បញ្ហារោងចក្រនៅស្រុកកំណើត ធ្វើឱ្យលោកម៉ាក្រុង ពិបាកនឹងទាញសំឡេងឆ្នោតគាំទ្រពីក្រុមកម្មករ
ក្នុងអំឡុងឃោសនាបោះឆ្នោតជ្រើសរើសប្រធានាធិបតីចុងក្រោយនៅឆ្នាំ ២០១៧ រោងចក្រផលិតម៉ាស៊ីនបោកខោអាវ Whirlpool ក្នុងក្រុងភាគខាងជើង Amiens របស់បារាំងដែលកំពុងមានបញ្ហានាពេលនោះ បានក្លាយជាកន្លែងឃោសនារកការគាំទ្រដ៏ធំរបស់លោក អេម៉ានុយអែល ម៉ាក្រុង (Emmanuel Macron) និងគូប្រជែងស្តាំនិយមរបស់លោកគឺអ្នកស្រី Marine Le Pen ។
លោក ម៉ាក្រុង ធ្លាប់សន្យាថា លោកនឹងសង្រ្គោះរោកចក្រក្នុងស្រុកកំណើតរបស់លោកមួយនេះ ប្រសិនបើជាប់ឆ្នោត។ ក្រោយមក នៅពេលក្លាយជាប្រធានាធិបតី រដ្ឋាភិបាលរបស់លោកបានផ្តល់ប្រាក់ឧបត្ថម្ភរាប់លាន ដល់ការបង្កើតរោងចក្រនេះឡើងវិញ ដែលជាការបង្ហាញពីការប្តេជ្ញាចិត្តរបស់លោកក្នុងការធ្វើឱ្យឧស្សាហកម្មបារាំងមានជីវិតឡើងវិញ។
យ៉ាងណាមិញ រោងចក្រ Whirlpool ត្រូវបានបិទជាអចិន្រ្តៃយ៍ក្នុងឆ្នាំ ២០១៨ ហើយក្លាយជាឧទាហរណ៍នៃការលំបាកក្នុងការស្តារឡើងវិញនូវឧស្សាហកម្មទ្រុធទ្រោមរបស់បារាំង និងបញ្ហាប្រឈមរបស់លោកប្រធានាធិបតីក្នុងការផ្ដល់ទំនុកចិត្តទៅលើកម្មករបារាំង ដែលមានទំនោរជាច្រើនឆ្នាំទៅលើពួកស្ដាំនិយមរបស់អ្នកស្រី Le Pen ។ ហើយការបោះឆ្នោតជុំទី២ នាថ្ងៃអាទិត្យខាងមុខនេះ អាចនឹងបង្ហាញអ្វីដែលផ្ទុយពីការចង់បានរបស់លោកម៉ាក្រុង។
លោក ម៉ាក្រុង ដែលកើតធំធាត់ក្នុងត្រកូលធូរធានៃក្រុង Amiens ឡើងកាន់ដំណែងបច្ចុប្បន្នកាលពី៥ឆ្នាំមុន ជាមួយនឹងផែនការស្ដាររោងចក្រដែលជាប់គាំងឡើងវិញ ខណៈម្ចាស់រោងចក្របារម្ភពីកំណើននៃថ្លៃឈ្នួលកម្មករបារាំង ដែលត្រូវបានធានានូវអត្ថប្រយោជន៍ច្រើនឆ្នាំ និងពិបាកក្នុងការបណ្តេញចេញ។ អស់ជាច្រើនឆ្នាំមកនេះ ភាពអត់ការងារធ្វើបានអូសបន្លាយយ៉ាងរ៉ាំរ៉ៃនៅអត្រាជាង ៨ ភាគរយ ខណៈដែលវិស័យឧស្សាហកម្មធ្លាក់ចុះ។
ដំបូងឡើយ លោក ម៉ាក្រុង ព្យាយាមកែលម្អសេដ្ឋកិច្ចបារាំង ដោយជំរុញការផ្លាស់ប្តូរដែលងាយស្រួលសម្រាប់អាជីវកម្ម ដូចជាការកាត់បន្ថយពន្ធ ជាពិសេសសម្រាប់អ្នកមាន។ ក្នុងឆ្នាំដំបូងរបស់លោកជាប្រធានាធិបតី លោកបានដឹកនាំសហជីពដ៏តឹងតែងបំផុតមួយចំនួនរបស់ប្រទេស ដោយបង្កឱ្យមានកូដកម្មដ៏ធំបំផុតមួយ ស្របពេលនឹងការធ្វើកែប្រែក្រមការងារដ៏សម្បូរបែបរបស់ប្រទេស ដែលធ្វើឱ្យវាកាន់តែងាយស្រួលក្នុងការជួល និងបណ្តេញកម្មករ។
ប៉ុន្តែទោះបីជាសេដ្ឋកិច្ចទាំងមូលស្ទុះងើបឡើងវិញយ៉ាងខ្លាំងពីវិបត្តិកូវីដក្ដី ក៏អ្នកសេដ្ឋកិច្ចនិយាយថា កិច្ចខិតខំប្រឹងប្រែងរបស់លោក ម៉ាក្រុង ក្នុងការសង្រ្គោះជីវិតឧស្សាហកម្មបារាំងឡើងវិញ បានបង្ហាញឱ្យឃើញនូវភាពចម្រុះគ្នា។ ជាភស្តុតាង អ្នកសេដ្ឋកិច្ចបានលើកឡើងឱនភាពពាណិជ្ជកម្មក្នុងទំហំប្រហែល ៩៣ ប៊ីលានដុល្លារក្នុងឆ្នាំ ២០២១ និងការបិទរោងចក្រ Whirlpool ទោះបីមានប្រាប់ឧបត្ថម្ភធនជាង ១០ លានដុល្លារជាដើម។
សម្រាប់លោក ម៉ាក្រុង ការបិទរោងចក្រនេះ ហាក់ដូចជាការកាត់ផ្ដាច់ទំនុកចិត្តរបស់លោកសម្រាប់កម្មករ ដែលមានចំនួនជិត ៣០០ ត្រូវបានបាត់បង់ការងារបន្ទាប់ពីនោះ។ កម្មករជាច្រើននាក់ ដែលត្រូវបានបញ្ឈប់ពីការងារ បានបន្តចូលរួមក្នុងចលនាអាវកាក់លឿង ដែលមានទំនាក់ទំនងជាមួយវណ្ណៈកម្មករជនជាតិបារាំង ដែលប្រឈមមុខនឹងបញ្ហាពន្ធខ្ពស់ និងប្រាក់ចំណូលទាប ដែលនាំឱ្យកើតមានវិបត្តិនយោបាយដ៏ធំបំផុតនៃតំណែងរបស់លោកម៉ាក្រុង។
លោក Thomas Grjebine សេដ្ឋវិទូនៅមជ្ឈមណ្ឌលស្រាវជ្រាវ CEPII នៅទីក្រុងប៉ារីសនិយាយថា ជោគវាសនារបស់រោងចក្រនៅក្រុង Amiens គឺជា «រោគសញ្ញា» នៃការលំបាកក្នុងការធ្វើឱ្យវិស័យឧស្សាហកម្មរស់ឡើងវិញ។ លោក Grjebine និយាយថា៖ «តាមពិតទៅ រដ្ឋាភិបាលមិនសូវមានអំណាចទេមុននឹងរោងចក្របិទ។ ប៉ុន្តែការសន្យាជាច្រើន ត្រូវបានធ្វើឡើងក្នុងអំឡុងពេលយុទ្ធនាការឃោសនាបោះឆ្នោត»។
មុនការបោះឆ្នោតជុំចុងក្រោយក្នុងឆ្នាំ ២០១៧ លោក ម៉ាក្រុង បានធ្វើយុទ្ធនាការឃោសនាទៅរោងចក្រ Whirlpool ហើយនិយាយថា លោកមានការឈឺចាប់ ដែលប្រជាជនក្នុងស្រុកកំណើតរបស់លោកបោះឆ្នោតគាំទ្រគូរប្រជែងទៅវិញ ប៉ុន្តែក្រោយមកលោកសន្យាដាក់ផែនការច្បាស់មួយដើម្បីស្រង់ឧស្សាហូបនីយកម្មឡើងវិញក្នុងទឹកដីកំណើតដែលវិស័យនេះបានធ្លាក់ចុះ។
កន្លះឆ្នាំក្រោយការឈ្នះឆ្នោត ការសន្យាហាក់ដូចជាចេញជារូបរាង ដោយអ្នកជំនួញក្នុងស្រុកដ៏លេចធ្លោម្នាក់គឺលោក Nicolas Decayeux ត្រូវបានជ្រើសរើសឱ្យកាន់កាប់រោងចក្រនេះ ជាមួយនឹងគម្រោងផលិតទូរទឹកកក និងយានយន្តលោកបានជ្រើសរើសកម្មករ ១៦២ នាក់ក្នុងចំណោមជិត ៣០០ នាក់របស់រោងចក្រដែលបាត់បង់ការងារឱ្យចូលធ្វើការ ហើយលោកទទួលបានប្រាក់ឧបត្ថម្ភធនចំនួន ២,៦ លានអឺរ៉ូពីរដ្ឋាភិបាល និង ៧,៤ លានអឺរ៉ូពី Whirlpool ។
ប៉ុន្តែភាពសុទិដ្ឋិនិយមរបស់រោងចក្រ Whirlpool មិនបានកើតឡើងទេ ដោយអតីតកម្មករនិយាយថា គម្រោងរបស់លោក Decayeux មិនដែលកើតចេញឡើងរហូតដល់រោងចក្របិទក្នុងឆ្នាំ ២០១៨ ហើយលោកត្រូវកាត់ទោសកាលខែកុម្ភៈឆ្នាំនេះ ពីបទប្រើប្រាស់មូលនិធិរបស់រដ្ឋាភិបាល និងរោងចក្សខុសទិសដៅ។
ហើយលើសពីនេះទៅទៀត ដោយសារតែការព្រួយបារម្ភ ក្រុមកម្មករក៏ធ្លាប់ជូនដំណឹងដល់សមាជិកសភាជាតិខ្លួន គឺលោក François Ruffin បន្ទាប់ពីលោក Decayeux ចូលកាន់កាប់រោងចក្រ។ តែបើទោះបីជាលោក Ruffin បន្តជូនដំណឹងដល់រដ្ឋាភិបាល ក៏មិនមានការឆ្លើយតប ដោយនិយាយថា រដ្ឋាភិបាលរបស់លោក ម៉ាក្រុង ហាក់ដូចជាបាត់បង់ចំណាប់អារម្មណ៍លើរោងចក្រក្រោយមានអ្នកគ្រប់គ្រងថ្មី។
ប្រភព៖ New York Times