នាយករដ្ឋមន្រ្តីកាណាដាលុបចោលច្បាប់ដាក់ប្រទេសក្នុងស្ថានភាពអាសន្ន ដោយនិយាយថាច្បាប់មានស្រាប់គ្រប់គ្រាន់ដើម្បីដោះស្រាយនឹងអ្នកតវ៉ា
នាយករដ្ឋមន្រ្តីកាណាដាលោក Justin Trudeau ប្រកាសកាលពីថ្ងៃពុធថា ខ្លួននឹងលុបចោលច្បាប់ដាក់ប្រទេសក្នុងស្ថានភាពគ្រាអាសន្ន ជាងមួយសប្ដាហ៍ក្រោយពីប្រកាសឱ្យប្រើប្រាស់ច្បាប់នេះ ដោយនិយាយថា ប៉ូលីសមានឧបករណ៍ដែលពួកគេត្រូវការដើម្បីបន្តដោះស្រាយជាមួយក្រុមអ្នកតវ៉ាខុសច្បាប់។
លោកនិយាយក្នុងសន្និសីទសារព័ត៌មាននៅរដ្ឋធានីអូតាវ៉ាថា៖ «បន្ទាប់ពីពិចារណាយ៉ាងយកចិត្តទុកដាក់ យើងបានត្រៀមខ្លួនរួចជាស្រេចដើម្បីបញ្ជាក់ថា ស្ថានភាពនេះមិនមែនជាភាពអាសន្នទៀតទេ។ ដូច្នេះហើយ រដ្ឋាភិបាលសហព័ន្ធនឹងបញ្ចប់ការប្រើប្រាស់ច្បាប់ស្តីពីគ្រាអាសន្ន»។
លោក Trudeau និយាយថា អំណាចបោសសម្អាតត្រូវបានដាក់ឱ្យដំណើរការដើម្បីដោះស្រាយភាពអាសន្ន «ធ្ងន់ធ្ងរ» ដោយនិយាយថា វាមានន័យសមាមាត្រ និងពេលវេលាកំណត់ ស្របពេលដែលបាតុករតូចៗនៅតែមាននៅទូទាំងប្រទេស រួមទាំងនៅខាងក្រៅក្រុងអូតាវ៉ា។
នៅរសៀលថ្ងៃពុធ មានវត្តមានប៉ូលិសយ៉ាងច្រើនក្នុងកណ្តាលទីក្រុងអូតាវ៉ា ដោយមានប៉ុស្តិ៍ត្រួតពិនិត្យជាច្រើនរបស់ប៉ូលីស។ ប៉ុន្តែលោក Trudeau និយាយថា អ្នកជំនាញសន្តិសុខជាតិបានផ្តល់ដំបូន្មានដល់លោកថា ច្បាប់បច្ចុប្បន្នដែលមានស្រាប់គឺគ្រប់គ្រាន់ដើម្បីដោះស្រាយបញ្ហាការអនុវត្តច្បាប់។
លោក Trudeau និយាយថា៖ «យើងមានទំនុកចិត្តខ្ពស់ថា ឧបករណ៍ដែលមានស្រាប់ដែលកងកម្លាំងប៉ូលីសមាននៅទូទាំងប្រទេស នឹងគ្រប់គ្រាន់ដើម្បីដោះស្រាយជាមួយនឹងការរំខានបន្ថែមទៀត»។
ការតវ៉ាចាប់ផ្តើមជាក្បួនរថយន្តរបស់អ្នកបើកឡានដឹកទំនិញឆ្លងប្រទេស ដែលគេហៅថា «ក្បួនសេរីភាព» ដើម្បីតវ៉ាប្រឆាំងនឹងការតម្រូវឱ្យចាក់វ៉ាក់សាំង។ ក្រុមអ្នកតវ៉ាក៏ទាមទារបន្ថែមទៀតពីរដ្ឋាភិបាល ដោយសុំឱ្យចង់បញ្ចប់វិធានការកូវីដ-១៩ ទាំងអស់ ខណៈអ្នកខ្លះថែមទាំងទាមទារឱ្យលោក Trudeau លាលែងចេញពីតំណែងទៀតផង។
ប្រភព៖ CNN
