អាមេរិកសាកល្បងមីស៊ីលលឿនជាងសំឡេងដោយជោគជ័យ ក្រោយរុស្ស៊ីប្រើអាវុធស្រដៀងគ្នានេះនៅអ៊ុយក្រែន
សហរដ្ឋអាមេរិកកាលពីថ្ងៃអង្គារប្រកាសថា ខ្លួនបញ្ចប់ការបាញ់បង្ហោះសាកល្បងមីស៊ីលល្បឿនលឿនជាងសំឡេងដោយជោគជ័យជាលើកទី២ ដោយបង្ហាញពីសក្តានុពលនៃ «សមត្ថភាពជំនាន់ក្រោយ» សម្រាប់យោធា។
ការធ្វើសាកល្បង ដែលធ្វើឡើងដោយទីភ្នាក់ងារគម្រោងស្រាវជ្រាវកម្រិតខ្ពស់ការពារជាតិ (DARPA) និងកងទ័ពអាកាសសហរដ្ឋអាមេរិក គឺជាការសាកល្បងដំបូងរបស់ក្រុមហ៊ុនសាជីវកម្មបច្ចេកវិទ្យា Lockheed Martin លើមីស៊ីលលឿនជាងសំឡេង Hypersonic Air-breathing Weapon Concept ដែលត្រូវបានគេស្គាល់ជាទូទៅថា HAWC ។ ការធ្វើសាកល្បងកាលពីលើកមុន បានធ្វើឡើងក្នុងខែកញ្ញាឆ្នាំទៅ។
លោក Andrew Tippy Knoedler អ្នកគ្រប់គ្រងកម្មវិធីមីស៊ីល HAWC និយាយ ក្នុងសេចក្តីថ្លែងការណ៍ថា៖ «ការបង្ហោះសាកល្បងមីស៊ីលHAWC របស់ Lockheed Martin ដោយជោគជ័យ នឹងអនុញ្ញាតឱ្យអ្នកប្រយុទ្ធរបស់យើងជ្រើសរើសសមត្ថភាពត្រឹមត្រូវដើម្បីគ្រប់គ្រងសមរភូមិ»។ លោកបន្តថា៖ «សមិទ្ធិផលទាំងនេះ បង្កើនកម្រិតនៃភាពចាស់ទុំផ្នែកបច្ចេកទេសសម្រាប់ការផ្លាស់ប្តូរ HAWC ទៅជាកម្មវិធីកំណត់ត្រាសេវាកម្ម»។
យោងតាមមន្រ្តីក្រសួងការពារជាតិម្នាក់ ដែលផ្ដល់ព័ត៌មានមិនលម្អិតដល់ទូរទស្សន៍ CCN ជាអនាមិក មីស៊ីល HAWC បានឈានដល់ល្បឿនខ្ពស់ជាង Mach 5 ក្នុងរយៈកម្ពស់ ៦៥ ០០០ ហ្វីត និងរយៈចម្ងាយ ៣០០ ម៉ាយលើសមុទ្រ ក្នុងអំឡុងពេលនៃការសាកល្បង។ ចំណែកឯទីភ្នាក់ងារ DARPA មិនបានបញ្ជាក់ច្បាស់ថា ការសាកល្បងនេះធ្វើឡើងនៅពេលណាទេ គ្រាន់តែនិយាយថា «ថ្មីៗនេះ»។
ការសាកល្បងរបស់សហរដ្ឋអាមេរិកដោយស្ងាត់ៗ ធ្វើឡើងប៉ុន្មានថ្ងៃក្រោយរុស្ស៊ីនិយាយថាខ្លួនបានប្រើល្បឿនលឿនជាងសំឡេង Kinzhal របស់ខ្លួនក្នុងអំឡុងពេលការលុកលុយអ៊ុយក្រែន ដោយអះអាងថាបានកំណត់គោលដៅលើឃ្លាំងរំសេវមួយនៅភាគខាងលិចប្រទេស។ យ៉ាងណាមិញ Kinzhal គឺជាប្រភេទមីស៊ីលផ្លោងរយៈចម្ងាយខ្លី Iskander របស់រុស្ស៊ី។ ម្យ៉ាងវិញទៀត វាគឺជាការបម្រែបម្រួលនៃបច្ចេកវិទ្យាដែលបង្កើតឡើង ផ្ទុយទៅនឹងបដិវត្តន៍អាវុធលឿនជាងសំឡេង។
ប្រភព៖ Fox News
