អ៊ុយក្រែនកោះហៅទ័ពបម្រុងឱ្យចាប់ផ្ដើមចល័ត ហើយប្រកាសដាក់ប្រទេសក្នុងគ្រាអាសន្ន ខណៈរុស្សីចាប់ផ្ដើមវាយប្រហារ
ដោយអំពើហិង្សាកំពុងកើនឡើងនៅខាងកើតរបស់ខ្លួន រដ្ឋាភិបាលអ៊ុយក្រែនកាលពីពុធ ទី២៣ កុម្ភៈបានកោះហៅទ័ពបម្រុងឱ្យចាប់ផ្ដើមចល័ត ខណៈពេលដែលក្រុមប្រឹក្សាសន្តិសុខប្រទេសនេះបានជួបប្រជុំនៅក្រុងកៀវ ហើយស្នើឱ្យសភាប្រកាសដាក់ប្រទេសក្នុងគ្រាអាសន្ន ដែលនឹងផ្ដល់អំណាចបន្ថែមទៀតឱ្យអាជ្ញាធរដើម្បី «ពង្រឹងសន្តិសុខកន្លែងសាធារណៈនិងទីតាំងដែលមានសារៈសំខាន់សម្រាប់សាធារណជន»។
លេខាធិការក្រុមប្រឹក្សាសន្តិសុខអ៊ុយក្រែនលោកអូឡេកស៊ី ដានីឡូវតំបន់ទាំងអស់នៃប្រទេសអ៊ុយក្រែននឹងត្រូវដាក់ក្នុងគ្រាអាសន្ន ដោយលើកលែងតែតំបន់ដូណេតស្ក៍ និងលូហានស្ក៍ ដែលជាសមរភូមិជាង៨ឆ្នាំ រវាងរដ្ឋាភិបាលអ៊ុយក្រែន និងក្រុមផ្ដាច់ខ្លួនគាំទ្រដោយរុស្សី។ សំណើប្រកាសគ្រាអាសន្ននេះត្រូវបានអនុម័តដោយសភាអ៊ុយក្រែននៅល្ងាចថ្ងៃពុធ។
នៅយប់ថ្ងៃពុធសប្ដាហ៌នេះ ក្រុមប្រឹក្សាសន្តិសុខអង្គការសហប្រជាជាតិបានរៀបចំសម័យប្រជុំក្នុងគ្រាអាសន្ន ខណៈពេលប្រធានាធិបតីរុស្សីលោកវ្ល៉ាឌីមៀរ ពូទីនបានប្រកាសប្រតិបត្តិការយោធាចូលក្នុងទឹកដីប្រទេសអ៊ុយក្រែន។ ស្នូរនៃការផ្ទុះត្រូវបានគេឮនៅទីក្រុងអ៊ុយក្រែនធំៗដូចជាក្រុងកៀវ ខាគៀវ អូដេសា និងក្រុងដទៃទៀតនៅទូទាំងប្រទេសអ៊ុយក្រែន។
លោកពូទីនអះអាងថាលោកមិនចង់កាន់កាប់ប្រទេសអ៊ុយក្រែនទេ ប៉ុន្តែលោកនិយាយថាលោកចង់បំបែកយោធាអ៊ុយក្រែន បន្ទាប់ពីមានសំណើសុំជំនួយពីក្រុមផ្ដាច់ខ្លួន។ លោកបានជំរុញឱ្យទាហានអ៊ុយក្រែន «បោះបង់អាវុធភ្លាម ហើយត្រឡប់ទៅផ្ទះវិញទៅ»។ លោកខាងលិចបាននិយាយថានេះគឺជាការបើកការឈ្លានពាននៃប្រទេសអ៊ុយក្រែន។
ក្រុមប្រឹក្សាសន្តិសុខអង្គការសហប្រជាជាតិទើបតែទទួលដំណឹងអំពីការសម្រេចចិត្តរបស់លោកពូទីន នៅនាទីចុងក្រោយនៃកិច្ចប្រជុំ។ ប្រទេសលោកខាងលិចបានថ្កោលទោសសកម្មភាពរុស្សីយ៉ាងខ្លាំង ហើយគណៈប្រតិភូបារាំងប្ដេជ្ញាធ្វើការជាមួយសមាជិកដទៃដើម្បីរៀបចំសេចក្ដីសម្រេចប្រឆាំងរុស្សី៕
ប្រភព៖ CBS News
