ទុកលោក ជីង ថា «អ្នកការទូតមានសមត្ថភាព ខិតខំប្រឹងប្រែងធ្វើការ និងចេះដាក់ខ្លួន» ហើយអាជីពរបស់លោកបានរះឡើង ចាប់តាំងពីលោកត្រូវបាន លោក យ៉ាង ជៀឈី ជ្រើសរើសជាជំនួយការរបស់លោកកាលពីឆ្នាំ២០១៣កន្លងទៅ។
លោកត្រូវបានគេជឿថា បានដើរតាមលោក យ៉ាង នៅតាមកិច្ចប្រជុំកំពូលៗផ្សេងៗ។ បន្តមកទៀតនៅឆ្នាំ២០១៨ លោកត្រូវបានតែងតាំងជា អគ្គនាយករងនៃអគ្គនាយកដ្ឋានអាមេរិកខាងជើង និងអូសេអានី នៃក្រសួងការបរទេសចិន។
ចិននៅមួយរយៈចុងក្រោយនេះបានផ្លាស់ប្ដូរសមាសភាពទទួលបន្ទុកទំនាក់ទំនងអាមេរិក-ចិន។ ជាក់ស្ដែង កាលពីខែធ្នូនេះដដែល ចិនបានតែងតាំងលោក យ៉ាង តាវ (Yang Tao) ដែលជាអតីតអ្នកការទូតចិនធ្វើការពាក់ព័ន្ធនឹងអាហ្វហ្គានីស្ថានឱ្យមកកាន់ជាអគ្គនាយកកិច្ចការអាមេរិកខាងជើង និងអូសេអានី។
ទន្ទឹមនឹងមានសុទិដ្ឋិនិយមនេះដែរ លោក Pang Zhongying អ្នកជំនាញកិច្ចការអន្តរជាតិនៃសាកលវិទ្យាល័យចិននៃសមុទ្រនៅឈីងតាវ (Qingdao) បានលើកឡើងថា វាជារឿងល្អហើយ ដែលចិនដាក់អ្នកការទូត ដែលកើតនៅសម័យក្រោយបដិវត្តន៍វប្បធម៌ឱ្យចូលកាន់តំណែង។
យ៉ាងណាមិញ តាមរយៈគោលនយោបាយនៃប្រទេសទាំងពីរនៅពេលនេះមានភាពប្រឈមមុខដាក់គ្នា ដែលពិបាកឱ្យទំនាក់ទំនងរវាងមហាអំណាចទាំងពីរមានភាពប្រសើរឡើងនៅពេលអនាគតឆាប់ៗនេះ។ នេះបើតាមការលើកឡើងរបស់លោកប្រាប់ SCMP៕

ប្រភព៖ SCMP